Бүген Н.И. Лобачевский исемендәге фәнни китапханәдә Мәгариф, мәдәният, фән һәм милли мәсьәләләр комитетының һәм комитет каршындагы экспертлар советының күчмә утырышы булды. Чарада Казан (Идел буе) федераль университетын үстерү программасын гамәлгә ашыру турында мәгълүмат тәкъдим ителде. Моннан тыш музейлар һәм музей эше турында республика законына үзгәрешләр кертү турында республика закон проекты һәм комитет эше турында хисап (2019 елның сентябреннән хәзерге вакытка кадәр) каралды.

Гадәттәгечә, ел башында Дәүләт Советының профиль комитетына «Өстенлек-2030» стратегик академик лидерлык программасы кысаларында 2021 - 2030 елларга Казан федераль университетын үстерү программасын гамәлгә ашыру һәм ел йомгаклары буенча университетның Татарстан Республикасының социаль-икътисадый үсешенә керткән өлеше турында хисап бирелә. Комитет утырышында әлеге мәгълүматны университетның икътисадый һәм стратегик үсеш мәсьәләләре буенча проректор Марат Сафиуллин тәкъдим итте. "Тышкы кыенлыкларга карамастан, университет куелган планнарны тулысынча үти һәм үзенең максатчан моделенә динамик рәвештә үсә, – дип ассызыклады Марат Сафиуллин. – Хәзерге вакытта университет дөньяда 396 позициядә, ил буенча 5 урында тора. Үсеш программасын гамәлгә ашыру башлану белән чагыштырганда КФУ Россиянең  башка университетлары арасында биш позициягә күтәрелә алды. КФУ тотрыклы рәвештә нефть-газ эше юнәлеше буенча дөньяның иң яхшы 100 югары уку йорты арасына керә, бүген без дөньяда 40 нчы һәм  илдә 2 нче урында торабыз".

Казан (Идел буе) федераль университетын үстерү программасын гамәлгә ашыру турында тулырак хисап Дәүләт Советының чираттагы утырышында тәкъдим ителәчәк. 

Бүген комитет утырышында музейлар һәм музей эше турында республика законына  үзгәрешләр кертү турында закон проекты каралды. Закон проекты республика законнарын федераль законнарга туры китерү максатларында әзерләнгән. Документ, аерым алганда, Россия Федерациясе Музей фондының дәүләт өлеше составына кертелгән һәм дәүләт милке булган музей әйберләрен һәм музей тупланмаларын оешмаларга түләүсез файдалануга тапшыру мөмкинлеге дини оешмаларга да кагыла дип төгәлләштерелә.

Музей җыелмасының сакланышын һәм бөтенлеген тәэмин итү максатларында музей тарафыннан музей әйберләренең һәм музей тупланмаларының фактта булуын һәм физик сакланышын тикшерүне, шулай ук Россия Музей фондының дәүләт каталогына кертелгән музей әйберләре һәм музей тупланмалары турындагы белешмәләрнең исәпкә алу документларындагы белешмәләргә туры килүен тикшерүне гамәлгә ашыру кирәклеге күздә тотыла.

Закон проекты депутатлар тарафыннан хупланды һәм Дәүләт Советы утырышында карау өчен тәкъдим ителде.

Комитет утырышында шулай ук 2019 елның сентябреннән 2024 елның февраленә кадәрге чорда профильле комитет эше турында хисап каралды. Әлеге мәсьәлә буенча мәгълүматны Мәгариф, мәдәният, фән һәм милли мәсьәләләр комитеты рәисе Айрат Зарипов тәкъдим итте. Хисап чорында комитет тарафыннан 52 утырыш үткәрелгән, 162 мәсьәлә каралган, шуларның 47се контроль. 15 күчмә утырыш үткәрелгән, шуларның 4 утырышы Россия Федерациясенең башка субъектлары парламентлары комитетлары белән берлектә узган. «Күчмә утырышлар кысаларында без Башкортстан, Чувашия һәм Марий-Эл коллегаларыбыз белән актуаль мәсьәләләр буенча фикер алыша алдык, – дип билгеләп үтте Айрат Зарипов, – Комитет эшендә Татарстан Республикасының 46 закон проекты бар иде, 25 закон проекты безнең депутатлар тарафыннан эшләнде һәм кертелде».