Бүген Дәүләт Думасында депутатлар Хөкүмәт сәгате кысаларында РФ Фән һәм югары белем министры Валерий Фальковның «Фән һәм университетлар» милли проектын гамәлгә ашыру турында, югары өстәмә һөнәри белем бирү өлкәсендә дәүләт сәясәте турында мәгълүмат тыңладылар. Мәсьәлә буенча фикер алышуда видеоэлемтә режимында ТР Дәүләт Советының Мәгариф, мәдәният, фән һәм милли мәсьәләләр комитеты рәисе урынбасары Людмила Рыбакова катнашты.

Валерий Фальков милли проектны гамәлгә ашыру турында сөйләгәндә, аның төп бурычларының берсе беренче чиратта төбәкләрдә югары белем алу мөмкинлегенең үсүен билеләп үтте. «2020 елдан башлап Президент йөкләмәсе буенча без вузларда бюджет урыннары санын арттыра бардык. Бүгенге көнгә куелган бурыч хәл ителде: илдә югары белем алу мөмкинлеге сизелерлек артты", - диде министр.

Аның сүзләренчә, бүлеп бирелгән бюджет урыннарының 75% ка якыны төбәк университетларына туры килә. 2023 елда чыгарылыш сыйныф укучыларының 54% үз төбәгендә югары белем бирүнең беренче дәрәҗә программалары буенча бюджетка кергән. Димәк, алар җирле эш бирүчеләр тарафыннан кирәкле белгечлекләр буенча белем ала һәм анда эшләргә калу ихтималы зур.

Министр Дәүләт Думасы Рәисе урынбасары Ирина Яроваяның киләсе елда Россия парламентының түбән палатасы мәйданчыгында максатчан җыюга әзерлек буенча эшче төркем булдыру турындагы тәкъдимен хуплады.

"Дәүләт Думасы тарафыннан инициативалы тәртиптә кадрларны максатчан җыю буенча әзерләүнең уникаль механизмы эшләнде һәм закон нигезендә расланды. Быел эш бирүчеләр тарафыннан 114 мең гариза һәм абитуриентлар тарафыннан 173 мең гариза бирелгән", - дип ассызыклады Ирина Яровая һәм бу эшне Дәүләт Думасы мәйданчыгында дәвам итәргә тәкъдим итте.

Дәүләт Думасының Контроль комитеты рәисе Олег Морозов үз чыгышында билгеләп үткәнчә, кайбер проблемаларын хәл итү өстендә уртак эш алып барыла. "Бу барыннан да элек икътисадның югары квалификацияле кадрлар белән тәэмин ителешенә бәйле вәзгыять, - диде ул. - Экспертлар фикеренчә, югары белемле хезмәткәрләр арасында кадрлар кытлыгы 2030 елга 1,4 млн кешегә җитәргә мөмкин, бу оеруча эшкәртү сәнәгатендә һәм башка югары технологияле тармакларда чагылыш табачак».

Шулай ук Олег Морозов студентлар тулай торакларында урын алу мөмкинлеген яхшырту зарурилыгына игътибар итте.