Бүген Казанда, «Адымнар» полилингваль комплексында, Евразия интеграциясенең юбилей, бишенче Казан халыкара конгрессының пленар утырышы узды, аның эшендә РФ ФС Дәүләт Думасы һәм ТР Дәүләт Советы депутатлары, республиканың профильле министрлыклары һәм ведомстволары вәкилләре, фәнни һәм эксперт берләшмәсе, чит илләрнең Казандагы дипломатик вәкиллекләре җитәкчеләре катнаша. Татарстан җитәкчелеге исеменнән форумда катнашучыларны Дәүләт Советы Рәисе Фәрит Мөхәммәтшин сәламләде.

"Евразия интеграциясенең бишенче халыкара конгрессы Евразия икътисади берлеген (ЕАЭС) төзү турында Астана килешүенә кул куелуның 10 еллыгы елында уза, – дип искәртте Фәрит Мөхәммәтшин Конгресста катнашучыларга. – Бүген Евразия дәүләтара проекты турында дөньяның барлык континентларында да беләләр. Евразия икътисади берлеге иң нәтиҗәле берләшмәләрнең берсе булып тора. Шунысы куанычлы, Татарстан башкаласы экспертлар берләшмәсе очрашу урыны, безнең дәүләтләр җитәкчеләре игълан иткән бердәмлек курсын Евразия масштабында гамәлгә ашыруга яңа алымнар эшләү урыны булды. Нәкъ менә монда соңгы елларда Евразия интеграция процессының мөһим карарлары эшләнә һәм кабул ителә. Төбәк дәрәҗәсендә без сәнәгать тармакларының үзара бәйләнеше, электрон сәүдә процессларын активлаштыру турында мөһим карарлар кабул итүне хупладык".

Россиянең БРИКС, ШОС, ЕАЭС һәм АТЭС халыкара берләшмәләре буенча партнерлары белән халыкара хезмәттәшлек мәсьәләләре турында сөйләгәндә, Татарстан Дәүләт Советы Рәисе билгеләп үткәнчә, соңгы елларда активлашкан Россия Федерациясе субъектларының тышкы элемтәләре Россиянең чит илләр белән дәүләтара мөнәсәбәтләр комплексының мөһим өлеше булып тора. "Халыкара һәм тышкы икътисадый эшчәнлектә катнашып, илебез субъектлары илебез икътисадының тотрыклы үсеше һәм көндәшлеккә сәләтлелеген арттыру, аны технологик яңарту өчен уңай тышкы алшартлар булдыруга ярдәм итә, – дип билгеләп үтте Фәрит Мөхәммәтшин. – Евразия икътисади берлеге эчендә Халыкара кооперация җитештерү мәйданчыкларында бәйләүче технологик линияләрне ныгытуда, киң һәм комплекслы импортны алмаштыруны үткәрүдә, конкурентлыкка сәләтле югары технологияле производстволар булдыруда мөһим фактор булып тора. Россия төбәкләрендә безнең дәүләтләрнең динамик һәм тотрыклы үсешенең бердәм Евразия каркасын формалаштыруны тәэмин итүче интеграция процессларын кызыксынып күзәтәләр. Евразия фәнни-техник һәм фәнни-технологик мәйданчыкларын активлаштыру, инновацияләрне кластерлаштыру бу процесска үз өлешен кертә. Казан дискуссия мәйданчыклары кысаларында бездә халыкара һәм төбәкара хезмәттәшлекнең мөһим темалары турында фикер алышу, алга таба үсешнең максатчан ориентирларын билгеләү, фикерләр һәм бәяләмәләр белән уртаклашу, уртак нәтиҗәле карарлар эшләү мөмкинлеге бар".

Фәрит Мөхәммәтшин конгрессны оештыручыларга рәхмәт белдерде, ә форумда катнашучыларга һәм кунакларга конструктив һәм нәтиҗәле эш, эшлекле элемтәләрне һәм партнерлык мөнәсәбәтләрен ныгытуларын теләде.

РФ Тышкы эшләр министры Сергей Лавров Казан Халыкара Евразия интеграциясе конгрессын оештыручылар һәм катнашучылар адресына сәламләү юллаган. Фәрит Мөхәммәтшин сәламләү сүзләрен җиткерде. "Сезнең мәйданчык дәүләт, җәмәгать эшлеклеләре, халыкара белгечләр, икътисадчылар, фәнни даирә вәкилләрен – безнең Евразия континентында төрле планлы хезмәттәшлекне ныгыту белән кызыксынучыларны берләштерә, – дип билгеләп үткән Сергей Лавров. – Бүген, коллектив Көнбатыш дәүләтләренең җимергеч линиясе нәтиҗәсендә дөньядагы вәзгыять катлаулангач, халыкара көн тәртибен формалаштыру буенча сезнең эшегез бик тә кирәкле. Сезнең алда  Евразиядә практик кооперацияне үстерү мәсьәләләренең киң спектрын карау бурычы тора".

Дәүләт Думасының БДБ эшләре, Евразия интеграциясе һәм ватандашлар белән элемтәләр комитеты рәисе урынбасары Артем Туров РФ ФС Дәүләт Думасы Рәисе Вячеслав Володинның Казан халыкара конгрессына югары бәя биргән сәламләвен ирештерде. "Конгресс галимнәр, экспертлар, профессионаллар арасында зур абруйга ия, алар форум кысаларында икътисадның стратегик тармакларында һәм гуманитар өлкәдә ЕАЭС катнашучыларының тигез хокуклы партнерлыгын ныгыту буенча гамәли механизмнар эшлиләр, – дип билгеләп үтә Россия парламентының түбән палатасы җитәкчесе мөрәҗәгатендә. – Гадел күпполярлы дөнья тәртибе формалашу шартларында суверен үсештә, тарихи хакыйкатьне, милли мәдәни мирасны саклауда кызыксынучы илләребезнең хезмәттәшлеге киңәя. Фикер алышуларның нәтиҗәсе безнең илләр гражданнары мәнфәгатьләрендә перспективалы тәкъдимнәр булуы мөһим".

Пленар утырышта шулай ук РФ ФС Дәүләт Думасының Хезмәт, социаль сәясәт һәм ветераннар эшләре комитеты рәисе Ярослав Нилов, философия фәннәре докторы, профессор, РАЕНның тулы хокуклы әгъзасы Рамазан Абдулатипов чыгыш ясады.

Халыкара Евразия интеграциясе конгрессы РФ ФС Дәүләт Думасының БДБ эшләре, Евразия интеграциясе һәм ватандашлар белән элемтәләр комитеты, Татарстан Республикасы Рәисе һәм Татарстан Республикасы Дәүләт Советы ярдәме һәм теләктәшлеге белән үткәрелә.

Евразия интеграциясе процессларын тирәнәйтү һәм киңәйтү мәсьәләләрен тикшерүгә багышланган Халыкара конгресс эше Казанда ике көн дәвамында, 13-14 июньдә дәвам итәчәк. Иртәгә секцияләр утырышы булачак.