Бүген Казан шәһәренең Идел буе дәүләт физик культура, спорт һәм туризм университетында РФ Идел буе федераль округы субъектлары хакимиятенең закон чыгару органнары каршындагы Яшьләр парламентлары ассоциациясе утырышында Идел буе федераль округы төбәкләрендә эчке туризмны үстерү мәсьәләләре турында фикер алыштылар. Идел буеның яшь парламентарийлары туризм өлкәсендәге уңышлы тәҗрибәләре белән уртаклаштылар. Утырыш эшендә Дәүләт Советы Рәисе Фәрит Мөхәммәтшин катнашты.

Утырышта шулай ук Россия Президентының Идел буе федераль округындагы Тулы вәкаләтле вәкиле урынбасары Олег Машковцев, Идел буе Закон чыгаручылар советы рәисе, Түбән Новгород өлкәсе Закон чыгару Җыелышы Рәисе Евгений Люлин, Татарстан Республикасы буенча Баш федераль инспектор Виктор Демидов, Идел буе төбәкләре парламентлары башлыклары катнашты.

Утырышны ачып, Олег Машковцев билгеләп үткәнчә, әлеге мәйданчык хакимиятнең закон чыгару органнары өчен кирәкле һәм файдалы, ә туризм өлкәсен үстерү мәсьәләсе – Идел буе федераль округы регионнары өчен әһәмиятле мәсьәләләрнең берсе.

«Туризм безнең округ өчен принципиаль әһәмияткә ия, – диде ул басым ясап. – Барлык төбәкләр дә туристлык тармагында үсеш күрсәтә. Мәдәнияте һәм традицияләре бай булган күпмилләтле һәм күпконфессияле Идел буе федераль округы өчен туризм өлкәсе һәм туристларны җәлеп итү үсеш өчен мөһим юнәлеш булып тора, шул исәптән икътисадый яктан да. Үз илен танып белергә теләгән, сәяхәт итәргә яраткан һәм юл йөреп рухи яктан тагын да камилләшергә  теләгән яшьләр, үзләре белән аралашкан кешеләрнең фикерләренә дә нигезләнгән тәкъдимнәрен бирсеннәр өчен бу темага яшьләр парламентларын җәлеп итәбез».

Олег Машковцев Татарстанны туризмны үстерү буенча алдынгы төбәкләрнең берсе дип атады. «Татарстан һәм Түбән Новгород өлкәсе кебек төбәкләр бөтен ил масштабында туриндустрия флагманнары булып тора. Шул ук вакытта Идел буе федераль округы төбәкләрендә туризм даирәсе тигез үсми, һәм аерым регионнарда потенциал зур булса да, әлегә җитәрлек дәрәҗәдә ачылмаган. Моңа бәйле рәвештә булган механизмнарны игътибар белән өйрәнергә һәм проблемалы урыннарны ачыкларга кирәк, шул исәптән законнар өлкәсендә дә», – дип белдерде Олег Машковцев.

Дәүләт Советы Рәисе Фәрит Мөхәммәтшин утырышта катнашучыларга 2022 елда нәкъ менә Татарстан парламентында Идел буе федераль округы субъектларының Яшьләр парламентлары ассоциациясен төзү турында тарихи карар кабул ителүен искәртте.

«Яшьләр парламентлары ассоциациясе эшләгән елларда аның эшчәнлеге даими рәвештә оптимальләштерелде һәм системалаштырылды, бу аны тагын да нәтиҗәлерәк итте һәм бүген Идел буе федераль округы субъектларында яшьләр парламентлары закон чыгару кырында үз урыннарын яулады, яшьләр белән эшли һәм күп тәкъдимнәр кертә дип әйтергә була», – диде Фәрит Мөхәммәтшин.

Фәрит Мөхәммәтшин шулай ук яшь парламентарийларның игътибарын яшьләр оешмаларының шәһәр һәм район Советлары белән хезмәттәшлекне көчәйтергә кирәклегенә юнәлтте.

«Башкача ярамый. Яшьләр – безнең алмаш, иртәгәге көнебез, республиканың киләчәге, – дип ассызыклады парламент җитәкчесе. – Татарстанда яшәүче 4 миллионнан артык кешенең миллионнан артыгы –яшьләр. Һәм алар белән эшләү – дәүләт хакимияте органнары эшчәнлегенең мөһим юнәлеше». 

 «Яшьләр парламентарийлары эшенең сыйфатын һәм нәтиҗәлелеген күтәрү өчен аңлаешлы һәм объектив бәяләү системасы кирәк. – дип билгеләп үтте Идел буе Закон чыгаручылар советы рәисе Евгений Люлин. – Яшь парламентарийлар тәкъдим иткән күрсәткечләр закон чыгару эшчәнлегеннән һәм яшьләр сәясәтен формалаштыруда катнашудан алып агарту эшенә һәм мәгълүматның ачыклыгына кадәр барлык төп юнәлешләрне колачлый. Бу яшьләр палаталары эшенең нәтиҗәлелегенең конкрет нәтиҗәләрен бәяләргә мөмкинлек бирәчәк».

Идел буе федераль округында эчке туризмны үстерү буенча яшьләр инициативалары турында Татарстан Дәүләт Советы каршындагы Яшьләр парламенты рәисе Дамир Нургалиев сөйләде. Ул билгеләп үткәнчә, Идел буенда яшьләр туристик клублары һәм волонтерлык берләшмәләре челтәре уңышлы формалаша, шулай ук эчке туризм өлкәсендә студентлар инициативаларына грант ярдәме күрсәтелә, яшьләр региональ туристик брендлар һәм маршрутлар эшләүгә актив җәлеп ителә.

 «Узган ел нәтиҗәләре буенча Россия эчендә туристлык сәфәрләренең гомуми саны якынча 92 млн га җитте, бу тарихи рекорд», – дип  белдерде Дамир Нургалиев.

Шулай ук эчке туризмны үстерү өчен, республиканың яшьләр парламенты рәисе әйтүенчә, цифрлы технологияләр һәм яшь белгечләрне, айти-белгечләрне һәм медиаактивистларны актив җәлеп итеп, креатив алымнар кулланыла. Дамир Нургалиев сөйләвенчә, хәзер яшьләр командалары Идел буе федераль округы төбәкләренең интерактив туристик картасын төзү белән шөгыльләнә.

 «Татарстан округның барлык эчке туризмын цифрлаштырып мәйданчык булдыру бурычын үз өстенә алды, – дип сөйләде Дамир Нургалиев журналистларга. – Иң мөһиме – барлык кирәкле әйберләрне: мәдәни программаны, кухняны, туристлык маршрутларын берләштерү. Болар барысы да Идел буе федераль округы яшьләре белән берлектә оештырылачак. Безнең бурыч – Идел буе төбәкләрендә булган туристлар Идел буе федераль округының барлык мәдәни урыннарыннан тулысынча һәм ирекле файдалана алсын өчен гомуми интернет-мәйданчык булдыру».

Идел буе федераль округы регионнары территориясендә туристлык тармагын үстерү мәсьәләләре буенча фикер алышу иртәгә Казан Ратушасында узачак Идел буе федераль округы Закон чыгаручылар советының пленар утырышында дәвам итәчәк.