Бүген Бәшир Рәмиев исемендәге ИТ-паркта Россия фәне көненә багышланган «Научный прорыв. Фәнни алга китеш» премиясен тапшыру тантанасы булды. «Фәнгә тугрылык өчен» номинациясендә Дәүләт Советы депутаты, ТР Фәннәр Академиясенең хакыйкый әгъзасы, физика-математика фәннәре докторы, профессор Мәгъсүм Сәлахов җиңүче булды.  Премияне лауреатка Дәүләт Советы Рәисе Фәрит Мөхәммәтшин тапшырды.

Чарада катнашучыларны сәламләп, Республика Рәисе Рөстәм Миңнеханов басым ясап әйтүенчә, 2025 ел Россия Президенты тарафыннан югары белем, фән һәм технологияләр өлкәсендә куелган милли максатларга ирешүгә тагын бер адым булды. Моны республиканың фәнни-мәгариф комплексы үсешенең уңай динамикасы раслый. Узган елда Татарстанда фәнни тикшеренүләргә һәм эшләнмәләргә эчке чыгымнар күләме ике тапкырга диярлек арткан. Республиканың яңа тарихында фәнни-тикшеренү персоналы саны 16,6 мең кеше тәшкил итә. Татарстан федерация субъектларының фәнни-технологик үсеше рейтингында ышанычлы рәвештә өченче урында тора.

Республика Рәисе билгеләп үткәнчә, Татарстанда федераль ярдәм чаралары белән беррәттән фәнни эшчәнлекне стимуллаштыруның төбәк инструментларын формалаштыру эше дәвам итә. Алар арасында – «Научный прорыв. Фәнни алга китеш» республика премиясе,  төбәк әһәмиятендәге алдынгы инженерлык мәктәпләрен төзү проекты, Фән һәм технологияләр фонды тарафыннан үткәрелә торган фундаменталь һәм гамәли эшләр конкурсы,  постдокларга грантлар, «Лаборатория мөдирләре мәктәбе» һәм «Проректорлар мәктәбе» сынау мәгариф проектлары,  шулай ук яшь галимнәрнең торак шартларын яхшырту программасы. «Мондый практикалар илнең дәүләт фәнни-техник сәясәтенең нәтиҗәлелеген арттырырга ярдәм итә һәм башка регионнарда да сынап карарга тәкъдим ителергә мөмкин», – дип белдерде Рөстәм Миңнеханов.

«Иң яхшы галим» номинациясендә җиңүчегә төп призны республика Рәисе Рөстәм Миңнеханов тапшырды. Бу исемгә РФА Казан фәнни үзәгенең Евгений Завойский исемендәге КФТИның «Физика» юнәлеше буенча фәнни җитәкчесе,  Татарстан башкаласының мактаулы гражданины, Россия Фәннәр академиясе академигы Кев Салихов лаек булды.

ТР Дәүләт Советы Рәисе Фәрит Мөхәммәтшин «Фәнгә тугрылык өчен» номинациясендә җиңүче ТР ФА Гамәли тикшеренүләр институтының баш фәнни хезмәткәре Мәгъсүм Сәлаховны бүләкләде. Бүләк Мәгъсүм Сәлаховка фәнни эшчәнлектә тугрылыгы һәм төрле өлкәләрдә фәнне актив үстерүе өчен бирелде.

 «Бу номинациядә әлеге югары бүләкне тапшыру бик күңелле. Мәгъсүм Хәлимулла улы – чын галим, актив гражданлык позициясе булган кеше, иҗтимагый-сәяси тормышта актив катнаша, – дип басым ясады Фәрит Мөхәммәтшин. – Мондый шәхесләр, галимнәр, гомумән безнең фәнни ачышлар – Татарстанның бүгенге уңышлары нигезе».

Парламент җитәкчесе барысын да Россия фәне көне белән котлады һәм яңа уңышлар теләде.

Мәгъсүм Сәлахов – ТР Фәннәр академиясенең хакыйкый әгъзасы, физика-математика фәннәре докторы, профессор, Фән һәм техника өлкәсендә Татарстан Республикасы Дәүләт премиясе лауреаты, РФ һәм ТР атказанган фән эшлеклесе, 2002-2010 елларда Казан дәүләт университеты ректоры, 2014-2023 елларда ТР Фәннәр академиясе президенты.  Мәгъсүм Сәлаховның төп фәнни хезмәтләре оптика, гамәли спектроскопия һәм нанофотоника проблемаларына багышланган. Мәгъсүм Сәлахов – илебездә һәм чит илләрдә чыккан 480 дән артык фәнни басма, шул исәптән дүрт монография авторы.