Бүген Дәүләт Советы Рәисе урынбасары Марат Әхмәтов эш сәфәре белән Балык Бистәсе районында булды, анда ул район Советының хисап сессиясендә катнашты. Муниципаль депутатлар узган елгы эшкә йомгак ясадылар, шулай ук киләсе елга планнар турында фикер алыштылар.

Хисап сессиясе район мәдәният йортында узды. Балык Бистәсе районы башлыгы Радик Исламов үз чыгышында дәүләт программалары һәм илкүләм проектлар кысаларында алып барыла торган эшләр турында сөйләде, хисап чорында районның социаль-икътисади үсеше нәтиҗәләре белән таныштырды.

Узган елның 9 ае нәтиҗәләре буенча республиканың социаль-икътисадый үсеше рейтингында Балык Бистәсе районы 37 нче урында тора. Тулай территориаль продукт 9,9 млрд сум тәшкил иткән. Узган ел йомгаклары буенча 1 млрд 250 мең сумлык сәнәгать продукциясе озатылган. Сәнәгать җитештерүе индексы 74,4% тәшкил итә.

Район башлыгы сүзләренә караганда, авыл хуҗалыгы тулай территориаль продуктның 40% диярлек тәэмин итә. Узган елда авыл хуҗалыгы продукциясе күләме 22,2% ка арткан һәм 3,3 млрд сум тәшкил иткән. 2025 елда 14,6 мең тонна сөт һәм 1,7 мең тонна ит җитештерелгән.  «2025 елда районның авыл хуҗалыгы берләшмәләрендә мөгезле эре терлекләр саны 9,1 мең баш тәшкил итте, шуларның 2,9 меңе – сыерлар. 2024 ел белән чагыштырганда 20% ка кимү күзәтелә (2,3 мең баш), – дип билгеләп үтте Радик Ислямов. – Узган ел килеп туган эпизоотик вәзгыять районның терлекчелек хуҗалыкларына сизелерлек йогынты ясады».

Утырышка йомгак ясап, Дәүләт Советы Рәисе урынбасары Марат Әхмәтов район халкына Татарстанның социаль-икътисадый үсешенә зур өлеш керткәннәре өчен рәхмәт белдерде. Район күрсәткечләре турында сөйләгәндә, Марат Әхмәтов аларны авыл хуҗалыгы территориясе өчен объектив дип атады. «Әмма сәнәгать җитештерүе индексының бераз кимүе бар, шул ук вакытта республикада бу күрсәткеч 10% ка арткан, шуңа күрә район башкарма комитетына һәр предприятиенең эшен анализларга һәм индекс төшү сәбәпләрен аңларга кирәк», - дип мөрәҗәгать итте Марат Әхмәтов башкарма комитет җитәкчесенә.

Марат Әхмәтов район икътисады үсешенең уңай динамикасын билгеләп үтте, Балык Бистәсе районында инвестицияләр күләменең ике тапкыр артуын хәбәр итте. Аның әйтүенчә, бизнесның башкаладан районнарга акрынлап күчү тенденциясе күзәтелә. «Бизнес әкренләп башкаладан районнарга китә», - дип билгеләп үтте Марат Әхмәтов.

Марат Әхмәтов Балык Бистәсендә яшәүчеләрнең тормыш сыйфатын яхшыртуга аерым игътибар бирергә кирәклеге хакында искәртте. «Муниципалитетның бурычы – һәр кеше турында кайгырту, аларның сәламәтлеген ныгыту һәм тормыш сыйфатын күтәрү. Чөнки нәкъ менә кеше ресурсы районның инвесторларны җәлеп итүчәнлегенең төп факторы булачак, чөнки бизнесны урнаштыру урынын сайлаганда эшмәкәрләр квалификацияле эшче көч булуга һәм яшәү өчен тудырылган уңай шартларга игътибар итәләр», – дип басым ясады Дәүләт Советы Рәисе урынбасары. 

Марат Әхмәтов район халкына махсус хәрби операциядә катнашучыларга һәм аларның гаилә әгъзаларына ярдәм итүгә зур өлеш керткәннәре өчен аерым рәхмәт белдерде, бу эшнең республикада өстенлекле булуын билгеләп үтте.

Утырыш район активына бүләкләр тапшыру белән тәмамланды.