Дәүләт Советында язгы сессия ябылды. Депутатлар сентябрьдә чираттагы утырышка җыелачак. 45нче утырыш тәмамланыр алдыннан Дәүләт Советы Рәисе Фәрит Мөхәммәтшин республика парламентының быелның беренче яртыеллыгындагы эшенә йомгак ясады һәм алдагы чорның өстенлекле юнәлешләрен билгеләде.

Быелның беренче яртыеллыгында Дәүләт Советының 6 утырышы уздырылган, 140тан артык мәсьәлә каралган, 56 Закон (шуларның 8се база законы) һәм 200дән артык карар кабул ителгән. "Бүген без регламент нигезендә ТР Рәисенә имза салуга җибәреләчәк тагын берничә закон проектын кабул иттек", - дип билгеләп үтте Фәрит Мөхәммәтшин.

Шулай ук беренче яртыеллыкта Президиумның 7 утырышы узган. 25 мәсьәлә каралган, 31 карар кабул ителгән. Парламент башлыгы Президиумның күчмә утырышы көн тәртибендәге актуаль мәсьәләләрнең берсе итеп республиканың яшь гражданнарына патриотик тәрбия бирү мәсьәләсен карауны билгеләде. 

"Агымдагы ел башында закон чыгару эшчәнлеге республиканың төп законына төзәтмәләр кабул ителү белән билгеләнде, федераль һәм төбәк законнарын гармонияләштерү буенча планлы эш башкарылды", - дип билгеләп үтте Фәрит Мөхәммәтшин һәм депутатларга Татарстан Конституциясенең яңа нигезләмәләрен җентекләп тикшергән өчен рәхмәт белдерде.

Фәрит Мөхәммәтшин кабул ителгән иң мөһим законнар арасында бер гаиләдә тәрбияләнүче балаларны белем бирү оешмаларына кабул итүнең өстенлекле хокукына, аучылык итүгә рөхсәт бирү тәртибен билгеләүгә, матди булмаган этномәдәни байлыклар өлкәсендәге мөнәсәбәтләрне регламентацияләүгә, оешмалар өчен салым ташламаларының гамәлдә булу вакытын озайтуга кагылышлы документларны атады.

Татарстан Дәүләт Советы беренче яртыеллыкта РФ Хөкүмәте рәисе Михаил Мишустинга һәм РФ Федераль Җыены Дәүләт Думасы Рәисе Вячеслав Володинга 3 мөрәҗәгать юллаган. Мөрәҗәгатьләрдә тәрбия эше һәм балалар иҗтимагый берләшмәләре белән хезмәттәшлек буенча директор киңәшчесе вазыйфасын хезмәт пенсиясен вакытыннан алда билгеләүгә хокук бирүче вазыйфалар исемлегенә кертү, экологик хисап бирү, сирәк (орфан) авырулардан интегүче затларны дарулар белән тәэмин итү өлкәсендәге таләпләрне камилләштерү мәсьәләләре күтәрелгән.

Шулай ук быелның беренче яртыеллыгында Татарстан Дәүләт Советы тарафыннан 4 федераль закон проекты инициативасы белән чыгарылган, шуларның өчесе Дәүләт Думасында карала. «Ау вакытында куркынычсызлык дәрәҗәсен күтәрүгә юнәлдерелгән закон проекты парламентның түбән палатасы тарафыннан беренче укылышта кабул ителде, - диде Фәрит Мөхәммәтшин, - тагын ике проектка (этил спирты һәм спиртлы азык-төлек булмаган продукцияне ваклап сату өчен административ җаваплылык билгеләү һәм калдыклар белән эш итүне комплекслы камилләштерү турында) РФ Хөкүмәтенең тискәре нәтиҗәләре алынды, әмма депутатларда кызыксыну бар, шуңа күрә алар элеккечә Дәүләт Думасы каравында кала.

Фәрит Мөхәммәтшин билгеләп үткәнчә, язгы сессия чорында фракцияләр һәм депутат төркемнәре актив эшләгән. Мәсәлән, "Бердәм Россия" 6 җыелыш үткәргән, 19 мәсьәлә каралган, шул исәптән партия һәм илкүләм проектларны гамәлгә ашыруның барышы, сайлаучыларның наказларын һәм гражданнар җыеннарында килгән тәкъдимнәрне үтәү, Татарстан Республикасы мәгариф учреждениеләрендә яшьләрнең патриотизмын һәм гражданлык җаваплылыгын тәрбияләү турында. КПРФ фракциясе әгъзалары 5 утырыш үткәргән, алар 379 депутат мөрәҗәгате җибәргән. Парламент башлыгы Идел буе федераль округы хатын- кыз депутатларының стратегик сессиясе кысаларында «Мәрхәмәт-Милосердие» депутат берләшмәсе эшен аерым билгеләп үтте. "Татарстан - яңа гасыр" депутатлар төркеме 5 утырыш үткәргән. Импортны алмаштыру шартларында предприятиеләр эшенә һәм яшь буынны патриотик тәрбияләү мәсьәләләренә аерым игътибар бирелә.

