Бүген Идел буе закон чыгаручылары республиканың мәдәни потенциалы белән таныштылар, Казан Кремлендә, Богородицкий монастыренда, Галиәсгар Камал исемендәге Татар дәүләт академия театрында, шулай ук Иске Татар бистәсендә булдылар. Исегезгә төшерәбез, бу көннәрдә Казанда Идел буе федераль округы Закон чыгаручылар советының 78 нче утырышы кысаларында чаралар уза. 

Парламентарийлар туристлык инфраструктурасы объектларында очраклы гына булмады,  иртәгә Казан Ратушасында узачак Идел буе Закон чыгаручылар советы утырышының көн тәртибендәге төп мәсьәләләрнең берсе эчке туризмны үстерү мәсьәләләре буенча фикер алышу булачак. 

Казанның үзенчәлеген һәм көнчыгыш колоритын саклап калган тарихи кварталы Кабан күле ярында урнашкан. Биредә беренче биналар XVI гасыр уртасында барлыкка килә. Баштарак Татар бистәсе бер генә урам булган. Микрорайонның актив үсеше XVIII гасырда Бөек Екатерина идарә иткән елларда башлана. Идел буе закон чыгаручылары инкыйлабка кадәр яшәгән татар зыялыларының йортларын карадылар, шулай ук тарихи Әл-Мәрҗани мәчетендә булдылар. 

Бүген үк Идел буе федераль округы парламентарийлары Галиәсгар Камал исемендәге Татар дәүләт академия театрының яңа бинасында булдылар. Бу Россиянең иң борынгы милли театрларының берсе. Нәкъ менә монда 1906 елда "Сәйяр" труппасы тарафыннан татар телендә беренче спектакль куела. 

Богородица монастыренда Идел буе федераль округы субъектларының закон җыеннары рәисләре христиан изге урынын торгызуның уникаль тәҗрибәсен бәяләделәр. Кунаклар Казан соборының тарихи йөзен мөмкин кадәр төгәл итеп торгызган реставраторларның күпьеллык эш нәтиҗәләре белән таныштылар. Могҗизалы образ ел саен бөтен Россиядән меңләгән хаҗиларны җәлеп итә.