Дәүләт Советы депутатлары округларда актив эшләүләрен дәвам итәләр. Парламентарийлар гражданнарны кабул иттеләр, республика муниципалитетларында мәгариф хезмәткәрләренең август конференцияләрендә катнаштылар, шулай ук булачак беренче сыйныф укучыларына «Мәктәпкә җыенырга ярдәм ит» хәйрия акциясе кысаларында мәктәп рюкзаклары  тапшырдылар.

25 августта Казан шәһәренең "Сәйдәш" мәдәният үзәгендә «Мәктәпкә җыенырга ярдәм ит» хәйрия акциясе узды. Канцелярия кирәк-яраклары белән мәктәп рюкзаклары аз керемле һәм күп балалы гаиләләрдән беренче сыйныф укучыларына, тәрбиягә алынган балаларга һәм инвалид балаларга, мобилизацияләнгән гаиләләрдәнбулган балаларга тапшырылды. Укучыларны Дәүләт Советы Секретаре Лилия Маврина сәламләде.

Татарстанда «Мәктәпкә җыенырга ярдәм ит» хәйрия акциясе 2007 елдан бирле хәйриячеләр акчасына үткәрелә. Чарада гадәттә предприятиеләр һәм коммерция оешмалары җитәкчеләре, Татарстан Республикасы Дәүләт Советы һәм Казан шәһәр Думасы депутатлары катнаша.

24 августта Дәүләт Советы Рәисе урынбасары Юрий Камалтынов төбәк җәмәгать кабул итү бүлмәсендә гражданнарны кабул итте. Түбән Камада яшәүче кеше депутатка алкоголь продукциясен сатуны һәм куллануны көйләүче төзәтмәләр кертү тәкъдиме белән мөрәҗәгать итте. Яшел Үзәндә яшәүче хатын-кыз приставларның эшенә зарланды. Аның әйтүенчә, банк картасыннан акчалата пособиеләр системалы рәвештә алына. Ул мондый гамәлләрнең никадәр законлы булуын ачыклауны сорады. Юрий Камалтынов ике мөрәҗәгатьне дә эшкә алды.

24 августта Дәүләт Советы Секретаре Лилия Маврина Казан шәһәренең Совет районы педагогик хезмәткәрләренең август киңәшмәсендә катнашты. Традиция буенча, мәгариф һәм фән хезмәткәрләренең республика август киңәшмәсеннән соң Татарстан муниципаль районнарында һәм шәһәр округларында шундый ук киңәшмәләр уза, аларда узган уку елына йомгак ясала, киләсе уку чорына агымдагы мәсьәләләр һәм планнар тикшерелә.

24 августта Торак сәясәте һәм инфраструктура үсеше комитеты рәисе Александр Тыгин Казанда ачылган «ККК: законнар һәм практика» V фәнни-гамәли конференциясендә чыгыш ясады. Шул ук көнне Александр Тыгин һәм Дәүләт корылышы  һәм җирле үзидарә комитеты рәисе Альберт Хәбибуллин «ТР Муниципаль берәмлекләр советы» ассоциациясе президиумы утырышында катнаштылар.

24 августта Нурлатта мәгариф хезмәткәрләренең август киңәшмәсе узды. Пленар утырыш сәнгать мәктәбенең актлар залында узды. Киңәшмә кысаларында районның иң яхшы педагогларына Татарстан Республикасы Дәүләт Советы Рәисенең Рәхмәт хатлары тапшырылды. «Мәктәпкә җыенырга ярдәм ит» республика акциясе кысаларында парламент депутатлары Людмила Рыбакова һәм Шамил Ягудин 12 беренче сыйныф укучысына кирәкле канцелярия кирәк-яраклары белән мәктәп портфельләрен тапшырдылар.

23 августта Татарстан Рәисе, Дәүләт Думасы депутатлары, ТР Дәүләт Советы Рәисе урынбасары Марат Әхмәтов, шулай ук профильле министрлыклар вәкилләре эш визиты кысаларында Зәй муниципаль районында булдылар. Катнашучылар җирле аграрийлар белән очраштылар һәм басулардагы вәзгыять турында фикер алыштылар. Зәй районы башлыгы Разиф Кәримов игеннәрне җыеп алу узган җомгада тәмамланды дип хәбәр итте. Аннары кунаклар шәһәрдә «Дулкын» ябык йөзү бассейнын ачуда катнаштылар.

