Бүген Казан Ратушасында 25 чит илдән һәм Россиянең 15 төбәгеннән 40 милли мәдәният вәкиле катнашында «Россия-Көнчыгыш» Халыкара милли мәдәният фестивален ачу тантанасы узды. Фестивальдә катнашучыларны һәм кунакларны Татарстан Республикасы Дәүләт Советы Рәисе, Татарстан Халыклары ассамблеясе рәисе Фәрит Мөхәммәтшин Татарстан Республикасы Рәисе, Хөкүмәте һәм республика парламенты исеменнән сәламләде.

Тантана танылган җәмгыять һәм сәясәт эшлеклесе, Татарстанның халык шагыйре Разил Вәлиев истәлегенә бер минутлык тынлык белән ачылды.

"Казан кабат уртак тарихка, телгә, мәдәнияткә һәм дингә ия булган Азия һәм Якын Көнчыгыш халыкларын җәлеп итү үзәгенә әверелде, - дип басым ясады Фәрит Мөхәммәтшин, - фестивальнең күпмилләтле республикабызда узуы безнең өчен бик кыйммәтле, шуңа күрә без халыкларыбыз арасында дуслыкны тагын да ныгытабыз".

Парламент башлыгы Рәшит Ваһапов исемендәге Татар мәдәнияте иҗтимагый фондына фестивальне оештырганнары һәм милләтара мәдәни элемтәләрне ныгыту буенча зур эш башкарганнары өчен рәхмәт белдерде. "Мондый фестивальләр күпмилләтле халкыбызны якынайта, – диде Фәрит Мөхәммәтшин, – фестивальдә катнашучылар туган илләрендә безнең республикада 175 милләт вәкилләре яшәгән тынычлык һәм татулык атмосферасы турында тәэсирләре белән уртаклашырлар дип уйлыйм".

Парламент башлыгы икенче Халыкара фестивальнең югары иҗади һәм оештыру дәрәҗәсендә узачагына, дус дәүләтләрнең якын, тугандаш халыкларын тоташтыручы ныклы «мәдәни күпер» булачагына ышаныч белдерде.  "Бу фестиваль кебек якты вакыйга аркасында, Татарстанда милли мәдәниятләр һәм традицияләр елында без традицион рухи кыйммәтләрне, бай тарихи һәм мәдәни мирасны саклап, сәнгать аша тынычлыкка һәм үзара аңлашуга юлны тагын бер кат күрәчәкбез", – дип ассызыклады ФәритМөхәммәтшин.

Кунакларны һәм фестивальдә катнашучыларны РФ Тышкы эшләр министры Сергей Лавров һәм РФ мәдәният министры Ольга Любимова сәламләде.

"Шәрык базары – бик матур һәм яхшы форум, – дип ассызыклады танылган иҗтимагый һәм сәяси эшлекле, философия фәннәре докторы, профессор, Россия табигый фәннәр академиясенең мөстәкыйль әгъзасы, культурология, тарих һәм милли мөнәсәбәтләр өлкәсендә белгеч Рамазан Абдулатипов, фестиваль ачылышында чыгыш ясаганда, - Татарстанда бик уңайлы мәдәни мохит булдырылган, шуңа күрә биредә нинди генә эшкә тотынмасалар да, сезнең кулларда барысы да чәчәк ата һәм тормышка аша".

"Шәрык базары" проекты быел икенче тапкыр Татарстан Республикасы Рәисе Рөстәм Миңнеханов, Россия Тышкы эшләр министрлыгы һәм Мәдәни инициативалар президент фонды ярдәме белән үткәрелә. Фестивальдә Кытай, Һиндстан,Берләшкән гарәп әмирлекләре, Иран, Мисыр, Сүрия, Төркия, Әзербайҗан, Казахстан, Үзбәкстан, Төркмәнстан, Таҗикстан, шулай ук Россия төбәкләреннән, шул исәптән Алтай, Адыгея, Башкортостан, Дагестан, Ингушетия, Кабарда-Балкария һәм башкалардан артистлар катнаша.

Фестивальгә зур кызыксыну белән бәйле рәвештә, оештыручылар аны җиде көн дәвамында, 20-27 октябрьдә уздыруны күздә тоталар. Фестиваль  "Пирамида" мәдәни-күңел ачу комплексында гала-концерт белән тәмамланачак.

Фестиваль ачылышында шулай ук РФ ФС Дәүләт Думасы депутаты Илдар Гыйльметдинов, республика Премьер-министры урынбасары Васил Шәйхразиев, ТР мәдәният министры Ирада Әюпова катнашты.