Бүген Казанда күренекле җәмәгать эшлеклесе, полиция генералы, Татарстан Республикасы буенча Эчке эшләр министры урынбасары (1993-2009 елларда), дүртенче һәм бишенче чакырылыш Дәүләт Советы депутаты (2009-2019 елларда) Рафил Габтрафик улы Ногманов белән хушлаштылар. Пушкин исемендәге Мәдәният үзәгендә узган хушлашу мәрәсимендә Дәүләт Советы Рәисе урынбасары Юрий Камалтынов, республика Премьер-министры урынбасары Васил Шәйхразиев, парламент депутатлары, Эчке эшләр министрлыгы ветераннары, җәмәгатьчелек вәкилләре катнашты. 

Рафил Ногмановның гаиләсенә, туганнарына һәм якыннарына Дәүләт Советы Рәисе Фәрит Мөхәммәтшин, республика парламенты депутатлары исеменнән һәм шәхсән Дәүләт Советы Рәисе урынбасары Юрий Камалтынов кайгы уртаклашты. "Ул искиткеч кеше, депутат, профессиональ полиция хезмәткәре иде, - дип билгеләп үтте Юрий Камалтынов, - Дәүләт Советында Законлылык һәм хокук тәртибе комитеты рәисе урынбасары булып эшләгәндә Рафил Габтрафикович республиканың административ кодексына, шулай ук җәмәгать тәртибен саклау өлкәсендәге законнарга үзгәрешләр кертү буенча берничә инициативаны эшләүче булды. Моннан тыш, депутат буларак ул балигъ булмаганнар белән эшне оештыру мәсьәләләре белән актив шөгыльләнде".

Татарстан Республикасы Президенты Рөстәм Миңнеханов кайгы уртаклашу сүзләрен җиткергән. Аның исеменнән Рафил Габтрафиковичның хатыны, туганнары һәм якыннары адресына җибәрелгән телеграмманы республика Премьер-министры урынбасары Васил Шәйхразиев ирештерде. "Рафил Ногманов – хокук саклау системасының танылган профессионалы, үз гомеренең күп елларын авыр хезмәткә багышлаган, - диелә телеграммада. - Ул Татарстан Эчке эшләр органнарының эшен ныгытуга һәм камилләштерүгә, ватандашларның тынычлыгын һәм иминлеген тәэмин итүгә зур өлеш кертте. Аның актив парламент һәм иҗтимагый эшчәнлеге ватанга хезмәт итүгә тугрылык һәм законнар өстенлеге принциплары, зур эшчәнлек һәм югары гражданлык үрнәге булып тора. Ул үзен якыннан белгән һәркемнең хәтерендә шундый эшлекле, битараф булмаган һәм максатчан булып калачак".

"Легендар шәхес, туган республикасына һәм бөек Россиягә тугры хезмәт иткән генерал Рафил Ногманов китте, – дип билгеләп үтте Васил Шәйхразиев, - аның өчен шәхси вакыт чикләре юк иде, ул һәрвакыт хезмәттә иде".

ТР буенча Эчке эшләр министры Артем Хохорин Рафил Ногмановны укытучы һәм легендар җитәкче дип атады. Рафил Габтрафикович җәмәгать иминлеге милициясен оештыручыларның берсе була, озак вакыт бу юнәлешне күзәтә, иң җитди бурычларны хәл итә, хокук бозуларны профилактикалау өлкәсендә күп эшләр башкара. Генерал беркайчан да авырлыклардан курыкмаган. "Бер яктан, таләпчән һәм катгый, шул ук вакытта аның белән эшләгән кешеләр аның һәрвакыт ярдәмгә килергә әзер булган намуслы кеше икәнен беләләр", – дип истәлекләре белән уртаклашты Артем Хохорин.

Рафил Ногмановны Арча зиратында җирләделәр.