Бүген Казанда Һиндстан Республикасы көне уңаеннан тантаналы кабул итү узды. Чара Һиндстанның Казандагы Генераль консуллыгы инициативасы белән оештырылды.  Тантанада катнашучыларны ТР Дәүләт Советы Рәисе Фәрит Мөхәммәтшин, республика депутатлары исеменнән парламент Рәисе урынбасары Юрий Камалтынов котлады.  

Юрий Камалтынов иң элек Татарстан Республикасы Рәисе Рөстәм Миңнехановның котлавын ирештерде. «Безне Татарстан белән Һиндстан арасындагы нәтиҗәле элемтәләрне киңәйтү буенча уртак эш нәтиҗәләре сөендерә, һәм мин сезгә республикабызга булган игътибарыгыз өчен чын күңелдән рәхмәт белдерәсем килә, – диелә Һиндстан Республикасы Премьер-министры Нарендра Моди адресына юлланган хатта. – Казанда Һиндстан Республикасының Генераль консуллыгын ачу – Татарстан – Һиндстан арасындагы дуслык мөнәсәбәтләрен үстерү эшендә җитди ярдәм итәчәк мөһим вакыйга, шулай ук Россия белән Һиндстан арасындагы стратегик партнерлыкны ныгытуга хезмәт итәчәк».    

Дәүләт Советы Рәисе Фәрит Мөхәммәтшин парламент депутатлары исеменнән Һиндстанның Казандагы Генераль консулы Джейсундхар әфәндегә Һиндстан Республикасы көне уңаеннан котлау телеграммасы юллаган.

 «Һиндстан Республикасы Конституциясен кабул итү Һинд халкының Махатма Ганди җитәкчелегендәге күпьеллык милли-азатлык көрәшенең җиңүен белдерде, – диелә телеграммада. – Хәзерге Һиндстан – куәтле, тиз үсә торган дәүләт, безнең яхшы дустыбыз һәм ышанычлы партнерыбыз. Бүген миллиард ярым халкы булган Һиндстанда яшәүчеләрнең горурланыр нәрсәләре бар: икътисадта һәм социаль өлкәдә сизелерлек үзгәрешләр, эре инфраструктура проектлары Һиндстанны 21 гасырның лидерларының берсенә әйләндерде».

Парламент башлыгы шулай ук Джейсундхар әфәндене Һиндстанның Казандагы яңа Генераль консуллыгы башында дипломатик миссиясе башлануы белән котлады. «Генераль консуллык эше дәүләтләребезнең стратегик партнерлыгы кысаларында Татарстанның Һиндстан партнерлары белән күпкырлы хезмәттәшлеген һәрьяклап үстерергә ярдәм итәр дип ышанам».   

Һиндстанның Казандагы Генераль консуллыгы – бу дәүләтнең быел Россиядә ачылган ике консуллыгының берсе (икенчесе - Екатеринбургта). «Екатеринбургта һәм Казанда Һиндстан консуллыкларының үз эшләрен башлавына шатмын, – дип билгеләп үтте Һиндстанның Россия Федерациясендәге илчесе Винай Кумар, Республика көненең 77 еллыгы уңаеннан Мәскәүдә узган тантаналы кабул итүдә чыгыш ясаганда. Дипломат яңа генконсуллыклар ике илнең күп мәсьәләләрен, шул исәптән сәүдә-икътисадый өлкәдәге элемтәләрне алга таба үстерүгә ярдәм итә торган мөһим мәйданчыклар булачагына ышаныч белдерде.

Элегрәк Россиядә 2 генераль консуллык эшли иде: Санкт-Петербургта һәм Владивостокта. Казанда яңа дипмиссия Россия Федерациясенең Идел буе, Төньяк Кавказ һәм Көньяк федераль округлары субъектларын колачлый.

Бүген тантаналы кабул итүдә шулай ук Мәгариф, мәдәният, фән һәм милли мәсьәләләр комитеты рәисе урынбасары Ирина Терентьева һәм башка рәсми затлар катнашты.