Бүген Дәүләт Советы Рәисе Фәрит Мөхәммәтшин эш сәфәре белән Балык Бистәсе районына барды, анда капиталь ремонттан соң ачылган 1 нче гимназиядә булды, педагоглар һәм укучылар белән аралашты, шулай ук район Советының хисап сессиясендә катнашты.

Парламент башлыгының эш сәфәре 1 нче Балык Бистәсе гимназиясен караудан башланды. Узган ел мәктәп бинасында капиталь ремонт үткәрелгән, түбә һәм фасадлар, инженерлык һәм коммуналь челтәрләр яңартылган, видеокүзәтү урнаштырылган, территория төзекләндерелгән. Гимназиядә 650дән артык укучы белем ала, 74 педагог эшли. Гимназиядә туган телләрне, шул исәптән татар телен өйрәнүгә зур игътибар бирелә. Башлангыч мәктәптә 4 сыйныф эшли, анда туган телне тирәнтен өйрәнүдән тыш, татар телендә дә берничә фән укытыла. "Бездә инженерлык сыйныфлары да бар, – дип сөйләде гимназия директоры Ләйсән Хәлимова, – мәктәп азык-төлек блокларын капиталь ремонтлау буенча республика программасы буенча без ашханәне ремонтладык, хәзер барлык балалар да ике тапкыр кайнар ризык белән тәэмин ителгән".

Район Советы сессиясе район мәдәният йортында узды, фойеда җирле оешмалар, эшмәкәрләр һәм үзмәшгуль гражданнар җитештергән продукцияләрдән күргәзмә оештырылган иде.

Балык Бистәсе районы башлыгы Радик Ислямов 2023 елда районның социаль-икътисади үсеш йомгаклары һәм 2024 елга бурычлары турында хисап белән чыгыш ясады. Ул билгеләп үткәнчә, соңгы берничә елда районда социаль-икътисади хәл тотрыклы кала, төп күрсәткечләр уңай динамикага ия. Мәсәлән, 2023 елда 1,5 млрд сумлык продукция җибәрелгән, бу 2022 ел күрсәткеченнән 18,7% ка күбрәк.

"Район икътисадына аграр комплекс зур өлеш кертә, – дип ассызыклады район башлыгы. – 121,7 мең тонна ашлык, 9,2 мең тонна майлы культуралар җыелган. 16,8 мең тонна сөт, ике мең тоннадан артык ит җитештерелгән. 2023 елда авыл хуҗалыгы продукциясенең тулаем җыюы 2,5 млрд сум тәшкил итә, акчалата керем 2,1 млрд сум.

Кече хуҗалык формаларын үстерү турында сөйләгәндә, Радик Ислямов авыл эшкуарларының активлыгын арттыруга бюджетның барлык дәрәҗәләреннән финанс ярдәме ярдәм итә, дип билгеләп үтте. Узган ел фермерлар үсемлекчелек һәм терлекчелекне үстерүгә, сөт юнәлешендәге минифермалар төзүгә грантлар алганнар.

2023 елда район 20 федераль һәм республика программасын гамәлгә ашыруда катнашкан, алар кысаларында 38 объект төзелгән, капиталь ремонтланган һәм төзекләндерелгән, капиталь кертемнәренең гомуми суммасы бюджеты 589,7 млн сум тәшкил иткән. Радик Ислямов Татарстан Республикасы Рәисенә, Дәүләт Советы депутатларына, республика Хөкүмәтенә ярдәмнәре өчен рәхмәт белдерде.

Районның тулаем территориаль продуктында кече һәм урта бизнес өлеше 37% тәшкил итә. 649 бизнес субъектында 3234 кеше эшли, бу эшкә сәләтле халыкның 24,8 проценты, шуларның 1494е–  үзмәшгульләр.

Актуаль проблемалар арасында район башлыгы җәйге вакытта су җитмәвен билгеләде. "Узган ел су белән тәэмин итү системасын төзүнең икенче этабы тәмамланды, чиста эчәр су өчен 8 резервуар куелды, – дип сөйләде Радик Ислямов, – быел тышкы челтәрләр һәм комплекслы корылмалар төзү планлаштырыла". Моннан тыш, быел район «Авыл территорияләрен комплекслы үстерү» программасында катнаша, аның кысаларында яшьләр үзәге, балалар сәнгать мәктәбе, су агызу челтәре һ. б. төзү планлаштырыла.

