Бүген Казанда «Татарстан – Яңа гасыр» республика иҗтимагый хәрәкәтенең X съезды узды. ТР Дәүләт Советы Рәисе, хәрәкәтнең Югары Советы Рәисе Фәрит Мөхәммәтшин узган 3 елдагы эшчәнлек турында хисап белән чыгыш ясады һәм киләчәккә бурычларны билгеләде. Съезд эшендә ТР Дәүләт Киңәшчесе Минтимер Шәймиев катнашты.

Форум ТР Рәисе Рөстәм Миңнехановның съездда катнашучыларга сәламләү мөрәҗәгате белән ачылды, аны ТР Рәисе Администрациясе җитәкчесе урынбасары – ТР Эчке сәясәт мәсьәләләре департаменты башлыгы Руслан Мөхәрләмов ирештерде. «Бүген «Татарстан – Яңа гасыр» хәрәкәте республикада иң зур һәм абруйлы иҗтимагый көчләрнең берсе булып санала, - диелә Татарстан җитәкчесе сәламләвендә. - Хәрәкәт әгъзаларының барлык дәрәҗәдәге сайлау кампанияләрендә актив катнашуы, иҗтимагый мөһим акцияләрне һәм проектларны тормышка ашыруы сөендерә. Хәрәкәтнең төп казанышы – Ватанга мәхәббәт, уртак мәдәниятебезгә, традицион кыйммәтләребезгә хөрмәт, республиканың күпмилләтле халкына файда китерергә омтылу берләштергән кешеләр».

«Чирек гасыр элек Татарстанның беренче Президенты Минтимер Шәймиев инициативасы белән «Татарстан – Яңа гасыр» хәрәкәтен булдыруның үз вакытында һәм дөрес булуын күрсәтте, – дип искәртте Фәрит Мөхәммәтшин. – Бу карар республиканың барлык «сәламәт һәм максатчан» иҗтимагый көчләрен берләштерергә, ул катлаулы чорда социаль-икътисади реформаларга Татарстан курсын саклап калу өчен ышанычлы һәм ныклы «җилкә» формалаштырырга мөмкинлек бирде. Бүген безнең хәрәкәт үз сафларында дистәдән артык коллектив әгъзаны һәм 100 меңнән артык татарстанлыны берләштерә, уртак тырышлык һәм кешеләр белән актив эшләү нәтиҗәсендә хәрәкәт ныгый, республика халкы арасында танылу ала. Хисап чорында югары советның 9 утырышы уздырылган, 11 тапкыр Президиум җыелган,  җәмгыять һәм хәрәкәт тормышы, шул исәптән сайлау процессында катнашуга кагылышлы мәсьәләләрнең иң киң спектры тикшерелә. Хәзерге вакытта хәрәкәтнең 3000гә якын вәкиле участок сайлау комиссияләре составында даими нигездә хәл итүче тавыш хокукы белән эшли. Республиканың 37 районында хәрәкәт вәкилләре кандидатлар итеп күрсәтелә һәм муниципаль берәмлекләрнең вәкиллекле органнары депутатлары итеп сайлана. Сайлау нәтиҗәләре буенча ТЯГ хәрәкәтеннән 149 депутат сайланды. Республиканың 32 муниципалитетында әлеге хәрәкәт депутатлары район советларына керде. 3 ел эчендә муниципаль хакимият органнарындагы коллегаларыбызга 6 меңнән артык мөрәҗәгать килде, бу хәрәкәтнең югары потенциалы, төрле дәрәҗәдәге хакимиятләр белән үзара хезмәттәшлеге, депутатларыбызның шәхси абруе турында сөйли».

«Татарстан – Яңа гасыр» хәрәкәте әгъзаларының конкрет эшләре турында сөйләгәндә, Фәрит Мөхәммәтшин балаларны һәм яшьләрне рухи-әхлакый һәм патриотик тәрбияләү, «Татарстан - безнең уртак йортыбыз» парламент дәресләре, волонтерлык һәм хәйрия хәрәкәте һәм башка бик күп мөһим эшчәнлек юнәлешләрен билгеләп үтте.

Хисап чорында «Татарстан – Яңа гасыр» традицион гаилә кыйммәтләрен популярлаштыру өлешендә дәүләтнең демографик сәясәтен камилләштерүгә аерым игътибар күрсәтте,  – диде хәрәкәт җитәкчесе. – Сәламәт балаларның тууын арттыру, балаларда һәм яшьләрдә гаиләгә карата ихтирамлы мөнәсәбәт тәрбияләү мәсьәләләре республика министрлыклары һәм ведомстволарының киң вәкиллеге, югары уку йортлары һәм коммерцияле булмаган оешма вәкилләре катнашында күп тапкырлар фикер алышу предметына әверелде. Гаилә конфликтларын кисәтү һәм судка кадәр көйләү турында даими консультацияләр, тренинглар һәм семинарлар оештырыла. ТЯГ хәрәкәте 2013 елдан бирле авыр тормыш хәлендә калган балалар, шул исәптән сәламәтлек мөмкинлекләре чикләнгән балалар белән эшли».

