Кичә Минзәлә районының Коноваловка авылында хәрби хәрәкәтләр ветераннары һәм чик буе гаскәрләре хөрмәтенә парк һәм анда урнаштырылган һәйкәлләрне ачу уңаеннан хәрби-патриотик чара узды. Анда Дәүләт Советы депутаты, СВО ветераны Эдуард Шәрәфиев, сугышчан хәрәкәтләр ветераннары, чик буе гаскәрләре ветераннары, махсус операциядә катнашучылар, волонтерлар, Коноваловка авылы һәм күрше авыл халкы катнашты.

Паркны булдыру тәкъдиме белән шул төбәктә гомер итүче чик буе гаскәрләре ветераны, эшмәкәр Фларис Шакирҗанов чыккан. Ул паркны төзүгә узган ел ук керешкән.

«Чик буе гаскәрләренә һәм хәрби хәрәкәтләр ветераннарына багышланган мемориаль комплекс булдыруга һәм ачуга катнашы булган һәркемгә чын күңелдән рәхмәт белдерәм, – диде Эдуард Шәрәфиев. – Бу һәйкәлнең Татарстан Республикасының «Чик сакчылары берлеге» төбәк иҗтимагый оешмасының Минзәлә бүлеге әгъзасы Фларис Сабир улы Шакирҗянов инициативасы белән аның шәхси акчасына төзелүе сөендерә. Бу игелекле эше өчен Фларис Сабир улына зур рәхмәт!».

Депутат әйтүенчәчә, мондый мемориаллар төрле буын ветераннарын һәм төрле хәрби конфликтларда катнашучыларны берләштерә.

Паркта барлык буын чик сакчыларына –  Әфганстанда һәм Чечняда хәрби хәрәкәтләрдә, шулай ук махсус хәрби операциядә катнашучыларга һәйкәлләр куелган. Чарада катнашучылар һәйкәлләргә чәчәкләр салдылар, бер минут тынлык игълан ителде.

Район мәдәният сарае артистлары һәм үзешчән сәнгать осталары үзләренең музыкаль номерларын тәкъдим иттеләр. 

Паркны ачуда шулай ук Минзәлә районы башкарма комитетының авыл хуҗалыгы һәм азык-төлек идарәсе җитәкчесе Илфар Халиков, Коноваловка авыл җирлеге башлыгы Марат Галимҗанов, республиканың ветераннар оешмалары җитәкчеләре катнашты.