Бүген Казанда Ленин исемендәге мәдәни-ял итү комплексында XIII «Сәйяр» Республика балалар һәм яшүсмерләр театрлары фестивале җиңүчеләрен һәм призерларын бүләкләү тантанасы булды. Конкурста җиңүчеләрне һәм катнашучыларны Татарстан Республикасы Дәүләт Советы Рәисе вазыйфаларын башкаручы, Татарстан Республикасы Рәисе каршындагы Татар телен һәм Татарстанда яшәүче халыклар вәкилләренең  туган телләрен саклау, үстерү мәсьәләләре комиссиясе рәисе Марат Әхмәтов сәламләде.

Фестивальдә катнашучыларга һәм аларның остазларына мөрәҗәгать итеп, Марат Әхмәтов бүген татар актеры, режиссеры, татар милли театрына нигез салучыларның берсе Габдулла Кариевның тууына 140 ел тулуын искәртте һәм аның мирасын бүгенге көндә меңләгән яшь талант саклавын һәм дәвам итүен билгеләп үтте.  «Сәйяр» фестивале – уникаль проект, ул елдан-ел киңәя бара: быел гына да анда меңнән артык театр коллективы катнашты. Әгәр бу санны унга тапкырласаң (һәр театр коллективында кимендә 10 актер), колач тагын да киңәя  – инде ун мең бала үз телләрендә сәхнә осталыгын үзләштерә, – дип билгеләп үтте Марат Әхмәтов. – Без моның укучылар өчен дә, аларның остазлары өчен дә нинди катлаулы хезмәт икәнен бик яхшы аңлыйбыз».

Марат Әхмәтов фестивальнең төп бүләген – Гран-прины «Тирәк» балалар бакчасының (Түбән Мактама бистәсе, Әлмәт районы) һәм Минзәлә шәһәре гимназиясенең театр коллективларына тапшырды.

Фестиваль Татарстан Республикасы Мәгариф һәм фән министрлыгы тарафыннан Татарстан Республикасы Рәисе каршындагы Татар телен һәм Татарстан халыклар вәкилләренең туган телләрен саклау,  үстерү мәсьәләләре комиссиясе ярдәмендә үткәрелә. Фестивальне оештыруда «Сәхна» журналы редакциясе («Татмедиа» АҖ) катнаша.

Быел фестиваль 13 нче тапкыр уздырылды. 2016 елдан ул Татарстан Республикасында дәүләт телләрен һәм башка телләрне саклау, өйрәнү һәм үстерү буенча дәүләт программасы кысаларында үткәрелә. 

Конкурсның мәктәп этабы гыйнвар аенда узган. Муниципаль этап – февральдә, ул 1000гә якын иҗат коллективын колачлаган. Читтән торып республика этабы март аенда узган, анда Татарстанның 45 муниципаль берәмлегеннән 530 коллектив катнашкан. Чыгышлар татар, чуаш, удмурт һәм мари телләрендә тәкъдим ителгән.  Арадан 100 иң яхшы коллектив турыдан-туры турда катнашу өчен сайлап алынган.

Жюри балаларның чыгышларын биш зонада: Әлмәт, Яр Чаллы, Буа, Олы Әтнә һәм Казанда бәяләгән. Фестивальдә берничә яшь категориясе һәм номинацияләр каралган: мәктәпкәчә белем бирү оешмалары; гомуми белем бирү оешмалары укучылары (1-4, 5-8, 9-11 сыйныфлар).

Марат Әхмәтов республика массакүләм мәгълүмат чаралары журналистлары белән әңгәмәдә фестивальнең балаларга сәхнә осталыгын үзләштерергә ярдәм итүен әйтте. Уртак иҗат ярдәмендә катнашучылар кыюрак һәм игелеклерәк булалар, коллективта эшләргә өйрәнәләр һәм үзләрен бер зур гаилә итеп хис итәләр. Марат Әхмәтов әйтүенчә, балаларның күбесе үз тормышларын профессиональ сәхнә белән бәйләмәсә дә, алар, һичшиксез, татар театрының тугры тамашачысы булып калачак.

«Мондый проектлар ярдәмендә без гореф-гадәтләребезне һәм туган телебезне саклыйбыз. Шунысын да билгеләп үтәргә кирәк, фестивальдә республика мәктәпләреннән һәм балалар бакчаларыннан бик күп үзешчән театрлар, шул исәптән чуваш, удмурт һәм мари телләрендә спектакльләр куючы коллективлар катнаша. Татар театры үсешенә ярдәм итеп, без бер үк вакытта республикабызда яшәүче барлык халыкларның мәдәниятен кайгыртуыбызны аңлау бик күңелле»,  – диде Марат Әхмәтов.

Чарада Дәүләт Советы депутатлары Айрат Зарипов, Камил Ногаев, Ренат Вәлиуллин катнашты.