17-28 февраль көннәрендә республиканың барлык мәктәпләрендә Дәүләт Советы, Дәүләт Думасы, шәһәр һәм район Советлары депутатлары катнашында парламент дәресләре уза. Парламент дәресе – 2025 Татарстан Республикасында һәм Россия Федерациясендә игълан ителгән Ватанны саклаучылар елына һәм Бөек Ватан сугышында Җиңүнең 80 еллыгына багышлана. Дәреснең темасы – «Ватанга хезмәт итү – изге бурыч!».

Дәүләт Советы Рәисе урынбасары Марат Әхмәтов 18 февраль көнне Яңа Чишмә гимназиясендә парламент дәресендә катнашты. Гимназия укучылары махсус хәрби операциядә катнашучыларга күңелгә үтеп керерлек хатлар яздылар, аларның батырлыклары һәм фидакарьлекләре өчен рәхмәтләрен белдерделәр.

Укучылар алдында чыгыш ясап, Марат Әхмәтов яшьләргә патриотик тәрбия бирүнең, традицияләрне һәм кыйммәтләребезне һәм иминлегебезне яклаучы геройлар турында хәтерне саклауның мөһимлегенә басым ясады. «Үз геройларыңны истә тоту һәм хөрмәт итү — ул безнең бурыч. Аларның батырлыклары безне көчлерәк, бердәм булырга һәм безгә кадерле булганны сакларга рухландыра», –  дип  басым ясады ул.

Дәүләт Советы Рәисе урынбасары Юрий Камалтынов 19 февральдә Бөгелмә шәһәренең 6 нчы мәктәбенең 10 нчы сыйныф укучылары өчен парламент дәресендә катнашты. Дәрестә Совет халкының Бөек Ватан сугышында Җиңүгә керткән хәлиткеч өлеше һәм замандашларыбызның – махсус хәрби операциядә катнашучыларның батырлыгы турында сүз барды.

10 нчы сыйныф укучылары ХХ - ХХІ гасырларның мөһим тарихи вакыйгалары, Советлар Союзы Герое Валя Котикның, әфган сугышы герое Василий Колесникның тормышы һәм батырлыгы, Бато Дашидоржиевның Грузиянең биш көнлек сугышында күрсәткән батырлыгы турында чыгышлар әзерләгәннәр иде.

Парламент дәресенә йомгак ясап, Юрий Камалтынов киләчәк буынны Бөек Ватан сугышы геройлары, бүген илебезнең мәнфәгатьләрен һәм суверенитетын яклаучы батырлар  үрнәгендә тәрбияләүнең мөһимлеген билгеләп үтте. Ул укучыларга, илнең лаеклы гражданнары булу өчен тырышып укуларын һәм һөнәр үзләштерүләрен теләде.

Мәгариф, мәдәният, фән һәм милли мәсьәләләр комитеты рәисе Айрат Зарипов 18 февральдә Кайбыч районы Федоровка мәктәбенең югары сыйныф укучылары өчен парламент дәресендә кунакта булды. 

Айрат Зарипов укучыларга Дәүләт Советы эшчәнлеге, профильле комитетлар һәм комиссияләр, фракцияләр һәм депутат төркемнәре эше турында сөйләде.  2025 елгы парламент дәресенең патриотик юнәлешле булуын ассызыклап, депутат республикабыз һәм илебез халкының каһарманлыгына бәйле күп мисаллар китерде.

Экология, табигатьтән файдалану, агросәнәгать һәм азык-төлек сәясәте комитеты рәисе урынбасары Нәҗип Хаҗипов 18 февральдә Азнакай шәһәренең гимназиясендә һәм 1 нче урта гомуми белем бирү мәктәбендә парламент дәресләрендә катнашты. Укучылар «Ватанга хезмәт итү нәрсәне аңлата?» , «Бүгенге көн гражданнары Ватанга ничек хезмәт итә ала?» дигән сорауларга җавап эзләделәр , бу нисбәттән үз фикерләре белән уртаклаштылар, Ватан тарихындагы истәлекле даталар турындагы белемнәрне актуальләштерделәр. 

