Бүген Зәй районының Югары Баграж авылында уникаль реставрациядән соң Троица храмын изгеләндерделәр. Изгеләндерү йоласын Казан һәм Татарстан митрополиты Кирилл башкарды. Капиталь ремонттан соң төбәк әһәмиятендәге мәдәни мирас объектын ачу тантанасында Дәүләт Советы Рәисе урынбасары Юрий Камалтынов һәм Дәүләт Советы депутаты Иван Егоров катнашты.

Троица чиркәве – 1887-1889 елларда Алабуга сәүдәгәре Иван Стахеев, шулай ук мәхәллә кешеләре акчасына төзелгән агач архитектураның уникаль һәйкәле. Совет елларында гыйбадәтханәне япканнар, бинаны башта ашлык саклау урыны, ә аннары авыл клубы сыйфатында кулланганнар, әмма ул да вакытлар узу белән ябылган. Бина озак еллар буш торган. Ярым җимерек агач гыйбадәтханәне 2023 елда яңадан торгыза башлаганнар.

Реставрация проектын Татарстанның мәдәни мирас үзәге белгечләре эшләгән. Гыйбадәтханәнең бурасы сүтелә һәм яңадан торгызыла. Осталар тәре куелган  сигез кырлы барабанны, шулай ук манараны торгызганнар. Түбә өслеге алыштырылган, коммуникацияләр торгызылган. Интерьерларда тарихи планировка сакланган, аркалар, түшәм торгызылган, идән җәелгән. Зур күләмдә эшләр башкарылган, шуның нәтиҗәсендә чиркәүнең беренчел кыяфәте кире кайтарыла алган.

"Баграждагы Троица чиркәве – Татарстанның бик аз сакланып калган агачтан төзелгән храмнарның берсе. Аны торгызу республика, епархия, меценатлар һәм җирле халыкның уртак эше нәтиҗәсендә мөмкин булды. Гыйбадәтханә яңадан тормышка кайта һәм мәхәллә кешеләре өчен рухи үзәк булачак», – дип сөйләде мәдәни мирас объектларын саклау буенча Татарстан Республикасы Комитеты рәисе Иван Гущин.

Троица чиркәвен ачу – халык катнашында дини изге урыннарны торгызуга юнәлдерелгән «Бергәләп саклыйбыз» проектын гамәлгә ашыруның дәвамы.