Узган ел нәтиҗәләрен анализлап, парламент башлыгы районның үсеш потенциалына аерым басым ясады. "Балык Бистәсе районының икътисади күрсәткечләрне яхшырту өчен зур резервлары бар, – дип басым ясады  Фәрит Мөхәммәтшин, – республика җитәкчелеге - Татарстан Рәисе дә, Хөкүмәт тә, Дәүләт Советы да муниципалитетлар, шул исәптән Балык Бистәсе районына да, инициативаларны һәм барлык игелекле эшләрне гамәлгә ашыруда җитди ярдәм итәләр".

Парламент башлыгы район җитәкчелеген һәм халкын муниципалитетларның йөзен үзгәртә торган республика һәм дәүләт программаларын гамәлгә ашыруда активрак катнашырга, күрсәтелгән барлык ярдәм чараларыннан файдаланырга чакырды. "Федераль һәм республика дәүләт программалары сезнең планнарыгызны һәм проектларыгызны тормышка ашыру өчен зур мөмкинлекләр ача, – диде ул, – республика, тулаем алганда, илдәге катлаулы икътисади һәм сәяси вәзгыятькә карамастан, уңышлы үсеш ала. Бу тотрыклылыкта Сезнең районның да өлеше бар".

Фәрит Мөхәммәтшин республика халкын үзе җитештергән продукция белән тәэмин итүгә зур өлеш кертүче авыл халкына рәхмәт белдерде. "Авыл хезмәтчәннәренең тырыш хезмәте нәтиҗәсендә ел саен Татарстанның сөт җитештерү буенча иң алдынгы позициясе саклана, –диде республика парламенты җитәкчесе. – Узган ел бөртеклеләрнең яхшы уңышы җыелды. Республика Хөкүмәте киләчәктә дә авыл товар җитештерүчеләренә ярдәм итәчәк".

Фәрит Мөхәммәтшин фикеренчә, әлеге ярдәм чаралары аграр комплекстагы хәлне яхшыртырга сәләтле. Әйтик, узган ел районда мөгезле эре терлек, савым сыерлары саны кимегән. "Бу күрсәткечләрдә үсеш потенциалы күп очракта хуҗалык итүнең кече формаларына да бәйле, – дип саный Фәрит Мөхәммәтшин, – республикада бу өлкәдә ярдәм итүгә юнәлдерелгән максатчан, грант программалары гамәлдә. Аларда иң актив катнашырга, шуның ярдәмендә шәхси секторда терлек санын арттырырга кирәк".

Чыгыш ахырында Фәрит Мөхәммәтшин район Советы депутатларының һәм авыл җирлекләре башлыкларының игътибарын агымдагы елның мартында Россия Президентын һәм сентябрьдә Татарстан Дәүләт Советы депутатларын сайлауда катнашу буенча халык арасында аңлату эшен көчәйтү зарурлыгына юнәлтте.

"Балык Бистәсе халкы, гомумән алганда, 2023 нче катлаулы елны уңышлы тәмамлады, һәм Балык Бистәсе районының күпмилләтле хезмәт сөючән халкына хөрмәт күрсәтергә кирәк, биредә яңа производстволар да ачылды, продукцияне сату да җайга салынды, – дип билгеләп үтте Фәрит Мөхәммәтшин журналистлар белән аралашканда, утырышка йомгак ясап,  –шул ук вакытта, резервлар да бар, без моңа игътибар итмичә кала алмыйбыз,  бу ел район үсеше өчен дә уңышлы булыр дип уйлыйм".   

Район сессиясе эшендә шулай ук ТР Хезмәт, халыкны эш белән тәэмин итү һәм социаль яклау министры Эльмира Зарипова, республика министрлыклары һәм ведомстволары вәкилләре, авыл җирлекләре башлыклары, район предприятиеләре һәм оешмалары җитәкчеләре катнашты. Утырыш бүләкләр тапшыру белән тәмамланды.