Бүген Казанда «Бердәм Россия» Генераль советы комиссиясенең эш төркеме катнашучылары Татарстан территориясендә онкология авырулары булган пациентларга медицина ярдәме күрсәтү һәм дарулар белән тәэмин итү системасын камилләштерү турында фикер алыштылар. Чарада Социаль сәясәт комитеты рәисе Алексей Созинов катнашты.

"Онкология белән авыручылар саны арту күбесенчә гомер озынлыгы, өлкәннәр саны арту белән бәйле, - дип билгеләп үтте Созинов. – Республиканың сәламәтлек саклау тармагында онкология авыруларын иртә диагностикалауга басым ясала, дәвалау ысулларының саны арта. Шуның белән бергә кешеләрнең махсуслаштырылган ярдәмнең сыйфатына карата өметләре арта. Бу мәсьәләләр, шул исәптән ТР Дәүләт Советы мәйданчыгында игътибар үзәгендә тора".

“Яман шешләрне ачыклау онкология хезмәтенең төп күрсәткечләреннән берсе булып тора. 2025 ел нәтиҗәләре буенча Татарстанда беренче тапкыр ачыкланган яман шеш авырулары үсеше 4,4% тәшкил итте, барлыгы 5 ел эчендә30% чамасы”, – дип хәбәр итте ТР сәламәтлек саклау министрының беренче урынбасары Елена Демьянова. 

“2025 ел нәтиҗәләре буенча яман шешләр белән авыру күрсәткече динамикасы беренче тапкыр 100 мең кешегә 500 очрак бусагасыннан артып китте. Республикада авырулар динамикасы Гомумроссия күрсәткечләре белән чагыштырырлык. Авырулар саны арту халыкның яшь структурасының 60+ ягына үзгәрүе, профилактик программаларның нәтиҗәлелеге һәм сәламәтлек саклауның заманча диагностик мөмкинлекләренең киңәюе белән бәйле”, – дип хәбәр итте Елена Демьянова.

Онкоскринингның күпчелек локализациясе буенча яман шешләрне 1-2 стадияләрдә ачыклау диспансеризация кысаларындагы системалы чаралар нәтиҗәсендә мөмкин булды, дип төгәлләштерде спикер.