Бүген сәгать 10 да алтынчы чакырылыш Татарстан Республикасы Дәүләт Советының кырыгынчы утырышы ачылды, бу елның язгы сессиясендә ул - беренче утырыш.

Утырышның көн тәртибенә, Президиум карары нигезендә, 15 мәсьәлә кертелгән, шул исәптән 4 республика законы проекты һәм 9 федераль закон проекты.

Беренче укылышта карауга шәһәр төзелеше эшчәнлеге турында республика законнарына үзгәрешләр кертү хакында закон проектлары әзерләнгән (территорияне планлаштыру документларын тикшерү сроклары кыскара), халыкның санитар-эпидемиологик иминлеге турында (санитария-гигиена өлкәсендә республика башкарма хакимияте органнарының вәкаләтләрен төгәлләштерү өлешендә), шулай ук Татарстанның  Җир һәм Гаилә кодексларына да үзгәрешләр кертү тәкъдим ителә. Аерым алганда, ТР Гаилә кодексының 45 статьясына һәм мәгариф турында республика законының 14 статьясына кертелә торган үзгәрешләр уллыкка һәм кызлыкка алынган балаларга туган абыйлары яисә сеңелләре укый торган белем бирү оешмасында белем алу өчен өстенлекле хокук бирә.

Кырыгынчы утырышта шулай ук 2019 елның сентябреннән 2023 елның гыйнварына кадәр Дәүләт Советында «Татарстан - Яңа гасыр» депутат төркеме эше турында хисап тыңлау планлаштырыла. Әлеге мәсьәлә буенча депутат берләшмәсе җитәкчесе Артур Габделҗанов чыгыш ясаячак.

Профильле комитетлар рәисләре Альберт Хәбибуллин, Александр Тыгин һәм КПРФ фракциясе җитәкчесе Хафиз Миргалимов көн тәртибенә өстәмә сораулар кертү тәкъдиме белән чыктылар. Аерым алганда, парламентарийлар Татарстан Республикасы Конституциясенә үзгәрешләр кертү турында закон проектын караячак.

Утырышның көн тәртибе турында фикер алышу Татарстан Республикасы Дәүләт Советы кырыгынчы утырышының көн тәртибе түбәндәгечә  расланды:                                                    

1. Татарстан Республикасы җәмәгать судьясын сайлау турында.

2. «Татарстан Республикасы Конституциясенә үзгәрешләр кертү турында» 381-6 номерлы Татарстан Республикасы законы проекты хакында           (I укылыш).

3. «Татарстан Республикасында шәһәр төзелеше эшчәнлеге турында» Татарстан Республикасы Законының 18 статьясына үзгәрешләр кертү хакында» 376-6 номерлы Татарстан Республикасы законы проекты турында  (I укылыш).

4. «Татарстан Республикасы Җир кодексының 2 һәм 45 статьяларына үзгәрешләр кертү турында» 377-6 номерлы Татарстан Республикасы законы проекты хакында (I укылыш).

5. «Халыкның санитария-эпидемиология иминлеге турында» Татарстан Республикасы Законының 3 һәм 5 статьяларына үзгәрешләр кертү хакында» 379-6 номерлы Татарстан Республикасы законы проекты турында (I укылыш).

6. «Татарстан Республикасы Гаилә кодексының 45 статьясына һәм «Мәгариф турында» Татарстан Республикасы Законының 14 статьясына үзгәрешләр кертү хакында» 378-6 номерлы Татарстан Республикасы законы проекты турында (I укылыш).

7. «Татарстан Республикасының аерым закон актларына үзгәрешләр кертү турында» 380-6 номерлы Татарстан Республикасы законы проекты хакында (I укылыш).

8. Татарстан Республикасы Дәүләт Советында «Татарстан – Яңа гасыр» депутат төркеменең 2019 елның сентябреннән 2023 елның гыйнварына кадәрге эше турында хисап.

