Алтынчы чакырылыш Дәүләт Советының алтынчы – агымдагы елдагы соңгы утырышы 24 декабрьдә үткәреләчәк. Бүген парламент Президиумы утырышында шундый карар кабул ителде. Парламентчылар анда 23 мәсьәләне, шул исәптән 12 республика законы проектын карап тикшерергә ниятли.

Дәүләт Советы Секретаре Лилия Маврина билгеләп үткәнчә, 12 республика законы проекты арасыннан унысы – беренче, икесе  икенче утырышта каралачак. Әйтик, Менделеевск һәм Тукай районнары, шулай ук Чаллы шәһәре территорияләре чикләрен билгеләү турында республика законнарына үзгәрешләр кертү, хайваннар белән эш итү өлкәсендә аерым мәсьәләләрне җайга салу хакында закон проектлары беренче укылышка әзерләнгән. Татарстан Сайлау һәм Экология кодексларына үзгәрешләр кертү турында закон проектлары икенче укылышта тикшереләчәк. Утырышның көн тәртибенә шулай ук үсмерләргә тәмәке булмаган никотинлы продукция һәм электрон тәмәке сатуны тыю турында закон проекты  да кертелгән.

Президиум утырышында Дәүләт Советы депутатларының социаль юнәлешле оешмаларның попечительлек советлары эшчәнлегендә канашуы турында карар кабул ителде. Дәүләт Советы рәисе урынбасары Татьяна Ларионова билгеләп үткәнчә, парламент депутатларын социаль учреждениеләргә кайгыртучылар итеп кую тәҗрибәсе инде күптән үзен аклады. Депутатлар өлкәннәр һәм инвалидлар өчен интернат-йортлар, балалар йортларының попечительләр советлары эшендә катнашып килә. Яңа чакырылышта да шулай булачак.