Бүген Уфада Россия һәм Белоруссия төбәкләренең X форумы үз эшен тәмамлады. ТР Дәүләт Советы Рәисе Фәрит Мөхәммәтшин аның эшен югары бәяләде.

Форумның эшлекле программасы РФ Федерация Советы Рәисе Валентина Матвиенко һәм БР Милли Җыены республика советы Рәисе Наталья Кочанованың Россия Федерациясе субъектлары һәм Беларусь Республикасы төбәкләре дәүләт хакимияте органнары җитәкчеләре белән очрашуыннан башланды.

Очрашуны ачып, Валентина Матвиенко Башкортстан Республикасы җитәкчелегенә Россия һәм Белоруссия төбәкләре форумын оештыруның югары дәрәҗәдә оештырган рәхмәт белдерде. "Милли колоритлы махсус төзелгән тирмәнең бу матур залында республика халыкларының гореф - гадәтләре һәм мәдәнияте белән танышып була, – диде ул. – Нәтиҗәле эшләү өчен барлык  шартлар тудырылган. Бүгенге көндә Россия һәм Беларусь төбәкләренең үзара хезмәттәшлеге җайга салынган. Бу чит ил санкцияләре шартларында бик мөһим, чөнки импортны алмаштыру мәсьәләләре әһәмиятлерәк була бара. Шуңа күрә төбәкара килешүләр илебез икътисадларының үзара хезмәттәшлеген ныгытуга ярдәм итә. Машина төзелеше, нефть химиясе, төзелеш, транспорт, агросәнәгать өлкәсендәге уртак предприятиеләр яңа үсеш импульсы алды. Форум кысаларында узган очрашулар бу юнәлештәге барлык проблемаларны бетерүгә юнәлдерелгән".

Валентина Матвиенко Татарстан Республикасын Беларусь регионнары белән нәтиҗәле һәм уңышлы хезмәттәшлек итүче актив төбәкләрнең берсе дип атады.

БР Милли Җыелышының республика советы Рәисе Наталья Кочанова Россия һәм Белорусь төбәкләренең хезмәттәшлек перспективаларын киңәйтүгә өмет белдерде. "Ун ел эчендә форум традиционга әверелде, үзара бәйләнештә зур тәҗрибә тупланды", – диде ул. – Форумның бөтен эше безнең илләрнең бергә булуына юнәлдерелгән. Уртак программаларны төрле юнәлешләрдә тормышка ашырып, уртак проблемаларны хәл итеп, без тагын да якынаябыз. Ике илнең тотрыклы төбәкара элемтәләре икътисади мәсьәләләрне генә түгел, гуманитар мәсьәләләрне дә хәл итәргә ярдәм итә. Төбәк дәрәҗәсендә халык дипломатиясенең иң яхшы мисалларын күрергә мөмкин. Хәзерге вакытта 52 Белорус һәм 117 Россия шәһәрләре һәм районнар арасында туганлык бәйләнешләре урнаштырылган.

Әлеге очрашуда чыгыш ясаган Фәрит Мөхәммәтшин Россия һәм Белорусь төбәкләре форумын региональ диалогның уникаль мәйданчыгы дип атады. "Безнең республика традицион рәвештә форумда катнаша, һәм һәр тапкыр без хезмәттәшлекне үстерү буенча идеяләр һәм тәкъдимнәр белән кайтабыз, – дип билгеләп үтте Татарстан парламенты җитәкчесе. –  Шунысын да әйтергә кирәк, 10 ел дәвамында Беларусь Республикасы безнең төп тышкы сәүдә партнерлары санына керә. 2004 елда Татарстан Республикасы Хөкүмәте һәм Беларусь Республикасы Хөкүмәте арасында сәүдә-икътисади, фәнни-техник һәм мәдәни хезмәттәшлек турында килешү имзаланды. Хезмәттәшлекнең төп юнәлешләре даими рәвештә актуальләштерелә, һәм һәр 3 ел саен аны гамәлгә ашыру буенча чаралар планы кабул ителә".

