Бүген Дәүләт Советында «Бердәм Россия» фракциясе утырышы узды, анда парламентарийлар гаилә сәясәтен гамәлгә ашыруның аерым мәсьәләләре, аерым алганда, «Аталар берлеге» республика оешмасының эшчәнлеге турында фикер алыштылар. Моннан тыш, фракция утырышында Дәүләт Советы депутаты Игорь Бикеевның сайлау округындагы эше турында хисап тәкъдим ителде. Утырышны «Бердәм Россия» фракциясе җитәкчесе Юрий Камалтынов үткәрде.

«Аталар берлеге» республика иҗтимагый оешмасының эшчәнлеге турында фракция утырышында оешма җитәкчесе Адель Заһретдинов хәбәр итте.

«Аталар берлеге» бөтенроссия иҗтимагый оешмасы Россия Федерациясенең 60тан артык субъектыннан 500 меңнән артык активистны берләштерә. Безнең республикада беренче аталар берләшмәсе 2002 елда Түбән Камада барлыкка килде. 2009 елда аларның инициативасы һәм Татарстан Республикасы Дәүләт Киңәшчесе, Республиканың беренче Президенты Минтимер Шәймиев ярдәме белән республика дәрәҗәсендә оешма төзелде.

Хәзерге вакытта Татарстан Республикасы Аталар берлеге республиканың барлык территорияләрендә 5 меңнән артык актив кешене берләштерә, оешманың 40ка якын район һәм шәһәр вәкиллеге бар. Узган ел гына да берләшмә активистлары 60тан артык чара үткәргән.

Адель Заһретдинов гамәлгә ашырыла торган проектларга аерым тукталды. Мәсәлән, «Ир булырга туган» проекты әтиләргә үз-үзләрен үстерү өчен уникаль мөмкинлек тәкъдим итә. Алар финанс өлкәсендә, аралашу һәм мөнәсәбәтләр белән идарә итү һ.б. өлкәләрдә үз осталыкларын киңәйтә алачак. Узган ел әлеге проектта 500дән артык кеше катнашкан.

Чын ир-ат кыйммәтләрен тәрбияләүгә юнәлдерелгән «Батырлык көне» проекты ата-аналар һәм аларның балалары арасындагы мөнәсәбәтләрне ныгытуга күп яктан ярдәм итә.

«Аталарның активлыгын үстерү" проекты – аталарның балаларны тәрбияләүдә катнашу дәрәҗәсен арттыруга юнәлдерелгән инициатива. Бу проект кысаларында төрле мәктәпләрдә әтиләр белән очрашулар уздырылган, анда балалар белән вакытны актив итеп үткәрү, уртак ял һәм спорт чараларын оештыру, шулай ук әтиләрнең мәктәп җитәкчелеге белән үзара эшчәнлеге мәсьәләләре тикшерелгән.

Ел саен аталар берлеге «Әтиләр көне» бәйрәменә багышланган күп кенә чаралар үткәрә. "Әтиләр көнен бәйрәм итүне яңа дәрәҗәгә күтәрергә кирәк", - дип саный Адель Заһретдинов. Быел, инде традиционга әверелгәннәрдән тыш, аталар берлеге «Ел әтисе» конкурсын, шулай ук традицион гаилә кыйммәтләрен саклауга зур өлеш керткән аталар өчен «Танылган әти» премиясен оештырырга планлаштыра. Бүләкләнүчеләр арасында язучылар, рәссамнар, режиссерлар, музыкантлар, талантлы кешеләр булачак, аларның эше сәнгать дөньясында гына түгел, ә гаиләләр һәм гомумән җәмгыять аңында да тирән эз калдыра.

Фракция утырышында башка мәсьәләләр дә каралды.