9. Татарстан Республикасы Иннополис шәһәрендә пилотсыз авиация системаларын эксплуатацияләү буенча цифрлы инновацияләр өлкәсендә эксперименталь хокукый режим билгеләү мөмкинлеге турында.

10. «Россия Федерациясенең аерым закон актларына үзгәрешләр кертү турында» 266491-8 номерлы федераль закон проекты хакында («Сириус» федераль территориясе гавами хакимият органнары вәкаләтләре составын һәм үзенчәлекләрен төгәлләштерү өлешендә).

11. «Россия Федерациясендә архив эше турында» Федераль законның               24 статьясына үзгәрешләр кертү хакында» 260061-8 номерлы федераль закон проекты турында (архив документларын һәм аларны белешү-эзләү чараларын ерактан торып куллануның дәүләт мәгълүмат системасын булдыру һәм аннан файдалану өлешендә).

12. «Эшчәнлекнең аерым төрләрен лицензияләү турында» Федераль законга һәм «Халыкның санитария-эпидемиология иминлеге турында» Федераль законның 44 статьясына үзгәрешләр кертү хакында» 65452-8 номерлы федераль закон проекты турында (лицензияләнә торган эшчәнлек төрләрен киңәйтү өлешендә).

13. «Россия Федерациясенең аерым закон актларына үзгәрешләр кертү турында» 261044-8 номерлы федераль закон проекты хакында (дәүләт реестрлары белешмәләрендәге каршылыкларны бетерү өлешендә).

14. «Россия Федерациясе Шәһәр төзелеше кодексының 60 статьясына үзгәреш кертү турында» 260064-8 номерлы федераль закон проекты хакында (төзелеш өлкәсендәге үз-үзен җайга салучы оешмаларның биналар, корылмалар милекчеләренә бу оешмалар әгъзалары тарафыннан сыйфатсыз башкарылган эшләр аркасында зыян китергән өчен җаваплылыгын җайга салуны оптимальләштерү мәсьәләсе буенча).

15. «Су белән тәэмин итү һәм суны җибәрү турында» Федераль законга үзгәрешләр кертү хакында» 254884-8 номерлы федераль закон проекты турында (коммуналь хезмәтләр күрсәтүне камилләштерү өлешендә).

16. «Административ хокук бозулар турында Россия Федерациясе кодексының 4.5 һәм 4.8 статьяларына үзгәрешләр кертү хакында» 253855-8 номерлы федераль закон проекты турында (сроклар исәпләү тәртибен төгәлләштерү хакында).

17. «Административ хокук бозулар турында Россия Федерациясе кодексының 19.61 статьясына үзгәрешләр кертү хакында» 260063-8 номерлы федераль закон проекты турында (контроль (күзәтчелек) орган тарафыннан хокук бозуларны бетерү хакында күрсәтмә бирү бурычын үтәмәгән өчен җаваплылык билгеләү турында).

18. «Административ хокук бозулар турында Россия Федерациясе кодексына үзгәрешләр кертү хакында» 265468-8 номерлы федераль закон проекты турында (Күчемсез мөлкәтнең бердәм дәүләт реестрындагы белешмәләрне хокукка каршы тараткан өчен җаваплылык билгеләү хакында).

19. «Россия Федерациясендә мәгариф турында» Федераль законның 97 һәм 98 статьяларына үзгәрешләр кертү хакында» 261070-8 номерлы федераль закон проекты турында («Белем сыйфатын бәяләүнең федераль мәгълүмат системасы» дәүләт мәгълүмат системасын булдыру өлешендә).

20. Төрлесеннән.

Сессия эшендә Татарстан Президенты Рөстәм Миңнеханов, республика Премьер-министры Алексей Песошин, Хөкүмәт әгъзалары һәм чакырылган кунаклар катнаша.

Утырышны Дәүләт Советы Рәисе Фәрит Мөхәммәтшин алып бара.

Дәүләт Советы сайтында, RuTube видеохостингында, ВКонтакте һәм "Одноклассники" социаль челтәрләрендә парламентның рәсми аккаунтларында утырышның туры трансляциясе алып барыла.