Бүген Владивостокта Махсус хәрби операция ветераннары ассоциациясенең Бөтенроссия җыеннары ачылды. Бөтен илдән махсус хәрби операциядә катнашучылар атна дәвамында Ватанны саклаучыларны тернәкләндерү, эшкә урнаштыру һәм аларның гаиләләренә ярдәм итүнең иң яхшы тәҗрибәләре белән алмашачаклар, шулай ук ветераннар хәрәкәтен үстерү буенча алдагы адымнарны билгеләячәкләр. Татарстаннан әлеге чарада Дәүләт Советы депутаты, ТР СВО ветераннары ассоциациясенең Координация советы әгъзасы Эдуард Шәрәфиев катнаша.

Махсус хәрби операция ветераннары ассоциациясенең Бөтенроссия җыеннарын ачу тантанасы Русский утравында Ерак Көнчыгыш федераль университеты мәйданчыгында узды. Чарада катнашучыларны Россия Федерациясе Герое, Россия Федерациясе Президентының иҗтимагый проектлар буенча идарәсе референты Алексей Романов сәламләде. «Без данлыклы җирдә, хәрби дан шәһәрендә торабыз. Биредә үлемнең һәм коелган канның нәрсә икәнен белгән кешеләр хезмәт иткән. Бөтен Россиядән безнең ассоциация вәкилләренең бу залга җыелуына мин бик шат, – дип басым ясады Алексей Романов. – Махсус хәрби операция ветераннарының өстенлекле бурычларының берсе – сугышчан иптәшләребезнең истәлеген мәңгеләштерү. Барыбызга да Махсус хәрби операция ветераннары ассоциациясе эшчәнлеге гасырларны узып яшәрлек итеп эшләргә кирәк. Сезнең тарихларыгызда һәм тәҗрибәгездә илебезне ярата һәм гражданнарыбызның батырлыклары белән горурлана торган буыннар үссен!».

«Бу бик әһәмиятле һәм мөһим вакыйга, ул тыныч тормышка әйләнеп кайтучы СВО ветераннарын интеграцияләү һәм социализацияләү буенча башка регионнарның эш тәҗрибәсе белән уртаклашырга мөмкинлек бирәчәк, – дип басым ясады Эдуард Шәрәфиев, журналистлар белән аралашканда, – безнең республикада ассоциация эше «Ватанны саклаучылар» фонды, Ватан сугышчылары гаиләләре комитеты, шулай ук барлык дәүләт һәм муниципаль хакимият органнары белән берлектә системалы рәвештә алып барыла. Ассоциациянең җирле бүлекчәләре эшен барлык муниципаль районнарда һәм шәһәр округларында оештыру турында карар кабул ителде. Бүгенге көндә эш 32 районда башкарылган инде, октябрь ахырына кадәр аны республиканың барлык муниципалитетларында да тәмамларга уйлыйбыз».

Эдуард Шәрәфиев билгеләп үткәнчә, Бөтенроссия җыеннары – ул, барыннан да элек, эш тәҗрибәсе белән уртаклашу өчен төбәкләрдән килгән коллегалар белән танышу, шулай ук ассоциациянең федераль җитәкчелеге белән эшлекле әңгәмә кору. «Узган җыеннарда үзем өчен бик күп файдалы мәгълүмат алдым, – диде Эдуард Шәрәфиев. – Республикага кайткач, ассоциация буенча хезмәттәшләребез белән фикер алышачакбыз һәм Татарстан җитәкчелегенә СВОда катнашучыларга һәм аларның гаилә әгъзаларына ярдәм итү буенча карарлар сыйфатында тәкъдим итәчәкбез».

СВО ветераннары ассоциациясенең Бөтенроссия җыеннары 27 сентябрьгә кадәр дәвам итәчәк. Җыен йомгаклары буенча бөтен ил буенча махсус хәрби операция ветераннары белән алга таба эшләү нигезенә ятачак тәкъдимнәр эшләнер дип көтелә.

Бөтенроссия җыеннары кысаларында махсус хәрби операциядә катнашучыларга һәм аларның гаилә әгъзаларына ярдәм итү буенча РФ Иҗтимагый палатасы комиссиясенең күчмә утырышы планлаштырылган, анда Президентның Ерак Көнчыгыш федераль округындагы Тулы вәкаләтле вәкиле аппараты, РФ Көнчыгыш үсеше министрлыгы вәкилләре һәм округның барлык 11 төбәгеннән хакимият органнары җитәкчеләре катнашачак. Шулай ук Ватанны саклаучылар истәлеген мәңгеләштерү буенча проект сессияләре дә булачак.

Программаның төп вакыйгаларының берсе – Владивосток мәгариф оешмаларында бердәм Батырлык дәресе үткәрү. Ветераннар, алар арасында Батырлык ордены кавалерлары һәм башка дәүләт бүләкләре ияләре, мәктәп укучылары, көллият студентлары һәм Ерак Көнчыгыш федераль округының патриотик клубларында катнашучылар белән очрашулар үткәрәчәк. Чаралар 17 мәйданчыкта һәм 3 меңнән артык укучы катнашында узачак.

Җыеннар ике тапкыр Россия Федерациясе Герое Михаил Гудков истәлегенә багышланган футбол, волейбол, өстәл теннисы һәм көймәләрдә йөзү буенча спорт ярышлары белән тәмамланачак.