Татарстанда яңа һөнәри бәйрәм - Сатып алу эшчәнлеге өлкәсе хезмәткәрләре көне булдырылды. Бәйрәм итү датасы итеп 5 апрель – контракт системасы турында закон кабул ителгән көн билгеләнде. Мондый карар бүген Дәүләт Советы утырышында кабул ителде.

Икътисад, инвестицияләр һәм эшмәкәрлек комитеты рәисе Рәгать Хөсәенов сүзләренә караганда, Татарстанда сатып алулар системасының 20 елдан артык тарихы бар. Республиканың дәүләт һәм муниципаль сатып алулары өлкәсендә меңләгән белгеч эшли: контракт идарәчеләре, контракт хезмәтләре хезмәткәрләре, экспертлар.

Рәгать Хөсәенов билгеләп үткәнчә, тармак өчен кадрлар мәсьәләсе кискен тора. 2025 ел мәгълүматлары буенча, базарның сатып алулар өлкәсендә югары квалификацияле белгечләргә гомуми ихтыяҗы 250 кешедән артып киткән.

«Төп проблема шунда ки, һөнәр җәмгыять өчен сизелми кала, яшьләр аның турында җитәрлек дәрәҗәдә хәбәрдар түгел һәм аны абруйлы карьера буларак карамый», – дип ассызыклады Рәгат Хөсәенов һәм һөнәри бәйрәм булдыру хезмәткәрләрнең социаль статусын күтәрү һәм яшь талантларны әлеге өлкәгә җәлеп итү өчен стимул булыр дип өметләнүен белдерде.