Бүген Дәүләт Советында социаль сәясәт комитеты утырышы узды, анда депутатлар аерым категория гражданнарга ярдәм итүгә юнәлдерелгән закон проектларын карады. Аерым алганда, профильле комитет әгъзалары СВОда катнашучыларга социаль ярдәм күрсәтүгә, гражданнарга социаль хезмәт күрсәтү өлкәсендәге аерым мәсьәләләрне җайга салуга, шулай ук инвалидларны эшкә алу өчен эш урыннары булдыруга кагылышлы республика законнарына үзгәрешләр кертү турындагы закон проектлары буенча фикер алыштылар. Моннан тыш, опека һәм попечительлек оешмалары эшчәнлеген оештыру турындагы республика законын күзәтүгә йомгак ясалды.

Татарстанның хезмәт, халыкны эш белән тәэмин итү һәм социаль яклау министры урынбасары Наталья Бутаева махсус хәрби операциядә катнашучы затларга һәм аларның гаилә әгъзаларына социаль ярдәм күрсәтү өлкәсендә мөнәсәбәтләрне җайга салу үзенчәлекләре турындагы республика законына үзгәрешләр кертү турында закон проектын тәкъдим итте. Документ буенча  махсус хәрби операциядә контракт буенча катнашучы, Россия Федерациясе Кораллы Көчләренә өлешчә мобилизация буенча чакырылган затларга, шулай ук аларның гаилә әгъзаларына салым бурычлары булуга карамастан, социаль ярдәм чараларын алу хокукын 2026 елның 31 декабренә кадәр озайту каралган.

Комитет утырышында каралган тагын бер закон проекты гражданнарга социаль хезмәт күрсәтү өлкәсендәге аерым мәсьәләләрне җайга салу турында республика законына үзгәрешләр кертүгә кагыла. Закон проекты социаль хезмәт күрсәтү турында Федераль закон кысаларында эшләнгән һәм акылында  тайпылышлары булган балалр һәм гражданнар өчен интернат-йортларның исемнәрен, социаль хезмәт күрсәтү йортлары дип үзгәртүне күздә тота. «Учреждениеләрнең исемнәрен үзгәртү әлеге учреждениеләр хезмәткәрләрен ташламаларга һәм пенсия белән тәэмин итүгә йогынты ясамаячак", - дип билгеләде министр урынбасары Наталья Бутаева.

Моннан тыш, утырышта депутатлар инвалидларны эшкә алу өчен эш урыннарын квоталау һәм инвалидларны һәм социаль яклауга аеруча мохтаҗ гражданнарны эшкә урнаштыру өчен эшләрнең (һөнәрләрнең) аерым төрләрен  резервлау турындагы республика законына үзгәрешләр кертү турындагы закон проекты буенча фикер алыштылар. Татарстан Республикасы Хезмәт, халыкны эш белән тәэмин итү һәм социаль яклау министры урынбасары Наталья Бутаева әйтүенчә, закон проекты хәрби хәрәкәтләр ветераннарын, шул исәптән махсус хәрби операциядә катнашучыларны эш белән тәэмин итүгә һәм социальләштерү чаралары системасын камилләштерү, шулай ук федераль законнарга туры китерү максаты белән эшләнгән. Документ СВО ветераннарын социаль яклауга аеруча мохтаҗ гражданнар исемлегенә кертүне күздә тота.

Комитет утырышында, шулай ук опека һәм попечительлек органнарының балигъ булмаган затларга карата эшчәнлеген оештыру турындагы республика законына күзәтүгә йомгак ясалды. Мәгълүматны социаль сәясәт комитеты рәисе Алексей Созинов җиткерде. Ул әйткәнчә, республика законын гамәлгә ашыру ата-ана тәрбиясеннән мәхрүм калган балалар санын киметүгә, аларны гаиләләргә урнаштыруның нәтиҗәлелеген арттыруга ярдәм итә. "Республикада ятим балаларны һәм ата-ана тәрбиясеннән мәхрүм калган балаларны тормышка  яраклаштыру өчен шартлар булдырыла. Әлеге эшчәнлекнең нәтиҗәсе буларак социаль ятимлек дәрәҗәсе кимүне әйтергә була", - диде Алексей Созинов.

2021 елдан 2024 елга кадәр республикада ятим балаларның һәм ата-ана тәрбиясеннән мәхрүм калган балаларның гомуми саны 7 меңнән 6 меңгә кадәр кими. Моннан тыш, депутат әйтүенчә, ел саен ачыклана торган ятим балалар саны 956дан 738гә кадәр кимегән.

Ятим балалар һәм ата-ана тәрбиясеннән мәхрүм калган балалар оешмаларда яшәүчеләр саны 11% ка кимегән – 2021 елда 481 бала булса, 2024 елда 426 бала калган. 2024 елда 660 бала гаиләләргә тәрбиягә алынган, бу ел дәвамында ятимлеге ачыкланган балаларның 89 процентын тәшкил итә. Алексей Созинов аңлатканча, шулай ук балаларны тәрбияли алмаган гражданнарның ата-ана хокукларыннан мәхрүм ителү очраклары саны кимү күзәтелә.

Үткәрелгән мониторинг нәтиҗәләре буенча профильле комитет әгъзалары закон проектының актуальлеген, гамәлдәге законнарга туры килүен, аның нормаларын үтәүнең чынбарлыгын һәм финанс яктан тулысынча тәэмин ителешен билгеләп үтте. Шул ук вакытта депутатлар үсеш үзенчәлекләре булган балаларның опекуннары өчен өстәмә социаль ярдәм чараларын кертүнең һәм опека һәм попечительлек өлкәсендә ведомствоара хезмәттәшлек буенча эшне көчәйтү кирәклеген әйтә.

Бүген парламентарийлар комитетның 2025 елның сентябреннән декабренә кадәрге эшенә нәтиҗә ясады һәм комитетның киләсе 2026 елга эш планын раслады.