Бүген Татарстанда Советлар Союзы Герое, Ленин премиясе лауреаты, татар шагыйре Муса Җәлилнең тууына 120 ел тулуга багышланган тантаналы чаралар уза. Иртән Казанда 1 Май мәйданында Муса Җәлил һәйкәленә чәчәкләр салу тантанасы булды. Тантанада Татарстан Республикасы Рәисе Рөстәм Миңнеханов, ТР Дәүләт Киңәшчесе Минтимер Шәймиев, Дәүләт Советы Рәисе Фәрит Мөхәммәтшин, Дәүләт Советы депутатлары Марат Әхмәтов, Ркаил Зәйдуллин, Азат Хамаев, Илгиз Зәйниев, Ренат Вәлиуллин, Казан мэры Илсур Метшин, Муса Җәлилнең кызы Чулпан Җәлилова, киң җәмәгатьчелек вәкилләре катнашты.

«Бүген Россия ватанпәрвәрлек рухы, илебез лидеры, Россия Федерациясе Президенты Владимир Путин тирәсендә берләшү аеруча кирәк булган, язмышыбыз хәл ителә торган чорда яши, һәм бу җәһәттән герой-шагыйрь Муса Җәлилнең батырлыгы – безнең бүгенге күңел халәтенең идеаль чагылышы, – дип басым ясады Дәүләт Советы Рәисе урынбасары Марат Әхмәтов.  – Без – Муса Җәлил шигырьләрен укып тәрбияләнгән буын, бүгенге көнгә кадәр аның шигырьләренең һәм җырларының күңелгә үтеп керерлек юлларын күңелебездә һәм йөрәгебездә саклыйбыз. Бу хәтер барыбызны да бер зур гаиләгә берләштерә, аның исеме Россия һәм Татарстан».

Марат Әхмәтов тарихи хәтерне саклауның мөһимлеген ассызыклады. «Муса Җәлилнең тууына 120 ел тулу кебек мөһим вакыйгалар аша без ватанпәрвәрлек рухын, Ватанга мәхәббәтне, тормышка мәхәббәтне саклыйбыз һәм киләчәк буыннарга тапшырабыз», – дип саный парламент җитәкчесе урынбасары.  

 «Муса Җәлил әсәрләре әлегә кадәр актуаль,  – дип сөйләде журналистлар белән әңгәмәдә Дәүләт Советы депутаты, ТР Язучылар берлеге рәисе Ркаил Зәйдуллин. – Муса Җәлил ихлас күңелдән язды, һәм әлеге ихласлыгы белән ул безнең өчен аеруча кадерле».

Герой-шагыйрьнең тууына 120 ел тулу уңаеннан киң программа каралган. 12.00 сәгатьтә Татарстанның Милли музеенда «Төп нөсхә көне» узачак,  тантаналы шартларда музей фондларыннан «Моабит дәфтәрләре»нең оригиналы чыгарылачак, «Муса Җәлил – батырлык һәм ирек тавышы» дип аталган яңа күргәзмә буенча экскурсия узачак. Г.Кариев театрында  шагыйрьнең тууына 120 ел тулуга багышланган «Муса. Моабит» спектаклен күрсәтәчәкләр.

18.00 сәгатьтә Г.Камал исемендәге театрда  Дәүләт Советы Рәисе Фәрит Мөхәммәтшин катнашында «Җәлил укулары» Халыкара әдәби конкурсының гала-концерты узачак.

Дүшәмбе көнне, 16 февральдә, республиканың барлык мәктәпләрендә уку көне Муса Җәлил әсәрләреннән башланачак. Мөһим нәрсәләр турында сөйләшү дәресләре аның үлемсез батырлыгына багышланачак.

Республикада шулай ук Җәлил һәм аның көрәштәшләренең фаҗигале тормышы турында «Кара урман» фильмы күрсәтелде. ТР Милли электрон китапханә порталында электрон вариантта рус һәм татар телләрендә 12 җыентык тәкъдим ителгән.