Бүген узган Социаль сәясәт комитеты һәм комитет каршындагы Эксперт советының уртак утырышында депутатлар республикада балаларның һәм яшьләрнең җәйге ялын оештыруга югары бәя бирделәр. Утырыш эшендә катнашкан Дәүләт Советы Рәисе урынбасары Юрий Камалтынов ирешелгән нәтиҗәләргә тукталып калмаска һәм студентлар өчен җәйге ял оештыру белән шөгыльләнергә чакырды.

Утырыш башында Социаль сәясәт комитеты рәисе Светлана Захарова билгеләп үткәнчә, балаларның җәйге ялын оештыру мәсьәләләренә республика парламентының профильле комитетлары зур әһәмият бирә. "Яшьләр эшләре буенча министрлык, Мәгариф һәм фән министрлыгы, депутатларның уртак тырышлыгы нәтиҗәсендә оештыру дәрәҗәсе күтәрелә, бу юнәлештә эшнең нәтиҗәлелеге яхшыра", - диде ул.

Балалар һәм яшүсмерләрнең җәйге ялын оештыру турындагы мәгълүматны ТР Яшьләр эшләре буенча министр урынбасары Денис Лулаков җиткерде. Ул билгеләп үткәнчә, 2025 елда 154,5 мең баланың ялын оештыру планлаштырыла. Шуларның 66 меңнән артыгы – 119 балаларны савыктыру лагеренда, 7,7 меңе – 11 шифаханә - курорт учреждениесендә, 12,5 меңе – 39 палатка тибындагы лагерьда, 57 меңе – 850 көндезге лагерьда (мәктәп яны) һәм 11,3 меңе – 601 хезмәт һәм ял лагеренда ял итәчәк.

«Бу максатларга 2,5 млрд сум юнәлдерелгән, – дип хәбәр итте министр урынбасары. –  «2019-2025 елларга ТРда яшьләр сәясәтен үстерү» дәүләт программасы кысаларында 43 мең юллама түләүсез биреләчәк, шул исәптән 11113 юллама  –  авыр тормыш хәлендә калган балалар өчен; 4,7 мең юллама – тернәкләндерүгә мохтаҗ балалар өчен шифаханә - курорт оешмаларына, 3 мең юллама – палатка тибындагы лагерьларга әзерлек буенча хәрби хезмәткә чакырылуга кадәрге яшүсмерләр өчен; югары уку йортлары студентлары өчен физкультура-сәламәтләндерү чараларын оештыруга 5 мең юллама; мәктәп укучылары өчен көндез оештырылган хезмәт һәм ял лагерьларына 11315 юллама. Шулай ук 7869 сәләтле бала (олимпиадаларда җиңүчеләр, призерлар, иҗади конкурслар лауреатлары, спорт ярышлары призерлары) бушлай ял итәчәк».

Денис Лулаков әйтүенчә, ятим балаларның, балалар йортларында тәрбияләнүчеләрнең, коррекцион мәктәп-интернатларда укучыларның, сәламәтлек мөмкинлекләре чикләнгән балаларның, кадет мәктәп-интернатларында тәрбияләнүчеләрнең ялын оештыруга аерым игътибар бирелә. Махсус хәрби операциядә катнашучыларның балаларына 7,3 мең юллама бирү каралган.

Иминлекне тәэмин итү максатларында барлык савыктыру учреждениеләрендә «Иминлек паспорты» булганда гына файдалануга рөхсәт ителә. Бу максатларга ел саен Татарстан Республикасы бюджетыннан өстәмә акчалар бүлеп бирелә. 2025 елда финанслау 29,84 млн. сум тәшкил итәчәк.

2019 - 2024 елларда «Җәй – балаларга» капиталь ремонт программасы кысаларында 6,9 млрд сумлык 43 балаларны савыктыру лагере төзекләндерелгән, реконструкцияләнгән һәм төзелгән. 2025 елда балаларны савыктыру лагерьларын реновацияләү программасы дәвам итә, программага 14 муниципаль берәмлектән 19 лагерь кертелгән.  Лагерьларга керү юлларын реконструкцияләү дәвам итә. Биш ел эчендә 1,4 млрд сумлык 80 км юл ремонтланган. 2025 елда 6 юлны 250 млн сумга ремонтлау планлаштырыла.

Дәүләт Советы Рәисе урынбасары Юрий Камалтынов, бу мәсьәләне карап тикшерүгә йомгак ясап, студент яшьләр өчен җәйге ял лагерьлары булдыру мәсьәләсен өйрәнергә тәкъдим итте. "Татарстанда 150 меңгә якын студент укый, – дип искәртте ул. – Бу зур аудитория өчен махсус студентлар, яшьләр лагерьлары булдыру максатка ярашлы булыр иде. Мондый учреждениеләрнең профориентация тематикасы турында уйларга кирәк булачак".