Бүген Татарстан Республикасы Волейбол федерациясе президиумының Казан шәһәренең «Санкт-Петербург» Волейбол үзәгендә узган киңәйтелгән утырышында спорт өлкәсенә ел йомгаклары ясалды. Федерация әгъзалары шулай ук республиканың волейбол хәрәкәтен алга таба үстерү планнары турында фикер алыштылар. Утырышны Дәүләт Советы Рәисе, республика Волейбол федерациясе президенты Фәрит Мөхәммәтшин үткәрде.

«Күп еллар дәвамында татарстанлыларның физкультура һәм спорт белән актив шөгыльләнүләре, профессиональ спортчыларның югары нәтиҗәләргә ирешүләре өчен уңай шартлар тудыру республика җитәкчелегенең максатчан сәясәте булып тора, – дип басым ясады Фәрит Мөхәммәтшин, утырышны ачып, – Татарстан Республикасы Рәисе Рөстәм Миңнеханов ярдәме белән барлык шәһәрләрне һәм районнарны заманча спорт корылмалары, шул исәптән волейбол мәйданчыклары белән колачлау мөмкин булды. Республикада 286 универсаль спорт залы ачылган, шуларның 17се соңгы 4 елда төзелде. Бу чаралар 2030 елга республика халкының 75%ын  физкультура һәм спорт белән шөгыльләнүгә җәлеп итәргә ярдәм итәр дип өметләнәбез».

Узган ел Чаллының 11 нче спорт мәктәбен ремонтлаганнар, аның базасында быел сентябрьдә сәнәгать предприятиеләре һәм авыл командалары арасында ТР Волейбол федерациясе президенты Кубогын уздыру планлаштырыла. Шулай ук Автоградта пляж волейболы үзәге ачылган. Түбән Камада «Сибур-Арена» комплексы тапшырылган. Хәзерге вакытта балаларны 34 спорт мәктәбе һәм волейбол бүлеге җыя, аларда 5 меңгә якын яшь волейболчы шөгыльләнә.

Алда торган бурычлар арасында, Фәрит Мөхәммәтшин билгеләп үткәнчә, бүген инвалид спортчыларга һәм «көмеш» яшьтәге атлетларга уңайлы шартлар бар, шул ук вакытта спортның барлык төрләре буенча да мондый мөмкинлекләр тудырылмый. «Спорт мәктәпләрендә адаптив спорт төрләре буенча бүлекләрнең «географиясен» киңәйтергә, шул исәптән адаптив волейбол (волейболны утырып уйнау) буенча да, әлеге юнәлештә эшләүче тренерларны әзерләү белән дә шөгыльләнергә кирәк», – дип саный парламент башлыгы.

Фәрит Мөхәммәтшин кадрлар проблемасына аерым тукталды. «Тренерлар составының олгаюы борчылу тудыра, – дип билгеләп үтте Волейбол федерациясе президенты, – яшь тренерларга һәрьяклап ярдәм итү –спорт министрлыгы өчен дә, спорт федерацияләре өчен дә уртак бурыч». Фәрит Мөхәммәтшин сүзләренә караганда, авыл районнарында шулай ук «Зенит» һәм «Динамо» яшьләр командалары белән әйдәп баручы тренерларның мастер-классларын ешрак үткәрергә кирәк».

Федерация әгъзалары, Фәрит Мөхәммәтшин тәкъдимен хуплап, берничә инициатива белән чыгыш ясадылар. «Квалификацияле тренерлар җитмәү – төп проблемаларның берсе, – дип саный ТР Волейбол федерациясе башкарма директоры Мансур Кәримов, – авыл районнарына эшкә китүче тренерларга ярдәм итү өчен «Авыл табибы» тибындагы федераль программаларны кабул итәргә кирәк». Моннан тыш, беренче планга, Мансур Кәримов әйтүенчә, яшь тренер кадрларын тәрбияләү һәм аларның тренерлык осталыгын арттыру мәсьәләләре чыга. «Бөтенроссия ярышларында югары нәтиҗәләргә ирешү өчен олимпиада резервы училищесы базасында төрле яшьтәге волейбол буенча Татарстан җыелма командаларын әзерләү буенча бердәм үзәк булдыру ихтыяҗы күптән туды, – дип билгеләп үтте ул, – бер үк вакытта биредә республика тренерлары өчен тренер семинарлары үткәрелер иде».

Утырыш кысаларында Мансур Кәримов шулай ук ТР Волейбол федерациясенең 2023 елдагы эш нәтиҗәләре турында сөйләде. Узган ел республикада һәм бөтен ил буенча волейбол буенча спорт чаралары илебез волейболының йөз еллыгы билгесе астында узган. Шулай ук узган елда Россиядә иң борынгы «Динамо» физкультура‐спорт җәмгыяте оешуга йөз ел тулган. Казанда киң масштаблы «Динамо спорт уеннары» узган. Волейбол буенча турнир үзенә  иң күп тамашачыларны җыйган. Массакүләм волейбол үсеше дә игътибарсыз калмый. Биредә мәктәп һәм студентлар волейбол лигалары, авыл командалары арасында волейбол турнирлары бәяләп бетергесез өлеш кертә.

Федерация утырышында пляж волейболын һәм карда волейбол уйнауның яңа юнәлешен үстерүгә аерым тукталдылар. Татарстан командалары  – бөтенроссия һәм хәтта халыкара ярышлар лидерлары, «Динамо-Татарстан» хатын-кызлар командасы Красноярскида Россия Кубогына ия булган.

Узган ел профессиональ командалар өчен дә уңышлы булган. Зенит ир-атлар командасы Россия Кубогын яулаган һәм Россия чемпионы исемен кире кайтарган. «Динамо Ак Барс» хатын-кызлар командасы Россия чемпионатында призлы урыннар өчен көрәшә.

Утырышка йомгак ясап, Фәрит Мөхәммәтшин, волейбол республикада иң популяр спорт төре булып кала, һәм еш кына катнашучылар саны һәм җиңүләр саны буенча алда бара, дип басым ясады. Волейбол шулай ук иң уңайлы спорт төрләренең берсе булып тора.

Утырышта ТР Спорт министрының беренче урынбасары Хәлил Шәйхетдинов, ТР Мәгариф һәм фән министры урынбасары Станислав Андреев, Казан шәһәре муниципаль берәмлеге башлыгы урынбасары, ТР ФВ вице-президенты Евгения Лодвигова, «Зенит-Казан» волейбол клубы президенты Рәфкать Кантюков, мәгариф учреждениеләре һәм спорт җәмгыятьләре вәкилләре катнашты.