Бүген Дәүләт Советында Бюджет, салымнар һәм финанс комитеты утырышы булды, анда парламентарийлар 2026 елга һәм 2027 һәм 2028 еллар план чорына республика бюджеты турындагы республика законына үзгәрешләр кертү турындагы закон проектын карадылар, шулай ук быелның беренче яртыеллыгында ММИ республика һәм территориаль фонды бюджеты үтәлеше нәтиҗәләре турында фикер алыштылар.

Утырышны ачып, Бюджет, салымнар һәм финанс комитеты рәисе Леонид Якунин билгеләп үткәнчә, республика бюджетына үзгәрешләрне карау мәсьәләсе инде гадәткә кергән. «Республика бюджетының керемнәрен һәм чыгымнарын күп юнәлешләр буенча арттыру яхшы традициягә әверелә бара, – дип билгеләп үтте Леонид Якунин. – Алар барысы да дәүләт программаларында һәм илкүләм проектларда чагылыш тапкан».

Республиканың финанс министры Марат Фәйзрахманов билгеләп үткәнчә, 2026 елга һәм 2027 һәм 2028 еллар план чорына республика бюджетына үзгәрешләр кертү турындагы закон проекты республика бюджетының керем өлешен 32,6 млрд сумга арттыруны күздә тота. «8 айда республика бюджетын үтәү йомгаклары буенча салым һәм салым булмаган керемнәрне 10,7 млрд сумга арттыру тәкъдим ителә, аерым алганда, оешмалар табышына салым буенча – 25 млрд сумга, оешмалар мөлкәтенә салым буенча –1 млрд сумга, «Салым салуның автоматлаштырылган гадиләштерелгән системасы» махсус салым режимын куллануга бәйле рәвештә алына торган салым буенча – 1 млрд сумга һәм салым булмаган керемнәр буенча – 3,7 млрд сумга», – дип белдерде Марат Фәйзрахманов.

«Кире кайтарылмый торган кертемнәр» бүлеген федераль бюджеттан бюджетара трансфертлар һәм башка кертемнәр хисабына 1,9 млрд сумга арттырырга тәкъдим ителә.

Республика бюджетының чыгым өлеше агымдагы елда, министр билгеләп үткәнчә, 21,7 млрд сумга арта. Үзгәрешләр коммуналь техниканы яңартуга, илкүләм һәм федераль проектларда каралган чараларны гамәлгә ашыру чыгымнарын финанслауга, социаль әһәмиятле, фәнни, мәдәни һәм спорт чараларын, региональ проектларны уздыру чыгымнарына, социаль ярдәм чаралары күрсәтүгә, дефицит булган тар белгечлек табибларына бер мәртәбә түләү чыгымнарына, авыл хуҗалыгы товарлары җитештерүчеләргә субсидияләр энергия куәте көчле булган тракторлар сатып алуга бәйле чыгымнар өлешен каплауга, үсешкә юнәлдерелгән чараларны, социаль-мәдәни өлкә объектларын капиталь ремонтлауга һәм төзү, юл эшләре программасын финанслауга һәм башкаларга кагыла.

Күрсәтелгән тәкъдимнәр буенча 2026 елга Татарстан Республикасы бюджетының гомуми күләме керемнәр буенча 633,4 млрд сум, чыгымнар буенча 653,4 млрд сум булыр дип фаразлана, дефицит 20 млрд сум тәшкил итәчәк.

Агымдагы елның беренче яртыеллыгында республика бюджеты үтәлешенә килгәндә, финанслар министры Марат Фәйзрахманов билгеләп үткәнчә, республиканың берләштерелгән бюджетына 308 млрд сум күләмендә салым һәм салым булмаган керемнәр тупланган, республика бюджетына – 259 млрд сум. Республиканың берләштерелгән бюджетының иң эре керем чыганагы булып физик затлар кеременә салым санала, агымдагы елның алты аенда берләштерелгән бюджетка 102 млрд сум, республика бюджетына 71 млрд сум күчерелгән. Моннан тыш, керем өлешенең мөһим чыганагы дип министр табышка һәм милеккә салымны атады.

Гадәттәгечә республика бюджеты үтәлеше турындагы хисапны тикшерү белән бер үк вакытта Татарстан Республикасы Территориаль мәҗбүри медицина иминияте фонды бюджеты үтәлеше турындагы хисап та карала. Фонд директоры Алсу Мифтахова сөйләгәнчә, беренче яртыеллыкта Территориаль ММИ бюджеты үтәлеше керемнәр буенча 51 млрд сум яисә хисап чоры планының 100,5% ын тәшкил иткән. «Узган елның шул ук чоры белән чагыштырганда керемнәр 9% ка арткан», – дип ачыклык кертте ул.

Бүгенге утырышта 2027 елга республикада хезмәт базарының төбәк үзенчәлекләрен чагылдыра торган коэффициентны билгеләү турындагы закон проекты каралды. 2027 елның 1 гыйнварыннан физик затларда хезмәт эшчәнлеген гамәлгә ашыручы барлык чит ил гражданнары өчен физик затлар керемнәренә салым (НДФЛ) буенча ай саен 1700 сум күләмендә фиксацияләнгән аванс түләүләре билгеләнгән. Патент нигезендә оешмаларда яки индивидуаль эшкуарларда эшләүче чит ил гражданнары өчен НДФЛ буенча фиксацияләнгән аванс түләве күләме аена 1200 сум күләмендә сакланып калган.

Күрсәтелгән аванс түләүләре коэффициент-дефляторга, шулай ук региональ хезмәт базары үзенчәлекләреннән чыгып, Россия Федерациясе субъекты законы белән билгеләнгән региональ коэффициентка индексацияләнергә тиеш. Закон проекты 2027 елга республикада төбәк коэффициентын 2,77 күләмендә билгеләүне күздә тота, 2026 елда коэффициент 2,55 тәшкил итте. Коэффициентны билгеләү 2027 елга чит ил хезмәткәрләренең уртача айлык фаразланган хезмәт хакыннан физик затлар керемнәренә салымның 13 проценты нисбәтендә, шулай ук коэффициент-дефлятор фаразын исәпкә алып, салым буенча фиксацияләнгән аванс түләве күләмендә нигезләнгән.

Үзгәрешләргә караганда, 2027 елда оешмаларда һәм шәхси эшмәкәрләрдә эшләүче чит ил гражданнары өчен патент бәясе ай саен 9446 сум, физик затларда хезмәт эшчәнлеген гамәлгә ашыручы чит ил гражданнары өчен – 13382 сум тәшкил итәчәк.

Утырышта түләүсез мәктәпкәчә белем алуга хокукларны гамәлгә ашыруның дәүләт гарантияләрен финанс белән тәэмин итү нормативларын раслау турындагы закон проектлары да каралды, алар 10% ка арта, шулай ук башлангыч, төп, урта һәм өстәмә белем алуга 10% ка арткан.

Утырыш кысаларында парламентарийлар шулай ук республика Хисап палатасы аудиторы вазыйфасына Илдар Минһаҗевны билгеләү мәсьәләсен дә карадылар. Депутатлар Илдар Минһаҗев кандидатурасын бертавыштан хупладылар, аның финанс өлкәсендә һәм юл эшчәнлегендә югары компетентлы булуын билгеләп үттеләр.

Комитет тәкъдиме буенча тиешле мәсьәләне Дәүләт Советы утырышының көн тәртибенә кертү планлаштырыла.

Утырыш азагында парламентарийлар комитетның IV кварталга эш планын карадылар һәм расладылар.