Бүген Кировта узган Россия Федерациясе Идел буе федераль округы субъектларының дәүләт хакимияте закон чыгару органнары каршындагы Яшьләр парламентлары ассоциациясе утырышында яшьләрне патриотик тәрбияләү, авыл халкының сәламәтлеген саклау һәм авылларда  кадрлар потенциалын үстерү мәсьәләләре буенча фикер алыштылар. Утырыш эшендә Дәүләт Советы Рәисе Фәрит Мөхәммәтшин катнашты.

Ассоциация утырышында шулай ук Россия Президентының Идел буе федераль округындагы Тулы вәкаләтле вәкиле урынбасары Олег Машковцев, Идел буе Закон чыгаручылар ассоциациясе координаторы, Түбән Новгород өлкәсе Закон чыгару Җыелышы Рәисе Евгений Люлин, Идел буе федераль округының 14 субъектыннан парламент башлыклары катнашты.

«Яшь парламентарийлар» урыннарда яшьләрнең тәкъдимнәрен һәм сорауларын җыю өчен яшьләр һәм төбәкләрнең закон чыгару хакимияте органнары арасында» бәйләүче звено» булырга тиеш", - дип басым ясады Россия Президентының Идел буе федераль округындагы Тулы вәкаләтле вәкиле урынбасары Олег Машковцев утырышта катнашучыларга мөрәҗәгать итеп. Ул шулай ук Яшьләр парламентлары әгъзаларына бүген төбәкләрдә һәм федераль дәрәҗәдә барган патриотик тәрбия буенча зур эшкә актив кушылырга кирәклеген билгеләп үтте.

РФ Президентының Идел буе федераль округы Тулы вәкаләтле вәкиле урынбасары яшьләрне тәрбияләү системасын норматив-хокукый җайга салуның һәм төбәкләрдә хәрби-патриотик эшнең төп юнәлешләре бердәм булырга тиешлегенә басым ясады. Бу хакта күптән түгел Идел буе федераль округының «іВолга» яшьләр форумында сүз барды, ә бүген яшьләр парламенты ассоциациясе әгъзалары әлеге форумда катнашучылар тарафыннан эшләнгән «Россия Федерациясе субъектында патриотик тәрбия турында» модель законны хупладылар.  

Документ авторлары патриотик тәрбия системасын һәм актив гражданлык позициясен формалаштыруда Татарстан тәҗрибәсен, аерым алганда, республикада нәтиҗәле эшләүче «Татарстан Республикасы балаларын һәм яшьләрен патриотик тәрбияләү концепциясен» билгеләп үттеләр.  

Ассоциация утырышында төбәк яшьләр парламентлары җитәкчеләре авыл халкының сәламәтлеген саклау мәсьәләләренә аерым тукталдылар. Яшь парламентарийлар фикеренчә, бүгенге көндә авыл халкының сәламәтлеген саклау проблемасы турыдан-туры медицина кадрлары кытлыгы белән бәйле. Авылда кадрлар проблемасы медицина өлкәсенә генә кагылмый. Ассоциация әгъзалары фикеренчә, бүгенге көндә хәтта зур авыл хуҗалыгы предприятиеләре дә белгечләр таба алмый, мәдәният, мәгариф һәм спорт оешмаларында хәл тагын да катлаулырак. Ассоциация әгъзалары берничә конкрет тәкъдимнәр белән чыгыш ясадылар, алар арасында авыл медиклары өчен өстәмә ярдәм чаралары кертү, авылда эшләүче яшь эшмәкәрләр өчен төбәк салым ташламалары кертү, агросәнәгать комплексы өлкәсендә белем бирү программалары буенча максатчан укытуга кабул итү квотасын арттыру һ. б.

Авыл яшьләре проблемалары турында бүген күп тапкырлар әйтелде. Бу тема беренче тапкыр быел май аенда Пермьдә РФ субъектларының дәүләт хакимияте закон чыгару органнары каршындагы Яшьләр парламентлары ассоциациясе утырышында яңгырады. Исегезгә төшерәбез, ул вакытта фикер алышу барышында Татарстан Дәүләт Советы Рәисе Фәрит Мөхәммәтшин яшь парламентарийларны авыл яшьләре проблемаларына аерым игътибар бирергә, төбәкләрдә авылларны үстерү, яшьләрне авылда калдыру белән бәйле вәзгыятьне җентекләп өйрәнергә чакырды. Ул вакытта парламент башлыгы авылда туган яшьләрнең шәһәрдә белем алганнан соң кире авылга кайтмавы турында аеруча борчылуын белдерде.   

"Авыл яшьләренә игътибар артты, һәм бу шатландыра, - дип басым ясады республика парламенты башлыгы, утырышта коллегаларына мөрәҗәгать итеп, - ассоциациянең алдагы утырышында бу теманы күтәреп, без хакимият органнарының игътибарын әлеге проблемага җәлеп иттек, һәм бүген башланган эшне дәвам итәргә кирәк. Безнең авылларда талантлы яшьләр күп, бу безнең таянычыбыз». Фәрит Мөхәммәтшин шулай ук бүген «авылның  картаюын», авыл халкының саны илнең барлык төбәкләрендә диярлек кими баруын, ә нәкъ менә «авылда күпмилләтле халкыбызның иң яхшы гореф-гадәтләре, мәдәнияты һәм рухы сакланун әйтте.

"Бүген проблеманың яңа катламнары күтәрелде, һәм, иң мөһиме, аларны ничек хәл итәргә дигән тәкъдимнәр билгеләнде, - дип билгеләп үтте Фәрит Мөхәммәтшин, утырышка йомгак ясап, журналистлар белән аралашканда, - минемчә, бу мәсьәләләр һәрвакыт безнең контрольдә булырга тиеш. Яшь парламентарийлар ярдәмендә без бу проблемалар буенча  фикер алышуны дәвам итәчәкбез, һәм иң мөһиме, аларның тавышын ишетәчәкбез дип ышанам".      

Идел Буе төбәкләрендә яшьләр сәясәтен гамәлгә ашыру һәм авыл яшьләренә ярдәм итү мәсьәләләре буенча фикер алышу иртәгә Кировта узачак Идел буе федераль округы Закон чыгаручылар ассоциациясе утырышында дәвам итәчәк.