Дәүләт Советы депутатларының сайлау округларында эшчәнлеге дәвам итә. Бу атнада парламентарийлар гражданнарны кабул иттеләр, муниципалитетларда халык белән очраштылар, шәһәр чыршыларын ачуда катнаштылар һәм республика конкурслары лауреатларын бүләкләделәр.

25 декабрьдә Экология, табигатьтән файдалану, агросәнәгать һәм азык-төлек сәясәте комитеты рәисе урынбасары Нәҗип Хаҗипов, Дәүләт Советы депутаты Азат Җиһаншин «Эколидер-2025» республика конкурсы финалистларын котладылар. Конкурс 2004 елдан бирле үткәрелә. Анда әйләнә-тирә мохит проблемаларына битараф булмаган татарстанлылар һәм журналистлар, предприятиеләр, уку йортлары, иҗтимагый оешмалар катнаша. Быел конкурска 230 дан артык гариза килгән.

25 декабрьдә Социаль сәясәт комитеты рәисе Алексей Созинов Бөек Ватан сугышы ветераны Махьян Камаевның хәлен белде. Ул 1927 елда туган, сугышның бөтен авырлыгын күргән, Прагада яраланган, Япония белән сугышта катнашкан, сугыштагы казанышлары өчен 2 нче дәрәҗә Ватан сугышы ордены һәм «Японияне Җиңгән өчен» медале белән бүләкләнгән. Алексей Созинов ветеранга нык сәламәтлек, озын гомер теләде, Яңа ел бүләкләре тапшырды һәм депутатлар һәм Татарстан Дәүләт Советы Рәисе Фәрит Мөхәммәтшинның котлау сүзләре ирештерде. "Тыныч күк йөзе, батырлык һәм фидакарьлек өчен барлык ветераннарыбызга зур рәхмәт! Аларның үрнәге - безнең барыбыз өчен дә юл күрсәтүче йолдыз», - дип билгеләде Алексей Созинов.

25 декабрьдә салымнар һәм финанс, бюджет комитеты рәисе Леонид Якунин эш сәфәре белән Кама Тамагы районына барды, анда ул район Башкарма комитетының яңа административ бинасын ачу тантанасында катнашты. Бина администрациянең эшен тәэмин итү өчен барлык кирәк-ярак белән җиһазландырылган. Әйләнә-тирә территория төзекләндерелгән: тышкы яктырту җайланмалары урнаштырылган, брусчаткадан җәяүлеләр сукмаклары салынган, шулай ук эскәмияләр һәм урналар урнаштырылган. Шул ук көнне Леонид Якунин гаиләләрдә булды, балаларны Яңа ел белән котлады һәм бүләкләр тапшырды.

25 декабрьдә Экология, табигатьтән файдалану, агросәнәгать һәм азык-төлек сәясәте комитеты рәисе Азат Хамаев эш сәфәре белән Минзәлә районында булды. Депутат Муса Җәлил исемендәге паркта үзәк чыршыны ачу тантанасында катнашты. Азат Хамаев бәйрәм кунакларын якынлашып килүче Яңа ел белән котлап, минзәләлеләргә күңел тынычлыгы, иң изге теләкләренең тормышка ашуын теләде.

25 декабрьдә Дәүләт Советы депутатлары Руслан Нигъмәтулин, Олег Николаев, Андрей Ляпунов, Илдар Шамилов, Николай Атласов Яр Чаллыда «Теләкләр чыршысы» шәһәр проектында катнаштылар, «Асылташ» социаль приютында булдылар һәм балаларга бүләкләр бирделәр. Дәүләт Советы депутаты Руслан Нигъмәтулин интерактив курчак турында хыялланган дүрт яшьлек Верониканың теләген үтәде. Шул ук көнне ул ишетү сәләте начар булган 88 нче мәктәп укучысы Аделинаны котлады һәм ул Кыш бабайдан сораган тәгәрмәчле  тимераяклар тапшырды.

23 декабрьдә социаль сәясәт комитеты рәисе Алексей Созинов «Казан дәүләт медицина университетының Ел студенты» конкурсының тантаналы чарасында катнашты. Конкурс 14 номинацияне үз эченә алган. Быел 241 гариза бирелгән, шулардан жюри 126 иң яхшы кандидатны сайлап алган. Барлык конкурслар нәтиҗәсе буенча 37 укучы лауреат дип танылды. Проект республиканың кадрлар потенциалына мөһим инвестиция булып, укыту, фәнни-тикшеренү, иҗтимагый, мәдәни-иҗади һәм спорт эшчәнлегендә компетенцияләр үсешен стимуллаштыра", - дип билгеләп үтте Алексей Созинов.

22 декабрьдә Дәүләт Советы депутаты Елена Кузьмичева «Бердәм Россия» партиясе Рәисе Дмитрий Медведевның төбәк иҗтимагый кабул итү үзәгендә гражданнарны кабул итте. Республикада яшәүчеләрдән 3 мөрәҗәгать килгән, алар арасында - хезмәт хокукларын яклау, шифаханә-курортта дәвалану, социаль гарантияләр һәм сугышчан хәрәкәтләр ветеранын эшкә урнаштыру мәсьәләләре. Елена Кузьмичева барлык мөрәҗәгать итүчеләргә аңлатмалар һәм консультацияләр бирде.

22 декабрьдә Социаль сәясәт комитеты рәисе Алексей Созинов һәм законлылык һәм хокук тәртибе комитеты рәисе урынбасары Ринат Фазылов Урта һөнәри белем бирү учреждениеләрендә укучылар арасында үткәрелә торган «Ел казанышы» республика премиясе лауреатларын бүләкләү тантанасында катнаштылар. Премия Татарстан Республикасында Урта һөнәри белем бирү программаларын үзләштерүче, һөнәри эшчәнлектә, иҗатта, спортта, фәндә, яшьләр сәясәтендә аерым казанышларга ия булган укучыларны ачыклауга һәм аларга ярдәм итүгә юнәлдерелгән.