Бүген Дәүләт Советында Законлылык һәм хокук тәртибе комитеты утырышы узды, анда парламентарийлар Татарстан Республикасы җәмәгать судьялары вазыйфасына сайлау өчен кандидатларны карадылар, шулай ук берничә федераль закон проектын тикшерделәр. Моннан тыш, парламентарийларга профильле комитет әгъзасы Алсу Тарханованың депутатлык эшчәнлеге турында хисап бирелде. Утырыш эшендә Дәүләт Советы Рәисе урынбасары Юрий Камалтынов катнашты.

ТР Югары Суды Рәисе вазыйфаларын башкаручы Эдуард Каминский тәкъдиме буенча комитет җәмәгать судьяларын сайлау мәсьәләсен карады. Депутатлар тәкъдим ителгән кандидатураларны хупладылар һәм ТР Дәүләт Советына өч елга ТР җәмәгать судьялары итеп Арслан Боязитовны (Казан шәһәре Вахитов суд районы буенча 1 нче суд участогына), Гүзәл Баһавиеваны (Казан шәһәре Мәскәү суд районы буенча 1 нче суд участогына), Марс Яхинны (Чаллы шәһәре суд районы буенча 15 нче суд участогына), Эдуард Җамалиев (Чаллы шәһәренең суд районы буенча 23 нче суд участогына) һәм Лилия Төхвәтуллинаны (Казан шәһәренең Идел буе суд районы буенча 4 нче суд участогына) сайларга тәкъдим иттеләр.

Шулай ук комитет Айдар Шәрәевны (Казан шәһәренең Киров суд районы буенча 1 нче суд участогына) һәм Ләйсән Диярованы (Чаллы шәһәренең суд районы буенча 2 нче суд участогына) вәкаләтләре чикләнмичә җәмәгать судьялары итеп сайларга тәкъдим итте.

Тәкъдим ителгән кандидатлар буенча соңгы карар парламентның якынлашып килүче утырышында кабул ителәчәк.

"Татарстан Республикасы Дәүләт Советы комитетлары турында «Татарстан Республикасы Законын гамәлгә ашыруның барышы турында" контроль мәсьәләне карау кысаларында Дәүләт Советы депутаты Алсу Тарханова агымдагы чакырылышның үткән чорында үзенең депутатлык эшчәнлеге турында мәгълүмат бирде. Депутат закон чыгару эшчәнлегенә һәм округтагы эшенә аерым басым ясады. Аерым алганда, узган чорда депутат тарафыннан Аксубай, Яңа Чишмә һәм Чистай районнарында 80нән артык граждан кабул ителде, 166 мөрәҗәгать эшкә кабул ителде.

Алсу Тарханова шулай ук "Сугыш хатын - кыз йөзле була алмый" проектын башлап җибәрүчеләрнең берсе һәм "Мәрхәмәт-Милосердие" депутат берләшмәсенең актив әгъзасы булып тора.

Депутатлар мәгълүматны игътибарга алдылар.

Комитет утырышында шулай ук «Административ хокук бозулар турында РФ Кодексына үзгәреш кертү хакында» федераль закон проекты каралды. Закон проекты белән дәүләт серен тәшкил итүче мәгълүматны яклау өлкәсендә административ хокук бозулар турындагы эшләрне карау вәкаләтләре төгәлләнә. Профильле комитет әгъзалары закон проектын хуплады.