Бүген ТР Фәннәр Академиясендә Мәгариф, мәдәният, фән һәм милли мәсьәләләр комитеты каршындагы Экспертлар советының күчмә утырышы узды, анда республикада Россиянең фәнни-технологик үсеше стратегиясен гамәлгә ашыру мәсьәләләре каралды. Совет утырышында профильле комитет рәисе Айрат Зарипов, ТР Цифрлы үсешкә ярдәм итү ассоциациясе рәисе Рифкать Миңнеханов, ТР Рәисе ярдәмчесе Альберт Гыйльметдинов, Дәүләт Советы депутатлары, министрлыклар, ведомстволар, сәнәгать предприятиеләре һәм фәнни җәмәгатьчелек вәкилләре катнашты.

Утырышны ачып, Эксперт советы рәисе Роза Әхмәдиева билгеләп үткәнчә, хәзерге вакытта Татарстан фәнни-технологик үсеш дәрәҗәсе буенча Россиянең алдынгы ун төбәге арасына керә. "Республика стратегик академик лидерлыкның "Приоритет 2030" федераль программасын гамәлгә ашыруда актив катнаша, - диде ул. - Безнең максат - республика университетларының 2030 елга кадәрге чорга Россия Федерациясенең илкүләм үсешенә өлеш кертүен тәэмин итү, университетларның һәм фәнни оешмаларның фәнни-белем бирү потенциалын арттыруга ярдәм итү, шуның белән югары белем бирү оешмаларының илнең социаль-икътисади үсешендә катнашуын тәэмин итү".

Роза Әхмәдиева сүзләренчә, Татарстанда галимнәр, тикшеренүчеләр, студентларның инновацион эшчәнлектәге потенциалын тормышка ашыру өчен зур мөмкинлекләр бар. "Приоритет 2030" программасында катнашу өчен республиканың 4 югары уку йорты сайланды, студентлар стартапларының федераль конкурсында җиңүчеләре арасында Татарстан лидер булып тора.

  ТР Цифрлы үсешкә ярдәм итү ассоциациясе рәисе Рифкать Миңнеханов үз чыгышында республиканың фәнни-технологик үсеше стратегиясен гамәлгә ашыру турында сөйләде. Россия төбәкләренең инновацион үсеше рейтингында Татарстанның лаеклы бишенче урын алуын билгеләп, ул югары уку йортлары, фәнни-тикшеренү үзәкләре һәм сәнәгать предприятиеләре җитәкчеләрен инновацион эшчәнлекне киңәйтү белән активрак шөгыльләнергә чакырды. Рейтингның күп кенә күрсәткечләре, шул исәптән фәнни-техник үсеш өчен хокукый нигезләр һәм инфраструктура саны, фундаменталь тикшеренүләр белән шөгыльләнүче студентларның чагыштырма күплеге, тикшеренүләр һәм эшләнмәләрне финанслау белән тәэмин ителеш буенча Татарстан башка төбәкләрдән аерылып тора.

Утырышта катнашкан ТР Мәгариф һәм фән министры урынбасары Андрей Поминов республикада тикшеренү оешмалары, тикшеренүчеләр һәм җитештерүчеләр, шулай ук аларның челтәрләре һәм төркемнәре эшчәнлегенең нәтиҗәлелеген арттыру мәсьәләләрен анализлады.

Татарстан Республикасы сәнәгать һәм сәүдә министры урынбасары Родион Карпов Татарстан өчен актуаль булган фәнни тикшеренүләрдә һәм инновацион-технологик эшләнмәләрдә төп көчләрне һәм ресурсларны туплау мәсьәләләрен хәл итү турында сөйләде.

 Татарстан Республикасының фәнни-технологик үсешенең төп тенденцияләре турында статистика идарәсе җитәкчесе урынбасары Ольга Краснова хәбәр итте.

Татарстан фәнни-техник мәгълүмат үзәге генераль директоры Арсен Савва Татарстанда фундаменталь тикшеренүләр һәм эшләнмәләр үсеше, киләчәккә фәнни-технологик караш формалаштыру, дөньяда табигый процессларны аңлауны тирәнәйтү турында мәгълүмат бирде.

Утырыш нәтиҗәләре буенча Эксперт советы профильле министрлыкларга һәм ведомстволарга, югары белем оешмаларына һәм фәнни-тикшеренү үзәкләренә тәкъдимнәр кабул итте.