«Кол хатын Изаура» телесериалындагы төп роле белән дөньякүләм танылу алган Бразилия актрисасы Луселия Сантос бүген «Россия – Ислам дөньясы: КазаньФорум 2026» халыкара икътисадый форум кысаларында ачылган «Хатын-кыз карашы» трегының мәртәбәле кунакларының берсе булды. Дүртенче ел рәттән трек Татарстан Республикасы Дәүләт Советының «Мәрхәмәт – Милосердие» хатын-кыз депутатлар берләшмәсе инициативасы белән уза.

Трек сессияләре башланыр алдыннан Луселия Сантос республика массакүләм мәгълүмат чаралары журналистларына эксклюзив интервью бирде һәм Татарстан башкаласы Казан турында беренче тәэсирләре белән уртаклашты.

«Казанда мин беренче тапкыр, шәһәр буйлап бераз йөреп кайтырга өлгердем һәм бик гаҗәпләндем. Казан искиткеч матур шәһәр, мин мондый архитектураны һәм гаҗәеп атмосфераны күрермен дип көтмәгән идем. Бигрәк тә кичке шәһәр гаҗәпкә калды: яктыртканда ул көндезгегә карый бөтенләй башкача күренә. Көндезге һәм төнге Казан – әйтерсең бөтенләй башка  шәһәрләр», – дип сөйләде актриса.

Бразилиядә хатын-кызларның тигез хокуклар өчен көрәшү, социаль мәсьәләләрне хәл итү турында сөйләгәндә, Луселия Сантос бу мәсьәләләрнең туган илендә дә, бөтен дөньяда да гадәттән тыш актуаль булуын билгеләп үтте. «Хатын-кыз даими рәвештә, кайда яшәвенә карамастан,  үз хокуклары өчен көрәшә, чөнки бу проблемалар глобаль характерда. Без, хатын-кызлар, барыбыз да бер генә теләк телибез – тынычлык һәм гармония», – дип басым ясады ул.

Шулай ук Луселия Сантос Бразилиядә хатын-кызларның эш хокукларын саклау һәм эшкә урнаштыру темасына да кагылды. Аның әйтүенчә, хатын-кызлар һәм ир-атларның хокуклары, элеккечә үк,  тигез түгел, һәм Бразилия хатын-кызлары даими рәвештә үз мәнфәгатьләрен якларга мәҗбүр. Бу сәясәткә дә кагыла: хатын-кызлар Хөкүмәттә квоталарга һәм лидерлык позицияләренә ирешсәләр дә, аларның вәкиллеге әле һаман да зур түгел. «Алар әлләни зур булмаган уңышларга гына ирешә», – дип йомгаклады ул.

Хәзерге тормышы турында сөйләгәндә Луселия Сантос үзенең кино һәм театрда эшләвен, шул ук вакытта актив иҗтимагый эшчәнлек алып баруын әйтте. Ул фильмнар төшерә, театр сәхнәсендә уйный, пьесалар куя һәм экология, әйләнә-тирә мохитне һәм климатны саклау мәсьәләләренә аерым игътибар бирә. «Мин инде ун елдан артык Амазонка урманнарын яклау белән шөгыльләнәм», – дип белдерде актриса.

Казанга килергә һәм «Казанфорум»да катнашырга ризалашуы турындагы сорауга актриса  бик тиз ризалык бирүен әйтте. Ул шулай ук иҗади планнары белән уртаклашты, Россия хатын-кызлары турында фильм төшерергә теләве турында сөйләде.

«Мин Россия хатын-кызлары турында фильм төшерергә телим. Миңа зур шәһәрләрдә генә түгел, илнең ерак почмакларында, авылларда яшәүче хатын-кызлар да кызыклы. Минем идея – зур Россиядә яшәүче хатын-кызларның йортына килү. Нәкъ менә шушы хатын-кызлар, мөгаен, мине «Кол хатын Изаура» сериалында караганнардыр. Мин героиня белән 24 сәгать үткәрергә телим: аның ничек яшәвен күрергә, аның тарихын тыңларга һәм мине аның йортында ничек кабул итүләрен күзәтергә. Бәлки, күп серияле проект та килеп чыгар»,  – дип сөйләде Луселия Сантос.