23 августта Казан шәһәренең «Чулпан» мәдәни үзәгендә булачак беренче сыйныф укучылары һәм аларның әти-әниләре өчен бәйрәм узды. «Мәктәпкә җыенырга ярдәм ит» акциясе кысаларында канцелярия товарлары белән портфельләрне Идел буе һәм Вахитов районнарының 300 беренче сыйныф укучысы алды. Укучыларны Белем көне белән Дәүләт Советы депутатлары Ольга Воронова, Альбина Насыйрова һәм Рөстәм Габделхаков котладылар.

23 августта Минзәлә мәдәният йортында район педагогларының август конференциясе узды. Конференция эшендә Экология, табигатьтән файдалану, агросәнәгать һәм азык-төлек сәясәте комитеты рәисе Азат Хамаев катнашты.

22 августта Казанның Горький паркында «Тормыш агачы» – «Халыклар йолдызлыгы» проектына йомгак ясалды. Чарада Мәгариф, мәдәният, фән һәм милли мәсьәләләр комитеты рәисе урынбасары Людмила Рыбакова һәм Бюджет, салымнар һәм финанслар комитеты рәисе урынбасары Камил Нугаев катнашты.

Кунаклар өчен киң квест программасы оештырылды, казанлылар һәм башкала кунаклары Татарстанның төп халыклары мәдәнияте белән таныша алды. «Тормыш агачы» проекты Татарстан халыклары Ассамблеясы һәм Казан мэриясе тарафыннан ТР Рәисе каршындагы татар телен һәм республикада яшәүче халыкларның туган телләрен саклау, үстерү мәсьәләләре буенча комиссия ярдәме белән милли мәдәниятләр һәм традицияләр елы кысаларында тормышка ашырыла.

22 августта Дәүләт Советы депутатлары Руслан Нигъмәтуллин һәм Илдар Шамилов Чаллы яшьләре белән очраштылар. Шәһәрдә Татарстан Үзәк сайлау комиссиясе рәисе Андрей Кондратьев катнашында Яшь сайлаучылар клубы утырышы узды.

20 августта Яр Чаллыдан ЛХРга гуманитар йөк җибәрелә. Адреслы посылкалар, кием һәм амуниция, генераторлар һәм төзелеш материаллары, маскировка челтәрләре һәм медикаментлар Чаллы һәм Татарстанның башка районнарыннан солдатлар хезмәт иткән хәрби частьләргә һәм госпитальләргә алып барыла. Гуманитар йөк Дәүләт Советы депутаты Руслан Нигъмәтуллин ярдәме белән җибәрелде.

18 августта Торак сәясәте һәм инфраструктура үсеше комитеты рәисе урынбасары Камил Садриев «Бердәм Россия» төбәк иҗтимагый кабул итү бүлмәсендә гражданнарны кабул итте. Депутат шәхси эшмәкәр белән авылда фермер хәрәкәтенә һәм бизнеска ярдәм итү мәсьәләләре турында фикер алышты. Камил Садриев гариза бирүчегә грант ярдәме һәм булган субсидияләр турында сөйләде. Моннан тыш, парламентарий республика авыл хуҗалыгы һәм азык-төлек министрлыгына грантлар бүлеп бирү конкурсларында катнашу тәртибен аңлатуны сорап мөрәҗәгать юллады.

17 августта Экология, табигатьтән файдалану, агросәнәгать һәм азык-төлек сәясәте комитеты рәисе Азат Хамаев республиканың Минзәлә районы балаларына «Мәктәпкә җыенырга ярдәм ит» акциясе кысаларында мәктәп рюкзаклары һәм бүләк сертификатлары тапшырды.

16 августта "Мәрхәмәт-Мидосердие" депутатлар берләшмәсе әгъзалары Россия кооперация университеты һәм Бердәм Россия партиясенең  "Кече Ватан мәдәнияте" проектында катнашучы Яшел Үзән музыкаль театры белән берлектә Донбасс һәм ЛХР балалары, Лисичанск һәм Рубежный халкы өчен яңа китаплар тапшырдылар. Тарих, әдәбият, социология һәм математика буенча 10 комплект дәреслекләрне Россия кооперация университеты ректоры, «Мәрхәмәт-Милосердие» хатын- кыз депутатлар берләшмәсе җитәкчесе Алсу Нәбиева тапшырды. Җыентыкта шулай ук Бөек Ватан сугышында җиңүнең 75 еллыгына ТР Дәүләт Советының хатын-кыз депутатлары берләшмәсе ярдәме белән нәшер ителгән  «Сугыш хатын- кыз йөзле була алмый» китабы да бар.