Бүген Бәшир Рәмиев исемендәге Казан IT-паркында Халыкара коррупциягә каршы көрәш көненә багышланган форум узды. Форумда Дәүләт Советы Рәисе урынбасары Юрий Камалтынов катнашты.

Татарстан Республикасы Президенты Рөстәм Миңнеханов форумда катнашучыларга сәламләү юллаган. «Бу көн хәзерге заманның төп проблемаларының берсенә каршы тору өчен көчләрне берләштерү кирәклеге турында мөһим искәрмә булып хезмәт итә. Коррупция безнең тормышыбызның барлык өлкәләренә сизелерлек зыян китерә, икътисади процессларны һәм социаль гаделлекне боза. Шуңа күрә бу күренешкә каршы тору – барлык дәрәҗәдәге дәүләт хакимияте органнары эшчәнлегенең өстенлекле юнәлешләренең берсе», – дип ассызыклый Рөстәм Миңнеханов.

Рәис билгеләп үткәнчә, республика коррупциягә каршы торуның бөтенроссия системасына үз өлешен кертә. Дәүләт идарәсен цифрлаштырудан  башлап мәгълүматның ачыклыгын тәэмин итүгә һәм җәмәгать контроленең көчәюенә кадәр комплекслы алым кертелә.

Форумда катнашучыларга мөрәҗәгать итеп, Юрий Камалтынов билгеләп үткәнчә, бүген коррупция – илне көчсезләндерүче механизмнарның берсе. «Икътисад махсус хәрби операция максатларында эшләгәндә, социаль өлкәне тәэмин итәргә тырышканда, Россия Президенты куйган бурычларны хәл иткәндә, икътисадны көчсезләндерүгә юнәлдерелгән теләсә нинди гамәлне «дәүләткә хыянәт» дип санарга мөмкин», – дип басым ясады Юрий Камалтынов.

Дәүләт Советы Рәисе урынбасары билгеләп үткәнчә, 2005 елда республикада коррупциягә каршы сәясәт стратегиясе кабул ителгән, ул бу юнәлештә системалы эш өчен нигез булып тора. Татарстанда беренчеләрдән булып «Коррупциягә каршы тору турында» республика законы кабул ителгән.

«Республикада коррупциягә каршы эшчәнлек мәсьәләләре хакимиятнең барлык дәрәҗәләрендә игътибар үзәгендә тора, – диде Юрий Камалтынов. – Стратегияне гамәлгә ашыру профилактиканың җәзадан нәтиҗәлерәк булуын күрсәтә. Соңрак төзәтүгә караганда, аны булдырмау мөһимрәк».

Республика парламенты Рәисе урынбасары ассызыклаганча, коррупциягә каршы тору өчен Татарстан илдә беренче булып барлык дәүләт һәм муниципаль хезмәтләрне диярлек электрон формага күчергән, 2012 елдан башлап «Халык контроле» дәүләт мәгълүмат системасы эшли.

 «Безнең төп бурычыбыз – коррупциягә түземсезлек атмосферасын булдыру. Барысы да баштан башлана. Башта алар башларындагы коррупцияне җиңәргә тиеш, аннары – җәмгыятьтә», – дип билгеләп үтте Юрий Камалтынов.

Форум ахырында дәүләт һәм ведомство бүләкләрен тапшыру тантанасы булды.