Бүген Дәүләт Советында Бюджет, салымнар һәм финанс комитеты һәм комитет каршындагы Эксперт советының уртак утырышы булды, анда парламентарийлар республикада үзмәшгульләр һәм шәхси эшмәкәрләр өчен һөнәри керемгә салым билгеләү буенча эксперимент үткәрү нәтиҗәләре турында фикер алыштылар. Моннан тыш, депутатлар профиль комитетының 2026 елның беренче яртыеллыгындагы эшенә йомгак ясадылар. Утырышны Бюджет, салымнар һәм финанслар комитеты рәисе Леонид Якунин үткәрде.

Оешмалар мөлкәтенә салым турындагы республика законына үзгәрешләр кертү турындагы закон проектын Татарстан финанс министры урынбасары Алла Анфимова тәкъдим итте. Закон проекты салым түләүчеләрнең аерым категорияләре өчен билгеләнгән оешмалар мөлкәтенә салым буенча ташламаларның гамәлдә булуын озайтуны күздә тота.

Бакчачылык яисә яшелчәчелек коммерциягә карамаган ширкәтләренә,  шулай ук гражданнар тарафыннан бакчачылык, яшелчәчелек яисә дача хуҗалыгы алып бару өчен 2019 елның 1 гыйнварга кадәр төзелгән коммерциягә карамаган оешмаларга карата гомуми файдаланудагы мөлкәт булып торган мөлкәткә карата салым салудан азат ителүне 2028 елның 1 гыйнварына кадәр озайту каралган.

Сәламәтлек саклау, физик культура һәм спорт ихтыяҗлары өчен файдаланыла торган социаль-мәдәни өлкә объектларына карата оешмалар өчен, федераль бюджеттан, Татарстан Республикасы бюджетыннан һәм җирле бюджетлардан финанслана торган оешмалардан тыш, халыкның медицина ярдәме сыйфатыннан канәгатьлеген арттыру һәм халыкның системалы рәвештә физик культура һәм спорт белән шөгыльләнүче өлешен арттыру максатларында, исәпләнгән салым суммасының 4,55 проценты күләмендә салым түләү рәвешендә билгеләнгән преференцияне 2028 елның 1 гыйнварына кадәр озайту каралган.

Республикада халыкка табигый газ сата торган оешмалар өчен торак пунктларда газ китерү чараларын гамәлгә ашыру кысаларында 2022 елның 1 гыйнварыннан яңа гына файдалануга тапшырылган
1,2 МПа кадәр, шуны да кертеп, басымлы газ бүлү челтәренең газүткәргечләренә карата закон проектында преференцияне исәпләнгән салым суммасының 4,55 проценты күләмендә салым түләү рәвешендә 2032 елның 1 гыйнварына кадәр озайту каралган.

Шулай ук закон проекты тарафыннан 2027-2031 елларга Татарстан Республикасында халыкка табигый газ сата торган оешмалар өчен исәпләнгән салым суммасының 72,73 проценты күләмендә салым түләү рәвешендә ташлама билгеләү тәкъдим ителә.

«Әлеге чаралар газ бүлү оешмаларына салым йөкләнешен киметүгә һәм Татарстан Республикасында газлаштыруны алга таба үстерү өчен уңай шартлар тудыруга юнәлдерелгән, – дип белдерде Татарстан Республикасы Финанс министры урынбасары Алла Анфимова.

Татарстанда һөнәри керемгә салым – ташламалы ставкалары 4% яки 6% булган үзмәшгульләр һәм шәхси эшмәкәрләр өчен махсус салым режимын билгеләү буенча эксперимент үткәрү нәтиҗәләре турында ТР икътисад министрының беренче урынбасары Наталья Кондратова сөйләде. Ул искә төшергәнчә, һөнәри керемгә салым 2019 елның 1 гыйнварыннан гамәлдә.

Экспериментны гамәлгә ашыру нәтиҗәләре буенча Татарстанда һөнәри керемгә салым кулланучы гражданнар саны 485 меңнән артып киткән. Махсус салым режимы гамәлгә кергәннән бирле Татарстан үзмәшгульләре тарафыннан 233 млн чек формалаштырылган, 346 млрд сум керем алынган, түләнгән салымнарның гомуми суммасы 13,4 млрд сум тәшкил иткән.

«Эксперимент үткәрү чорында махсус салым режимы камилләшүен дәвам итә. Быел ирекле иминиятләштерү башланды, аның кысаларында үзмәшгульләр Россия Социаль фондына взнослар түләү, түләүле больничный алу мөмкинлеге алды», – диде Татарстан Республикасы икътисад министрының беренче урынбасары.

«Махсус салым режимы үзен максатчан дәүләт ярдәме, норматив базага вакытында төзәтмәләр кертү шарты белән икътисад һәм җәмгыять ихтыяҗларына җайлашырга сәләтле индивидуаль һөнәри эшчәнлекне җайга салуның сыгылмалы, ихтыяҗлы ысулы буларак күрсәтте. Һәм без бу режим расланган сроклар беткәч тә дәвам итәр дип өметләнәбез», – дип йомгаклады бу нисбәттән фикер алышуны Леонид Якунин.