Бүген Дәүләт Советының  Мактаулы Рәисе Фәрит Мөхәммәтшин «Россия өчен зур Евразия партнерлыгы: өстенлекләр, элемтәләр архитектурасы, кадрлар белән тәэмин итү» секциясе утырышында доклад белән чыгыш ясады. Чара  «Россия дәүләт идарәсе һәм үсеше: кыйммәтләр, чакырулар, өстенлекләр» халыкара фәнни конференц-сессиясе кысаларында узды.

Фәрит Мөхәммәтшин билгеләп үткәнчә, Казанда «Зур Евразия партнерлыгына» багышланган сессия «Россия – Ислам дөньясы» форумының мантыйкый дәвамы булып тора. Парламентның Мактаулы Рәисе сессияне оештыручыларга һәм катнашучыларга рәхмәт белдерде, шулай ук Президент академиясе җитәкчелегенә хезмәттәшлек өчен рәхмәт белдерде.

«Татарстан Республикасы, Россиянең алдынгы субъектларының берсе буларак, өч дистә елдан артык вакыт эчендә тупланган дипломатия тәҗрибәсенә ия булып, күп кенә дәүләтләр белән партнерлык һәм үзара файдалы халыкара мөнәсәбәтләр урнаштыруда актив катнаша, аерым алганда, Ислам дөньясы һәм Зур Евразия илләре белән күп планлы хезмәттәшлекне киңәйтүдә һәм тирәнәйтүдә нәтиҗәле бәйләүче звено булып тора» , – дип билгеләде Фәрит Мөхәммәтшин.

Республика парламентының Мактаулы Рәисе сүзләренә караганда, Татарстан Евразия интеграциясе процессларына тотрыклы рәвештә җәлеп ителә һәм континентта хезмәттәшлекне үстерүгә сизелерлек өлеш кертә.  «Эшнең мондый форматы Евразия киңлегендә тигез хокуклы партнерлык, күп үзәкле дөнья тәртибе һәм үзара файдалы хезмәттәшлек төзүгә, шул исәптән дәүләтләрнең закон чыгару органнары арасында төрле яклы һәм конструктив хезмәттәшлекне киңәйтүгә мөһим адым булачак», – дип басым ясады Фәрит Мөхәммәтшин.

Секция утырышы барышында конференциядә катнашучылар «Россия – Ислам дөньясы» XVII халыкара икътисадый форумын оештыру дәрәҗәсен югары бәяләделәр, шул исәптән республика җитәкчелегенә, ТР Дәүләт Советына «Президент академиясенең җәйге кампусы» белем бирү программасына ярдәм итүләре өчен рәхмәт белдерделәр.

Секциянең модераторлары – Президент академиясенең Дәүләт хезмәте һәм идарә институтының  парламентаризм һәм парламентара хезмәттәшлек кафедрасы мөдире, сәяси фәннәр докторы, профессор Валерий Бакушев һәм кафедра профессоры, сәяси фәннәр докторы, профессор Фәрит Мөхәммәтшин.

Секция эшендә РФ ФС Федерация Советының Халыкара эшләр комитеты рәисе, РФ Гадәттән тыш һәм Тулы вәкаләтле илчесе Григорий Карасин; Президент академиясе проректоры Алексей Спирин; РФ Президентының «Зур Евразия партнерлыгы» булдыру турындагы инициативасын гамәлгә ашыру координаторы, Россия Тышкы эшләр министрлыгының махсус йөкләмәләр буенча илчесе Марат Бердыев; Бәйсез Дәүләтләр Берлеге эшләре, Евразия интеграциясе һәм ватандашлар белән элемтә буенча Дәүләт Думасы Аппараты җитәкчесе Анатолий Середа;Халыкара Евразия хезмәттәшлеге оешмасы президенты, «Евразия диалогы» журналының баш мөхәррире Дмитрий Стасюлис, РФ субъектларының закон чыгару органнары вәкилләре һәм башкалар катнашты.

Исегезгә төшерәбез, Зур Евразия партнерлыгы (БЕП) – Россия Президенты Владимир Путинның 2015 елда Россия Федерациясе Федераль Собраниесенә юлламасында Евразия континентында киң интеграцион контур булдыру максатыннан тәкъдим ителгән Халыкара инициативасы. Аның нигезендә дәүләтләр һәм региональ берләшмәләр потенциалларын берләштерү юлы белән үзара файдалы икътисадый хезмәттәшлек пространствосын төзүгә ярдәм итү омтылышы ята. Әлеге юнәлештә алга китеш ирекле башлангычларда алып барыла, ачык характерда була, партнер илләр икътисадларының конкурентлыкка сәләтлелеген ныгытуга һәм аларның гомуми иминлеген арттыруга ярдәм итә.