Бүген Татарстан Республикасы Дәүләт Советы каршындагы Яшьләр парламентының бишенче утырышы узды, анда яшь парламентарийлар шәһәр транспортында студентлар өчен ташламалы түләү мәсьәләсе буенча фикер алыштылар, гамәлдәге законнарга үзгәрешләр тәкъдим иттеләр, шулай ук 2020 елда эшкә йомгак ясадылар һәм киләсе елга планнар кордылар. Утырыш эшендә Дәүләт Советы Рәисе урынбасары Татьяна Ларионова, РФ Федераль Җыены Дәүләт Думасы депутаты Марат Бариев, ТР Яшьләр эшләре министры Дамир Фәттахов катнашты.

Казанда студентларга җәмәгать транспортында йөрү өчен ташламалы тариф кертү мәсьәләсе дә кызу бәхәс уятты. ТР Студентлар лигасы президенты Руфат Киямов сүзләренә караганда, республика башкаласында бик күп студентлар укый, бу үз чиратында Казанның яшьләрне үзенә җәлеп итүен раслый. Әмма студентлар өчен һәрвакыт транспортта йөрү бәясе мәсьәләсе кискен торды. Докладчы билгеләп үткәнчә, вәзгыять элегрәк булган студентлар тарифлары гамәлдән чыгарылуы белән катлауланган, тарифка бәяләр даими күтәрелеп тора.

Шунысын да билгеләп үтәргә кирәк, республикада күп еллар дәвамында транспорт гранты гамәлгә ашырыла, аны финанслау 30дан 60 миллион сумга кадәр арткан. Ел саен 5,7 меңнән артык студентка әлеге ярдәм күрсәтелә.

"Без моның проблеманы тулысынча хәл итмәвен аңларга тиеш. Студентлар саны республикада күпкә күбрәк», - дип басым ясады Руфат Кыямов һәм берничә миллионлы шәһәрләрне мисалга китерде, анда студентларга транспортта йөрү өчен түләүне субсидияләү мөмкинлеге табылган.

ТР Студентлар лигасы президенты вәзгыятьне хәл итүнең үз вариантын тәкъдим итте.

"Көн саен студентлар уку йортына һәм киресенчә барып кайта - бу көнгә ике, ягъни аена 44 сәфәр. Шулай итеп, даими кереме һәм даими эшкә урнашу мөмкинлеге булмаган көндезге уку формасы студентлары өчен без "44" тарифын кертергә тәкъдим итәбез. Барлык транспорт төрләренә 44 сәфәргә исәпләп 880 сум килеп чыга", - диде Руфат Кыямов һәм әлеге инициативаны хуплау быел республикада Студентлар лигасын төзүнең 25 еллыгын билгеләп үтү  елында символик мәгънәгә ия  булыр иде, дип ассызыклады.

Яшьләр парламенты әгъзалары бу нисбәттән ТР Президентына, шулай ук профильле министрлыклар һәм ведомстволар адресына мөрәҗәгатьләр җибәрергә ниятли.

Дәүләт Советы Рәисе урынбасары Татьяна Ларионова инициативаны хуплавын белдерде, шул ук вакытта ул Казан администрациясе, транспорт ташучылар, югары уку йортлары җитәкчеләре белән берлектә мәсьәләне җентекләп өйрәнү өчен эш төркеме төзергә тәкъдим итте.

ТР Яшьләр эшләре буенча министр Дамир Фәттахов сүзләренә караганда, барысы да бу мәсьәләнең әһәмиятен аңлый, әмма кайбер моментларны ачыкларга, шул исәптән мохтаҗлык категориясен һәм мохтаҗлар санын билгеләргә кирәк. "Теләсә нинди ташлама адреслы характерда булырга һәм конкрет студентның социаль проблемасын хәл итәргә тиеш", - дип белдерде ул үз карашын.

Утырыш барышында Яшьләр парламенты рәисе Нина Шимина 2020 елдагы эшчәнлек турында хисап тотты. Хәзерге парламент составын сайлаганнан соң бер елдан аз гына артык вакыт үткән. Бу вакыт эчендә бик күп норматив-хокукый документлар әзерләнгән, кайбер эре проектлар гамәлгә ашырылган, иҗтимагый оешмалар белән хезмәттәшлек турында килешүләргә кул куелган. Нина Шимина ТР Яшьләр парламенты инициативасы белән республиканың 45 муниципалитетының 44 ендә үз яшьләр парламентының төзелүенә игътибар юнәтте.

Яшь закон чыгаручылар эшчәнлеген шәрехләп, Яшьләр эшләре буенча министр Дамир Фәттахов Татарстан Республикасы Яшьләр парламентының хәзерге составы беренче тапкыр башка принцип - дәүләт хезмәтләре сайтында тавыш бирү юлы белән формалаштырылды, дип ассызыклады. Ул Яшьләр парламентына вәкилләр сайларга мөмкинлек биргән процедураның мөһимлеген билгеләп үтте.

Профильле ведомство башлыгы фикеренчә, ТР Яшьләр парламенты башка иҗтимагый оешмалар белән беррәттән төрле проектларны гамәлгә ашыруда гына түгел, ә яшьләр мәнфәгатьләрен яклау буенча үз вазыйфаларын һәм актуаль мәсьәләләр буенча закон чыгару карарлары тәкъдимен югары дәрәҗәдә башкара.

Бүген утырышта яшь парламентарийлар беренче тапкыр "яшьләр" төшенчәсе кертелгән яшьләр сәясәте турында федераль закон кабул итүнең мөһимлеген билгеләп үттеләр, яшь кешеләрнең яше 35 яшькә кадәр артты, яшьләр сәясәтенең төп юнәлешләре билгеләнде. "Күп газап күргән документны" эшләүнең төп этаплары турында яшь хезмәттәшләренә РФ Дәүләт Думасы депутаты Марат Бариев сөйләде.

ТР Яшьләр парламенты әгъзалары шулай ук РФ Гаилә һәм Хезмәт кодексына үзгәрешләр кертү, республикада торак төзелешен үстерүгә дәүләт ярдәме, «Авыл хуҗалыгын үстерү турында» Федераль законга үзгәрешләр кертү, шулай ук хайваннар белән эш итү өлкәсендәге законнарга үзгәрешләр һәм өстәмәләр кертү турындагы мәсьәләләрне карады.

Ахырда ТР Яшьләр парламенты әгъзалары 2021 елга эш планын раслады.

Утырышка йомгак ясап, Дәүләт Советы Рәисе урынбасары Татьяна Ларионова яшь хезмәттәшләренең тәкъдимнәре һәм инициативалары “Законнарны бергә язабыз!” проекты кысаларында да каралырга мөмкин, дип билгеләп үтте.

"Яшьләр, сез булдырдыгыз. Сезнең ел бик нәтиҗәле, файдалы, бик иҗади булды. Бу елга планнар да киеренке. Уңышлар, яхшы кәеф һәм сәламәтлек сезгә", - дип теләде ул.