Бүген Дәүләт Советында Социаль сәясәт комитеты рәисе Алексей Созинов Запорожье өлкәсе Закон чыгару Җыелышының Социаль сәясәт комитеты рәисе урынбасары Владислав Степанов һәм Оборона, хокук саклау органнары һәм гадәттән тыш хәлләр комитеты рәисе урынбасары Сергей Юрченко белән очрашты. Депутатлар махсус хәрби операция сугышчыларына һәм аларның гаилә әгъзаларына ярдәм итү, гуманитар ярдәм оештыру, шулай ук Дәүләт Советы депутатлары эшчәнлегенең хокукый һәм оештыру нигезләре турында фикер алыштылар.

Исегезгә төшерәбез, яңа регионнарның закон чыгару органнары вәкилләре Татарстанга Донецк һәм Луганск халык республикалары, Запорожье һәм Херсон өлкәләре, шулай ук Кырым Республикасы хезмәткәрләре өчен белем бирү программасы кысаларында территорияләрне үстерү өлкәсендә республикабызның иң яхшы тәҗрибәләрен өйрәнү өчен килделәр.

 "Безгә, Россиянең яңа төбәкләренә, Татарстан тәҗрибәсе бик файдалы һәм мөһим, – дип билгеләп үтте Сергей Юрченко, – мәсәлән, безгә Дәүләт Советының парламент комитетларында эшнең ничек алып барылуы кызыклы. Мин урыннарда һәр депутат белән аралашу мөмкинлеге булуына рәхмәтлемен, моннан тыш, безнең аппарат хезмәткәрләре һәм Татарстан парламентындагы коллегалар арасында актив хезмәттәшлек алып барыла. Мине, Оборона комитеты рәисе урынбасары буларак, СВО белән бәйле мәсьәләләр борчый. Республика Рәисе тарафыннан хакимият органнары белән, шул исәптән муниципаль районнарда, төгәл төзелгән эшне аеруча билгеләп үтәсе килә".

Сергей Юрченко шулай ук электрон документ әйләнеше системасын гамәлгә кертү буенча Татарстан тәҗрибәсе кызыклы булуын ассызыклады. "Татарстан Дәүләт Советына визит барышында мин электрон документлар әйләнеше системасы белән таныштым. Бу миңа бик тәэсир итте, чөнки сез инде кәгазь документлар белән эшләмисез.  Бу дөрес һәм бик кирәкле. Әйе, бездә хәзер Запорожье өлкәсендә интернет белән проблемалар күзәтелә, шуңа да карамастан, бу бик перспективалы, һәм без моны практика итеп алырбыз".

Сәфәренә йомгак ясап, Сергей Юрченко Татарстанга белем бирү программасын оештырган өчен рәхмәт белдерде. "Республика җитәкчелеге, Дәүләт Советы, ВШГМУ безнең белем бирү программасын оештыруга бик сыйфатлы һәм профессиональ яктан якын килделәр, – дип билгеләп үтте Сергей Юрченко. - Чараны оештыручыларга зур рәхмәт».