Фәрит Мөхәммәтшин әйтүенчә, парламентара элемтәләр тагын да тыгызрак була бара. 2022 елда Татарстан Республикасы Дәүләт Советы һәм Минск өлкәсе Депутатлар советы арасында хезмәттәшлек турында килешү имзаланган. Быелгы унынчы форум барышында Татарстан Республикасының Балык Бистәсе муниципаль районы һәм Минск өлкәсенең Стародорожский районы арасында дуслык мөнәсәбәтләре урнаштыру турында килешү имзаланды. "Мондый күп дәрәҗәле партнерлык безнең хезмәттәшлекне алга таба үстерүгә ярдәм итәр дип ышанам", –  дип ассызыклады Фәрит Мөхәммәтшин.

"Татарстан белән Беларусьның үзара җәлеп итүчәнлеге безнең илләргә карата Көнбатыш санкцияләре һәм чикләүләр чаралары шартларында аеруча ачык күренә башлады, –  дип билгеләп үтте Фәрит Мөхәммәтшин. –Импорт компонентларны һәм технологияләрне алыштыру өчен җитештерүчеләрнең көчләрен берләштерергә кирәк дип саныйбыз. Белорусьтан трактор техникасы, ашлык җыю һәм азык җыю комбайны сатып алудан тыш, авыл хуҗалыгы товарлары җитештерүчеләренең алдынгы фәнни диалогы һәм селекция һәм орлыкчылык буенча бергәләп чишелешләр эзләү үсеш ала. Татарстанда Белорусь шәһәр автобуслары һәм трамвайлары үзләрен яхшы яктан күрсәттеләр. Хәзерге вакытта Белорусь трамвайлары Казан шәһәренең трамвай паркының 37 процентын, МАЗ автобуслары автобус паркының 50 процентын тәшкил итә.

Форум эшенең нәтиҗәләрен югары бәяләп, Татарстан Дәүләт Советы Рәисе Россия-Беларусь стратегик партнерлыгы һәм союздашлыгы кысаларында ике яклы хезмәттәшлекне ныгытуга ышаныч белдерде. "Очрашулар, сөйләшүләр һәм дискуссияләр нәтиҗәләре буенча форум кырларында региональ дәрәҗәдә үзара файдалы элемтәләрне киңәйтәчәкбез, инвестицион диалогны ныгытачакбыз, тугандаш халыкларның мәдәни-гуманитар хезмәттәшлеген көчәйтәчәкбез, – диде ул. – Моның өчен барлык нигезләр дә бар, белорус партнерлар бик ышанычлы, һәрьяклап үсеш алган. Татарстанда яшәүче белоруслар да безнең мөнәсәбәтләр үсешенә лаеклы өлеш кертер дип уйлыйм".

Аннары Россия һәм Белорусь төбәкләренең X форумының пленар утырышы узды, анда төбәкара хезмәттәшлеккә нәтиҗәләр ясалды һәм перспективалар билгеләнде.

Утырыш резолюциясендә Россия Федерациясе субъектларының һәм Беларусь Республикасының административ-территориаль берәмлекләренең горизонталь элемтәләрен тагын да тирәнәйтү кирәклеге, парламентара хезмәттәшлекнең әһәмияте, яңа геосәяси чынбарлыкларны исәпкә алып, төбәкара хезмәттәшлекнең әһәмияте артуы билгеләнә. РФ субъектларының дәүләт хакимияте органнарына һәм БР җирле башкарма һәм идарә органнарына, аерым алганда, үзебездә  җитештерелә торган продукциясе белән сәүдәне үстерүдә үзара хезмәттәшлекне көчәйтергә, төбәк һәм җирле дәрәҗәдәге идарәчеләрнең үзара стажировкаларын һәм командировкаларын оештырырга, төбәк һәм җирле ММЧда төбәкара элемтәләрне һәм интеграция казанышларын Союз дәүләте форматында яктыртучы даими рубрикалар алып барырга киңәш ителә.

Россия һәм Белоруссия төбәкләренең киләсе XI форумын 2024 елда Беларусь Республикасында уздыру планлаштырыла.