Бүген Дәүләт Советы Рәисе, «Бердәм Россия» партиясенең Татарстан төбәк бүлеге Секретаре Фәрит Мөхәммәтшин партия Рәисе Дмитрий Медведевның төбәк җәмәгать кабул итү бүлмәсендә гражданнарны кабул итте.

Республиканың Балалар волейболына ярдәм фонды башкарма директоры Руслан Насыйров Дәүләт Советы Рәисенә яшь тренерларга социаль ярдәм чараларын эшләү тәкъдиме белән мөрәҗәгать итте. "Безнең эшнең төп юнәлеше – балалар волейбол спортын үстерүгә юнәлдерелгән төрле проектлар эшләү, – диде ул, – бүген без тренер кадрлары кытлыгын күрәбез. Бездә ике олимпия резервы мәктәбе эшли – Казанда һәм Чаллыда, республика шәһәрләрендә – 34 спорт мәктәбе, аларда белгечләр өчен урыннар бар». Аның фикеренчә, урыннарда яшь тренерларга ярдәм чараларын көчәйтергә кирәк. Руслан Насыйров билгеләп үткәнчә, мондый программа республика өчен спорт резервы әзерләү мәсьәләсен хәл итүгә ярдәм итәр иде.

Фонд директорына тәкъдиме өчен рәхмәт белдереп, Фәрит Мөхәммәтшин тренерлар составын әзерләү һәм аларга ярдәм итү мәсьәләсенең актуальлеген билгеләп үтте. "Без Татарстан Волейбол Федерациясендә бу мәсьәләләр белән шөгыльләнәбез, һәм Президиум утырышларының берсендә тагын бер тапкыр аларга әйләнеп кайтырбыз дип уйлыйм,  – дип билгеләп үтте ул. – Республиканың спорт министрлыгы белән бергә эшләрбез».

Хезмәт ветераны, Казан Рериховлар җәмгыяте җитәкчесе Наилә Габделманова партиянең җәмәгать кабул итү бүлмәсенә Казан Рериховлар җәмгыятенең Татарстан халыклары Ассамблеясы белән уртак проектларын дәвам итү һәм апрель аенда Халыклар дуслыгы йортында бөтендөнья мәдәният көненә багышланган конференция уздыру тәкъдиме белән килде.

Республика агросәнәгать комплексы ветераннары Советы Рәисе урынбасары Разил Сәитов Дәүләт Советы Рәисенә Совет эшчәнлегенә һәм алар үткәрә торган иҗтимагый әһәмиятле чараларга ярдәм итүне сорап мөрәҗәгать итте. Фәрит Мөхәммәтшин мөрәҗәгатьне эшкә алды.