«Россия – Ислам дөньясы: КазанФорум 2026» халыкара икътисадый форумы кысаларында бүген «Хатын-кызларның карьера траекторияләре: мөмкинлекләр, чакырулар һәм үсеш перспективалары» сессиясе узды, ул «Хатын-кыз карашы» трегы мәйданчыгында оештырылды. Сессиянең модераторы Татарстан Республикасы хезмәт, халыкны эш белән тәэмин итү һәм социаль яклау министры Эльмира Зарипова иде, аның эшендә «Мәрхәмәт-Милосердие» хатын-кыз депутатлар берләшмәсе җитәкчесе Алсу Нәбиева һәм берләшмә әгъзалары  Ольга Воронова һәм Ирина Терентьева катнашты.

Хатын-кызлар өчен карьера мөмкинлекләре – актуаль тема, дип билгеләделәр сессия спикерлары. Төрле илләрдән килгән форумда катнашучылар үз мисалларында, әгәр дә тәвәккәлләсәң һәм үз хыялларыңа таба атласаң, уңышка ирешү һәм кыю максатларны тормышка ашыру мөмкин, дип исбатладылар. Кунаклар үз тарихлары белән уртаклаштылар. 

Мисыр сәүдә палаталары федерациясе һәм Александрия сәүдә палатасы каршындагы Эшлекле хатын-кызлар советы президенты, Халыкара сәүдә палаталары федерациясе идарәсе әгъзасы Рим Сиам билгеләп үткәнчә, «Казан Форум»  – бизнес хуҗаларын берләштерү өчен күренекле платформа. Аның әйтүенчә, форум бөтен дөньяга хезмәттәшлекнең уңышка ирешү ачкычы булуын күрсәтә. Нәкъ менә хезмәттәшлек бизнесның, җәмгыятьнең һәм бөтен илләрнең тотрыклы үсеше өчен мөмкинлекләр тудыра, шулай ук хөкүмәтләрнең үзара хезмәттәшлеге өчен яңа офыклар ача. 

Рим Сиам шулай ук Мисырда Халыкара сәүдә палаталары федерациясе эшчәнлеге турында сөйләде. Аның әйтүенчә, оешмага барлык тармаклар буенча 6 миллионлап эшмәкәр керә, һәм аларның 20%ы – хатын-кызлар.

Ул шулай ук ни өчен палатага берләшергә кирәклеген аңлатты. Әгъзалык эшмәкәрләргә остазлыкка, эшлекле элемтәләргә һәм тәҗрибә уртаклашуга юл ача. «Федерация ярдәмендә без халыкара дәрәҗәдә көчле вәкиллек һәм глобаль институтлар белән турыдан-туры хезмәттәшлек итү мөмкинлеге алабыз. Шуңа күрә мин эшкуарларыбызга һәрвакыт әйтәм: ялгыз гына эшләмәгез! Институтлар аша эшләгез, элемтәләр төзегез, бергәлекләр төзегез. Көчле икътисад изоляциядә түгел, ә кешеләр уртак чәчәк ату өчен бергә эшләгән бизнес-бергәлек аша туа», – дип басым ясады ул.

Доктор Фәхрия Әл Шибли – Оманнан табиб-дерматолог һәм Fakhriya  клиникасы хуҗасы, үзенең уңыш юлын сөйләде һәм Оман хатын-кызларына матуррак булырга ярдәм итүдән зур рәхәтлек алуы, шуның белән аларга яңа казанышлар өчен ышаныч тудыруы турында сөйләде. «Балачактан мин кешеләргә, аларның статусына һәм финанс мөмкинлекләренә карамастан, ярдәм итәргә ярата идем. Минем өчен иң мөһиме — кеше сәламәтлеге», – дип билгеләп үтте ул.

БГӘдә халыкара бизнес булдыру тәҗрибәсе белән белән BC Academy халыкара мәктәбенә һәм балалар бакчасына нигез салучы Альбина Насыйрова уртаклашты. Казан шәһәре Думасы депутаты, «Барысы да балалар өчен» коммерциягә карамаган автоном оешма җитәкчесе Далия Гайнанова үзгә балалар өчен кием бренды булдыру турында сөйләде.

Дәүләт Советының Мәгариф, мәдәният, фән һәм милли мәсьәләләр комитеты рәисе урынбасары Ирина Терентьева сессия эшенә йомгак ясап, илебездә һәм республикада хатын-кызлар лидерлыгының уңай мисаллары күп булуын билгеләп үтте. «Бездә, чыннан да, тормыш буенча тигезләнергә һәм аларның уңышына ияреп барырга мөмкин булган хатын-кызлар бар», – дип ассызыклады ул.

Сессия эшендә Берләшкән Гарәп Әмирлекләре Хөкүмәтендә Лидерлыкны үстерү, институциональ һәм психологик хәбәрдарлык буенча консультант Доха Ибраһим Йосыф Әлшеххи, Малайзия Халыкара мода палатасы (MyFashionChamber) генераль директоры һәм аңа нигез салучы Джунайда Ицхак (Джей) катнашты.Ицхак), Мисыр Гарәп Республикасының Корпоратив социаль җаваплылык буенча киңәшчесе - Финанс җайга салу буенча идарәсе башкарма рәисе Ламиз Әл Негм катнаштылар.