Бүген Дәүләт Советында дәүләт һәм муниципаль хезмәткәрләр өчен "Татарстан Республикасы үсеше проблемаларын хәл итүдә республика парламентының дәүләт хакимияте һәм җирле үзидарә органнары белән хезмәттәшлеге" программасы кысаларында семинар узды. Дәресне ТР Дәүләт Советы депутаты Римма Ратникова үткәрде.

Республика парламенты эшчәнлеге турында сөйләгәндә, Римма Ратникова республиканың социаль-икътисади үсешенең ышанычлы закон нигезенә таянуын билгеләп үтте. "Республикадагы иң югары вәкиллекле дәүләт органында җәмгыятьнең барлык иҗтимагый-сәяси төрлелеге тәкъдим ителгән, - диде ул. - Законнар чыгару парламент эшчәнлегендә төп урынны биләп тора, округларда сайлаучылар белән эшләүгә, гражданнар мөрәҗәгатьләре белән эшләүгә, илнең федераль парламенты, РФ төбәк парламентлары һәм чит илләр парламентлары белән хезмәттәшлеккә зур игътибар бирелә".

Римма Ратникова яшь дәүләт хезмәткәрләренә республикада сайлау системасы, комитетлар һәм фракцияләр эше, закон чыгару эшчәнлеге һәм башкалар турында җентекләп сөйләде.

Семинардан соң семинарда катнашучылар парламент үзәге буйлап экскурсия үткәрделәр, аның барышында Дәүләт Советының утырышлар залында, рәсми делегацияләрне кабул итү залында, Татарстан парламентаризмы тарихы музеенда, матбугат үзәгендә һәм китапханәдә булдылар.