Беренче яртыеллыкта комитетлар тарафыннан 62 утырыш, шул исәптән 14 күчмә утырыш уздырылган, 249 мәсьәлә каралган. "Күчмә утырышлар форматы комитетлар эшендә ешрак кулланыла башлады, - диде Фәрит Мөхәммәтшин, - бу киң җәмәгатьчелекне җәлеп итеп, көн тәртибендәге мәсьәләләрне тирәнрәк һәм җентеклерәк эшкәртү мөмкинлеге бирә».

Закон чыгару процессына комитетлар каршындагы Эксперт советлары җитди өлеш керткән, алар, Фәрит Мөхәммәтшин әйтүенчә, закон инициативаларын тикшерү өчен нәтиҗәле мәйданчык булган. Әйтик, быелның җиде аенда җәмәгатьчелекне, хокук кулланучыларны, профильле белгечләрне җәлеп итеп, 42 утырыш үткәрелгән, 174 мәсьәлә каралган.

Фәрит Мөхәммәтшин Яшьләр парламентының эшен "продуктив " дип бәяләде. Әйтик, яшь парламентарийлар тарафыннан эшләнгән ата-ана рөхсәтеннән башка балигъ булмаганнарга татуировка ясауны тыю турындагы закон проекты Дәүләт Думасы каршындагы Яшьләр парламенты утырышында, Идел буе федераль округының Яшьләр парламентлары Ассоциациясендә һәм Идел буе федераль округы субъектларының дәүләт хакимияте закон чыгару органнары Ассоциациясендә каралган һәм уңай җаваплар алган.

Фәрит Мөхәммәтшин парламентара элемтәләрне үстерүгә аерым тукталды. Республика парламенты Россия һәм Белоруссия Берләшкән дәүләте һәм Бәйсез Дәүләтләр берләшмәсе киңлегендә үзара хезмәттәшлекне активлаштыра.

Фәрит Мөхәммәтшин билгеләп үткәнчә, республикада һәм федераль үзәктә Татарстанда «Россия – Ислам дөньясы: Казан форумы 2023»халыкара икътисадый форумын уздыруга зур әһәмият бирелгән. "Халыкара дәрәҗәдәге чаралар үткәрү тагын бер кат шуны күрсәтә: без гармонияле, продуктив мәдәниятара һәм цивилизацияара диалог тарафдарлары булдык һәм булып калабыз һәм бөтенләй төрле өлкәләрдә дус илләр белән үзара файдалы хезмәттәшлекне үстерәчәкбез», - дип ассызыклады парламент башлыгы.

Депутатлар эшчәнлегенең өстенлекле юнәлешләренең берсе булып гражданнар мөрәҗәгатьләре белән эшләү кала. Беренче яртыеллыкта парламентарийлар 2,6 меңнән артык кешене кабул иткән, 6,8 меңнән артык мөрәҗәгать каралган.

Алдагы чорда, Фәрит Мөхәммәтшин билгеләп үткәнчә, парламент илнең үсеш максатларын, илкүләм проектларны һәм республика программаларын гамәлгә ашыруны законнар һәм бюджет белән тәэмин итүне дәвам итәчәк. Депутатларның аерым контролендә – Социаль юнәлештәге мәсьәләләр: халык белән эшләү, волонтерларга, махсус хәрби операция геройларына, хәрбиләргә һәм аларның гаилә әгъзаларына ярдәм итү, патриотик тәрбия мәсьәләләре, традицион рухи-әхлакый кыйммәтләрне ныгыту, Россия Федерациясендә педагог һәм остаз елы, Татарстанда милли мәдәниятләр һәм традицияләр елы кысаларында чараларны гамәлгә ашыру. Республика башлыгы билгеләп үткәнчә, үсешнең өстенлекле юнәлешләре буенча парламентарийлар эше дәвам итәчәк: технологик суверенитетны тәэмин итү, икътисадны яңа чынбарлыкка структуралы яраклаштыру, цифрлаштыру, импортны алмаштыру, эшкуарлыкны үстерү, авылга ярдәм итү. 

"Илдәге соңгы вакыйгалар милли лидерыбыз Владимир Путин тирәсендә бердәмлегебезне ачык итеп күрсәтте, - дип ассызыклады Фәрит Мөхәммәтшин, чыгышын тәмамлап, - яңа чакыруларга уңышлы каршы тору өчен без киләчәктә дә күпмилләтле Ватаныбызның алга таба үсеше хакына иҗтимагый хакимият органнарының берләшүен күрсәтергә тиешбез".

Парламент башлыгы шулай ук республика җитәкчелегенә, барлык дәрәҗәдәге депутатларга, сенаторларга, профильле министрлыклар һәм ведомстволар җитәкчеләренә, иҗтимагый оешмалар һәм экспертлар берләшмәсе вәкилләренә, массакүләм мәгълүмат чараларына нәтиҗәле уртак эш һәм конструктив хезмәттәшлек өчен рәхмәт белдерде.