Бүген Дәүләт Советының Бюджет, салымнар һәм финанс комитеты 2021 елга, 2022 һәм 2023 елларның планлы чорына Татарстан Республикасы бюджеты турында республика законына үзгәрешләр кертү турында закон проектын карады.  Кергән акчалар, нигездә, социаль өлкәне финанслауга юнәлдереләчәк.

Бюджет, салымнар һәм финанс комитеты рәисе Леонид Якунин билгеләп үткәнчә, бу ел бюджетына үзгәрешләр кертү турындагы мәсьәләне карау зарурлыгы федераль үзәктән алынган өстәмә керемнәр һәм салым түләүләре арту белән бәйле.

Бюджетның керем өлеше тулаем алганда 44 млрд. 619, 6 млн. сумга арта. Бу хакта республиканың финанслар министры урынбасары Алексей Шишкин сөйләде.  "Хәл начар якка үзгәрмәде, - дип басым ясады ул, - бүген бюджетның төгәлләштерелгән параметрларын расларга һәм тиешле финанслауны башларга кирәк".

 Республика бюджетының 2021 елның 9 аенда факттагы үтәлеше нәтиҗәләре буенча Татарстан Республикасы бюджетының салым һәм салым булмаган керемнәре 28 500,9 млн. сумга артырга тәкъдим ителә.

 Табышка салым буенча план билгеләнешен 23 907,8 млн. сумга арттырырга тәкъдим ителә. Керемнәрнең артуы нефть бәясе һәм доллар курсы үзгәрүгә бәйле рәвештә нефть чыгаручы компанияләрдән салым керемнәренең артуы белән бәйле.

Физик затларның керемнәре нәтиҗәсендә дә республика казнасының тулылануы көтелә - бу 10 053, 7 млн. сум.

Факттагы кертемнәр динамикасыннан чыгып, оешмалар мөлкәтенә салым буенча план билгеләнешен 2 845,3 млн. сумга арттырырга тәкъдим ителә. Транспорт салымы планын 543,5 млн. сумга җиткерергә тәкъдим ителә, бу салым салу базасы арту белән бәйле.

Һөнәри керемгә салым планы, 2021 елның 9 аена салым керемнәре динамикасын исәпкә алып, 381,6 млн. сумга арттырырга тәкъдим ителә.

«Кире кайтарылмый торган керемнәр» бүлеген федераль бюджеттан бюджетара трансфертлар һәм башка керемнәр исәбеннән 16 млрд. 118,7 млн. сум күләмендә арттыру тәкъдим ителә.

Керем белән беррәттән, үзгәрешләр бюджетның чыгым өлешенә дә кертеләчәк. Чыгымнарны 42 147,7 млн. сумга арттырырга тәкъдим ителә. Акчалар башлыча социаль өлкәне финанслауга (сәламәтлек саклауга, мәгарифкә, мәдәнияткә), юллар төзүгә һәм реконструкцияләүгә һ.б. юнәлдереләчәк.

Нәтиҗәдә бюджетның бурыч йөкләнеше дә кимиячәк. 2021 елда бюджет кытлыгы 2 млрд. 471,9 млн. сумга кими. Кертелгән үзгәрешләрне исәпкә алып, профиль комитеты бюджетның түбәндәге параметрларын расларга тәкъдим итә:

- 2021 елга керемнәр буенча 319 256,3 млн. сум, чыгымнар буенча - 323 816,0 млн. сум, дефицит 2 471,9 млн. сумга кими һәм 4 559,7 млн. сум тәшкил итәчәк;

- 2022 елга керемнәр буенча 281 465,6 млн. сум, чыгымнар буенча - 287 525,8 млн. сум, дефицит үзгәрми һәм 6 060,2 млн. сум тәшкил итәчәк;

- 2023 елга керемнәр буенча 283 784,9 млн. сум, чыгымнар буенча - 289 965,4 млн. сум, дефицит үзгәрми һәм 6 180,5 млн. сум тәшкил итәчәк.

Бюджет кытлыгы финанслау чыганаклары белән тәэмин ителгән.

«2021 елга, 2022 һәм 2023 еллар план чорына Татарстан Республикасы бюджеты турында» Татарстан Республикасы Законына үзгәрешләр кертү турында» Татарстан Республикасы законы проектын карап һәм тикшереп, Комитет бертавыштан бюджет проектын хуплады. Бюджет турындагы закон проектын Татарстан парламентарийлары Дәүләт Советы сессиясендә беренче укылышта якындагы дүшәмбедә караячак.

Моннан тыш, парламентарий комитеты утырышында 2021 елга һәм 2022 һәм 2023 елларның планлы чорына Территориаль мәҗбүри медицина иминияте фонды бюджеты турында республика законына үзгәрешләр кертү хакында закон проектын карадылар. Бу нисбәттән фонд директоры Алсу Мифтахова чыгыш ясады.  2021 елга Федераль мәҗбүри медицина иминияте фонды бюджетының керем өлеше 2 млрд. 766,6 млн. сумга арттырыла.

Фонд бюджетының чыгым өлеше 3 млрд. 547,2 млн. сумга арта.

Кертелә торган үзгәрешләрне исәпкә алып, 2021 елга Фондның керемнәре 62 млрд. 229,2 млн. сум тәшкил итәчәк, чыгымнар - 63 млрд. 036,9 млн. сум. Бюджет кытлыгын финанслау чыганагы Фонд счетындагы акчаларның калган өлешен тәшкил итә.