Фәрит Мөхәммәтшин әйтүенчә, гражданнарның сәламәтлеге мәсьәләсе хәрәкәт эшчәнлегендә иң мөһим темаларның берсе булып кала. «Татарстан – Яңа гасыр» физкультура һәм спорт белән массакүләм шөгыльләнүне актив пропагандалый, кешеләрнең сәламәт яшәү рәвешенә омтылышын хуплый, - дип билгеләп үтте ул. – Менә инде 20 ел дәвамында «Татарстан-Яңа гасыр» хәрәкәте кубогына ир-атлар һәм хатын-кызлар командалары арасында, шулай ук республика шәһәрләре һәм районнары спорт ветераннары командалары арасында волейбол буенча традицион ярышлар үткәрелә. Икенче ел рәттән Чистайда бадминтон буенча «Золотой волан ТНВ» республика ярышлары уздырылды. Минзәлә һәм Нурлат бүлекчәләре инициативасы белән спорт аэробикасы буенча республика турнирлары һәм йөзү буенча ярышлар уздырылды».

Район һәм җирле хәрәкәт структуралары вәкилләренә мөрәҗәгать итеп, Фәрит Мөхәммәтшин реаль җитештерүгә ярдәм итү, инвестицион климатны яхшырту, бизнес алып бару өчен уңайлы шартлар тудыру, эшлекле активлыкны арттыру, шәхси хуҗалыкларны үстерү һәм авылда кооперация, илкүләм проектлар һәм республика программалары аша муниципалитетларны баланслы үстерү мәсьәләләрен даими контрольдә тотарга чакырды. «Барлык шартларга карамастан, илкүләм проектларны гамәлгә ашыру дәүләт һәм муниципаль хакимият органнары көн тәртибендә иң актуаль темаларның берсе булып тора, – дип ассызыклады республика парламенты башлыгы. – Аларның нәтиҗәлелеге һәр татарстанлының тормыш сыйфатын яхшыртуга уңай йогынты ясарга тиеш».

Фәрит Мөхәммәтшин фикеренчә, «Татарстан-Яңа гасыр» хәрәкәтенә  2024 елның мартында РФ Президентын сайлаудан башланып, 2024 елның көзендә Татарстан Дәүләт Советы депутатларын сайлаулар, 2025 елда - Татарстан Рәисен һәм җирле үзидарә вәкиллекле органнарын сайлаулар, 2026 елда - Дәүләт Думасы депутатларын сайлаулар булачак сайлау циклына зур бурычлар йөкләнә. «Эш күп булачак, – диде Дәүләт Советы Рәисе. – Беренче чиратта Дәүләт Советына сайланачак кандидатларны билгеләргә, гражданнар мөрәҗәгатьләре белән эшне активлаштырырга, очрашуларга һәм хисапларга әзерләнергә, республикабызның барлык төп сайлаучылар төркемнәрен мобилизацияләүгә ярдәм итәргә кирәк. Татарстан сайлаучыларының барлык дәрәҗәдәге сайлауларга килүе – республиканың иҗтимагый-сәяси тормышының мөһим традицияләренең берсе» .  

 Съезд делегатларына ТРның беренче Президенты, ТР Дәүләт Киңәшчесе Минтимер Шәймиев мөрәҗәгать итте, ул хәрәкәт эшчәнлеге турындагы хисап докладын эчтәлекле һәм реаль дип атап, киләчәктә конкрет чаралар һәм проектлар буенча актив эшләргә чакырды. «Ил һәм республика өчен авыр шартларда без «Бердәм Россия»" партиясе белән берлектә конкрет эшләр аша нәтиҗәлелек үрнәген күрсәтергә тиешбез, – диде ул. – Партия эшенең нәтиҗәлелеге бик мөһим. Сез хәрәкәтнең җирле бүлекчәләрен тәкъдим итәсез, кешеләрнең проблемаларын бик яхшы беләсез. Сезнең конкрет мәсьәләләрне ничек хәл итүегездән чыгып халык безнең хәрәкәт, безнең партия турында хөкем итәчәк».

Агросәнәгать секторында хәрәкәт әгъзаларының кичекмәстән катнашын таләп итүче күпьеллык конкрет проблемаларның берсе дип Минтимер Шәймиев республика хуҗалыкларында бал кортларының һәлак булуын атады. Аның фикеренчә, ТЯГ хәрәкәте зур әһәмият биргән Җир хартиясе җәмгыять үсеше өчен нәкъ менә конкрет ресурсларны саклауны күздә тота.

Дәүләт Советы депутаты Марат Галиев съездда катнашучыларның игътибарын яңа технологияләр үсешенә юнәлтте. «Егерме беренче гасыр принципиаль яңа технологияләр белән характерлана, - диде ул. Һәм безнең иҗтимагый хәрәкәт җәмгыятьтә иҗади характердагы, гуманистик нигездә тенденцияләрне билгеләү өчен булдырылган. Бүген безгә глобаль дәрәҗәдә дә, ил һәм республика дәрәҗәсендә дә үз эшчәнлегебезгә игътибар итәргә кирәк. Чөнки кешелек, шул исәптән безнең җәмгыять, дөньядагы каршылыклар нәтиҗәсендә үзгәрү процессын кичерә. Һәм бу проблемалар арасында җирле характердагы күп кенә мәсьәләләр бар, аларны хәл итү белән без сезнең белән шөгыльләнергә тиешбез».

Хисап буенча фикер алышуларда хәрәкәтнең кайбер җирле бүлекчәләре секретарьлары да катнашты.

Съездда «Татарстан – Яңа гасыр» хәрәкәте Уставына үзгәрешләр кертү турында карар кабул ителде, хәрәкәтнең Югары Советы һәм аның Президиумы әгъзалары сайланды.

«Татарстан – Яңа гасыр» республика иҗтимагый хәрәкәтенең Югары Советы рәисе итеп кабаттан Фәрит Мөхәммәтшин сайланды.