Бүген Казанда, «Ливадия-Татарстан» шифаханәсе территориясендә, «Россия көче» Бөтенроссия спорт марафонын гамәлгә ашыру кысаларында комплекс хезмәткәрләре һәм ял итүчеләр өчен спорт  һәм сулыш алу гимнастикасы узды. Марафонда катнашучыларны Дәүләт Советының Социаль сәясәт комитеты рәисе Светлана Захарова сәламләде. 

1 июньнән Бөтен ил буенча «Бердәм Россия» партиясе инициативасы белән «Россия көче» Бөтенроссия спорт марафоны старт алды. Бүген бу акциягә Татарстан Республикасы профсоюзларының биш шифаханәсе кушылды. Коллектив зарядка «Ливадия-Татарстан» шифаханә комплексында да үтте. Ярты сәгать дәвамында ЛФК буенча инструкторлар сәламәтләндерү күнегүләре комплексын күрсәтәләр. 

ТР Дәүләт Советы депутаты, «Бердәм Россия» партиясе тарафдарларының Татарстан төбәк советы рәисе Светлана Захарова, катнашучыларны сәламләп, марафонның республикада популярлашуын билгеләп үтте. "Бу проектны республикабызда Балаларны яклау көнендә ТР Рәисе Рөстәм Миңнеханов башлап җибәрде. Бүгенге көндә муниципаль берәмлекләрнең саны арта бара. Бүген, мәсәлән, акцияне безнең профсоюз шифаханәләре хуплады, – дип билгеләп үтте ул. – Бу проектның максаты – халкыбызны сәламәт яшәү рәвешенә мөмкин кадәр күбрәк җәлеп итү. Спорт һәм сулыш гимнастикасы гына түгел, йога дәресләре, сәламәт туклану буенча мастер-класслар да үткәрү планлаштырыла».

Санаторий хезмәткәрләренә һәм ял итүчеләргә ТР Дәүләт Советы депутаты, ТР Профсоюзлар федерациясе рәисе Елена Кузьмичева мөрәҗәгать итте. "Марафонның төп максаты – халык арасында сәламәт яшәү рәвешен һәм физик активлыкны популярлаштыру, нәкъ менә шуңа күрә республика профсоюзлар федерациясе шифаханә-курорт учреждениеләре территориясендә марафоннар уздыру тәкъдимен бик  рәхәтләнеп кабул итте», – диде Елена Кузьмичева.

Проект халыкның барлык төркемнәре өчен бушлай спорт чаралары үткәрүне күздә тота. Барлык чаралар да алдан sila-rossii.er.ru федераль сайтта игълан ителә,  марафонга онлайн да кушылырга мөмкин. Моның өчен сайтка керергә кирәк, анда танылган спортчылар һәм тренерларның мастер-класслары ачык урнаштырылган.

Марафонның оештыру комитетына танылган спортчылар Александр Карелин, Николай Валуев, Светлана Журова, Ирина Роднина, Владислав Третьяк, Вячеслав Фетисов һ. б. керә.

Марафон 12 августка кадәр дәвам итәчәк һәм Физкультурачылар көнендә тәмамланачак.