Бүген Дәүләт Советында Экология, табигатьтән файдалану, агросәнәгать һәм азык-төлек сәясәте комитеты утырышы узды, анда парламентарийлар хайваннарның йогышлы һәм аеруча куркыныч авырулары буенча эпизоотик иминлекне тәэмин итү мәсьәләләрен карадылар, шулай ук авыл хуҗалыгы билгеләнешендәге җирләрнең уңдырышлылыгы турындагы республика законына үзгәрешләр кертү турында фикер алыштылар. Утырыш эшендә ТР Дәүләт Советы Рәисе урынбасары Марат Әхмәтов һәм ТР Рәисенең Дәүләт Советындагы тулы вәкаләтле вәкиле Тимур Нагуманов катнашты.

Хайваннарның йогышлы һәм аеруча куркыныч авырулары буенча эпизоотик иминлекне тәэмин итү һәм аларның таралу куркынычын киметү турында мәгълүматны Татарстан Республикасы Министрлар Кабинетының Баш ветеринария идарәсе башлыгы Алмаз Хисаметдинов һәм Ветеринария һәм Фитосанитария күзәтчелеге буенча федераль хезмәтнең Татарстан Республикасы идарәсе җитәкчесе Илнур Галиев җиткерде.

Хәзерге вакытта Татарстан территориясендә чик аша вируслар керү куркынычы арту фаразлана. Аерым алганда, күчмә кошларның миграциясе белән югары патогенлы кош гриппы таралу куркынычы бар. Моннан тыш, терлекчелек объектларына Африка дуңгыз чумасы һәм кош гриппы керүен кисәтү мәсьәләсе дә проблемалы булып кала бирә.

Докладчылар сүзләренә караганда, соңгы елларда дуңгызчылык һәм кошчылык предприятиеләрендә ветеринария законнары таләпләрен үтәү яхшырган. Дуңгызчылык предприятиеләренең 80% ы вирус керүдән сакланган. Шулай ук кошчылык предприятиеләрен биологик яклау дәрәҗәсе көчәйгән.

Эре мөгезле терлекләр бруцеллезы буенча вәзгыять контрольдә тотыла. Күзәтчелек органнары даими рәвештә терлекчелек объектларын тикшерә, профилактик һәм күчмә тикшерүләр үткәрә. 2024 елда 3 меңнән артык транспорт чарасы тикшерелгән, контроль астындагы продукцияне рөхсәтсез кертүнең 68 очрагы ачыкланган.

Дәүләт Советы Рәисе урынбасары Марат Әхмәтов, Экология, табигатьтән файдалану, агросәнәгать һәм азык-төлек сәясәте комитеты рәисе Азат Хамаев, профильле комитет рәисе урынбасары Нәҗип Хаҗипов чарада катнашучылар игътибарын үткәрелә торган контроль чараларның сыйфатын тәэмин итү зарурлыгына юнәлттеләр, шулай ук башка төбәкләрдән авыру терлекләрне республика территориясенә рөхсәтсез керткән өчен җаваплылыкны арттыру чаралары белән кызыксындылар.

Бүгенге  комитет утырышында авыл хуҗалыгы билгеләнешендәге җирләрнең уңдырышлылыгы турындагы республика законына үзгәрешләр кертү турындагы закон проекты каралды. Азат Хамаев билгеләп үткәнчә, закон проекты республика законнарын федераль законнарга туры китерү максатыннан эшләнгән.

Закон проекты республика законын бердәм федераль дәүләт мәгълүмат системасы эше турындагы маддәләр белән тулыландыра, шулай ук күрсәтелгән системага барлык кирәкле мәгълүматның Татарстан Республикасы Министрлар Кабинеты вәкаләт биргән республика башкарма хакимияте органы тарафыннан тапшырылачагын билгели.