17 февраль көнне Олы Әтнә урта мәктәбендә Бюджет, салымнар һәм финанслар комитеты рәисе урынбасары Камил Нугаев катнашында Парламент дәресе үткәрелде. Депутат балаларны илебез һәм республикабыз тарихының героик сәхифәләре белән таныштырды, укучыларны яхшы укырга, мәктәп һәм район тормышында актив катнашырга чакырды.

Дәүләт Советы депутаты Эдуард Шәрәфиев Тукай районының Бәтке мәктәбендә һәм Менделеев районының Татар Чаллысы мәктәбендә парламент дәресләре үткәрде. Дәрестән соң махсус хәрби операциядә катнашкан  Дәүләт Советы депутаты мәктәп укучыларына хәрби киемнәрен, шулай ук безнең сугышчылар хәрби бурычларын үтәргә барганда үзләре белән ала торган коры паек рационының нәрсәдән торуын күрсәтте.

Дәүләт Советы депутаты Руслан Йосыпов Казанның 144нче мәктәбе укучылары өчен парламент дәресе үткәрде. Дәрес барышында депутат тарихи хәтерне саклау, укучыларның Ватаныбызның героик үткәне турындагы белемнәрен тирәнәйтү мәсьәләләренә кагылды.

Дәүләт Советы депутаты, Казан дәүләт энергетика университеты ректоры Эдвард Габдуллаҗанов Казанның 2 нче татар гимназиясендә парламент дәресендә кунакта булды. КДЭУ студентлары –эзләү отрядларында катнашучылар укучыларга эзләү экспедицияләренең әһәмияте, үткәннәр турындагы хәтерне саклауның мөһимлеге һәм илне саклаучыларга хөрмәт турында сөйләделәр.

2025 елның Ватанны саклаучылар елы дип игълан ителүенә аерым игътибар бирелде. Эдвард Габдуллаҗанов ассызыклаганча, бу мөһим ел, ул ата-бабаларыбызның батырлыкларын искә төшерә һәм барыбызны да аларның истәлегенә лаеклы булырга чакыра. Ул шулай ук быел бөтен илнең Бөек Ватан сугышында Җиңүнең 80 еллыгын билгеләп үтүе турында сөйләде.

Дәрес кысаларында укучылар әлеге мөһим вакыйга белән бәйле тарихи фактлар һәм документлар белән таныштылар. Алар совет солдатларының батырлыгы, халкыбызга төшкән авыр сынаулар, Ватаныбызның азатлыгы һәм бәйсезлеге өчен түләргә туры килгән бөек бәя турында белделәр.

Эдвард Габдуллаҗанов укучыларны геройлар истәлегенә лаеклы булырга һәм аларның батырлыклары онытылмасын өчен тырышырга чакырды.

«Ватанга хезмәт итү – изге бурыч!» дип аталган парламент дәресе 19 февраль көнне Чистай районының 4 нче мәктәбендә үтте. Чарада Чистай муниципаль районы депутаты, «Чистай – фронтка» волонтерлык хәрәкәте җитәкчесе Чулпан Сөләйманова, хәрби хәрәкәтләрдә һәм махсус операциядә катнашучылар катнашты.

Дәрес барышында укучыларга Ватанга хезмәт итү үрнәкләре, МХОда катнашучы якташ солдатлар, волонтерлык эшләре турында сөйләделәр.

Чулпан Сөләйманова чистайлыларның иҗтимагый чараларда, волонтерлык проектларында катнашуы, ярдәмгә мохтаҗ кешеләргә хәйрия ярдәменең кыйммәте һәм әһәмияте турында сөйләде.

Дәрес барышында сугыш хәрәкәтләрендә катнашучы мәктәп укытучысы Дмитрий Алексеевич Плотников белән аралашу өчен Луганск өлкәсе белән телекүпер оештырылды.

Парламент дәресе – Дәүләт Советының, республиканың Мәгариф һәм фән министрлыгының һәм Мәгарифне үстерү институтының укучыларның сәяси-хокукый культурасын һәм актив гражданлык позициясен формалаштыруга ярдәм итә торган уртак проекты. Быел Татарстанда парламент дәресе инде унҗиденче тапкыр оештырыла.