Дәүләт Советы депутатларының округларда эше дәвам итә. Бу атнада парламентарийлар гражданнарны кабул итте, гражданнар җыеннарында, шулай ук шәһәр һәм район советларының хисап утырышларында катнашты, хезмәт коллективлары белән очрашты.

2 февральдә Алексеевск муниципаль районы Советы утырышы булды, аның эшендә Законлылык һәм хокук тәртибе комитеты рәисе урынбасары Александр Чубаров һәм Дәүләт Советы депутаты Фоат Вәлиев катнашты. Совет утырышында районның 2023 елдагы социаль-икътисади үсешенә йомгак ясалды. Район башлыгы Сергей Демидов үз чыгышында билгеләп үткәнчә, узган ел йомгаклары буенча Алексеевск районы муниципалитетлар рейтингында 13 нче урынны алган, ә районның берләштерелгән бюджетына 1,33 млрд  сумнан артык акча кергән. Сессия башланыр алдыннан парламентарийлар һәм утырышта катнашучылар районның сәнәгать һәм инвестицион потенциалы белән таныштылар.

1 февральдә “Ак барс” көрәш сараенда “Ватаным Татарстан” газетасы редакциясе призына герой-шагыйрь Муса Җәлил истәлегенә көрәш буенча республика ярышларын ачу тантанасы булды. Спортчыларга, турнирны оештыручыларга сәламләү сүзләре белән ТР Дәүләт Советы Рәисе урынбасары, “Көрәш” федерациясенең президиумы рәисе Марат Әхмәтов мөрәҗәгать итте. Быел турнир 61 нче тапкыр уза, анда 40 ка якын команда катнаша.

1 февральдә Буа муниципаль районының Чуаш Киштәге авыл җирлегендә Закон һәм хокук тәртибе комитеты рәисе Шакир Яһудин катнашында халык җыены булып узды. Җыенда 2023 елда эшкә йомгак ясадылар һәм 2024 елга планнарны билгеләделәр. Моннан тыш, авыл үсешенең агымдагы мәсьәләләре дә күтәрелде.

1 февральдә Тәтештә Идел аръягы зонасында «Татарстан - казанышлар республикасы» автобус марафонына старт бирелде. Марафонның максаты  – ил, республика, район казанышлары турында сөйләү. Тәтеш районында РФ Дәүләт Думасы депутаты Илдар Гыйльметдинов һәм Тәтеш муниципаль районы башлыгы Рәмис Сафиуллов чараның спикерлары булдылар. Тәтеш районында илкүләм проектларны һәм дәүләт программаларын гамәлгә ашыруга аерым игътибар бирелә. "Илкүләм проектларның һәм федераль һәм республика программаларының безнең республикага нинди йогынты ясавын аңлау өчен, районнар буйлап үтәргә һәм аларның ничек үзгәргәнен күрергә кирәк. Алар күпкә матурайганнар, яңа объектлар барлыкка килгән. Без, депутатлар һәм чиновниклар республиканың ничек үзгәрүе турында сөйләгәндә  –  бу бер тарих, ә кешеләрнең бу объектлардан файдаланганда шатланулары – бөтенләй башка. Татарстан илкүләм проектларда һәм федераль программаларда башка төбәкләргә караганда күпкә активрак», - дип сөйләде мәйданчыкның модераторы ТР Дәүләт Советы депутаты Римма Ратникова.

31 гыйнварда Икътисад, инвестицияләр һәм эшкуарлык комитеты рәисе урынбасары Ринат Гайзатуллин Буа муниципаль районының Тимбай авыл җирлегенең гражданнар җыенында катнашты, шулай ук районның хезмәт коллективлары белән очрашты. Халык җыеннарында район эшенә йомгаклар ясалды, шулай ук агымдагы елга планнар ясалды.

31 гыйнварда Дәүләт Советы депутаты Руслан Нигъмәтуллин Яр Чаллы шәһәре җитәкчелеге белән очрашуларда катнашты. Депутат үзенең Электротехник округында һәм гомумән шәһәрдә эшләвенә нәтиҗә ясады. 2023 елда округның 10 микрорайонының һәрберсендә ул Территориаль иҗтимагый үзидарә активы һәм йортлар буенча өлкәннәр белән киңәшмә үткәргән, күчмә җәмәгать кабул итү бүлмәләрендә сайлаучылар кабул иткән, ишегалды бәйрәмнәрен һәм Күрше көннәрен оештырырга ярдәм иткән. 2023 елда Руслан Нигъмәтуллин адресына гражданнарның 700 гә якын мөрәҗәгате кергән. Яртысыннан артыгы - адреслы ярдәм турында үтенечләр. Моннан тыш, автошәһәр халкы депутатка торак-коммуналь хуҗалык, мәгариф, сәламәтлек саклау, социаль яклау һәм икътисадны үстерү мәсьәләләре белән мөрәҗәгать иткән.

27 гыйнварда «Россия - минем тарих» дип аталган Казан паркында «Ленинград блокадасы турында 80 факт» күргәзмәсе ачылды.  Чарада Мәгариф, мәдәният, фән һәм милли мәсьәләләр комитеты рәисе урынбасары Людмила Рыбакова катнашты. Экспозиция кысаларында Ленинград блокадасы һәм аны яклаучыларның героизмы турындагы фактларны ача торган документлар һәм фотосурәтләр тәкъдим ителгән.

26 гыйнварда Бюджет, салымнар һәм финанс комитеты рәисе урынбасары Камил Нугаев эш сәфәре белән Сарман муниципаль районында булды. Депутат район башлыгы Фәрит Хөснуллин белән бергә бала тудыру йортында булды һәм күп балалы гаиләгә, шулай ук ире махсус хәрби операциядә булганда беренче баласын тапкан ханымга бүләкләр тапшырды. Шул ук көнне Камил Нугаев Азалак авыл җирлегенең хисап җыелышында катнашты һәм ТР социаль-икътисадый үсеше нәтиҗәләре буенча чыгыш ясады, алда торган сайлаулар турында мәгълүмат бирде, илкүләм проектларны һәм программаларны гамәлгә ашыру турында сөйләде.

25 гыйнварда Законлылык һәм хокук тәртибе буенча рәис Шакир Яһудин Чүпрәле һәм Буа районнары гражданнары җыеннарында катнашты. Чүпрәле районының Мөчәли  авылында депутат шулай ук урта гомуми белем бирү мәктәбендә булды һәм укучыларның иминлеген тәэмин итү мәсьәләләре буенча фикер алышты.

25 гыйнварда Мәгариф, мәдәният, фән һәм милли мәсьәләләр комитеты рәисе Айрат Зарипов Әгерҗе районы җыенында катнашты. Моннан тыш, комитет җитәкчесе мари этномәдәни компонентлы Бима урта гомуми белем бирү мәктәбендә булды, республика программасы кысаларында ремонтланган азык-төлек блогын карады һәм мәктәп музее белән танышты, анда махсус хәрби операциядә катнашучыларына багышланган экспозиция ачылган.

25 гыйнварда Социаль сәясәт комитеты рәисе Светлана Захарова “Чаллы медицина көллияте” хезмәт коллективы белән очрашты. Моннан тыш, 4 нче урта гомумбелем бирү мәктәбендә халык белән очрашу узды.

25 гыйнварда Торак сәясәте һәм инфраструктура үсеше комитеты рәисе урынбасары Камил Садриев Теләче районының Алан авыл җирлеге гражданнары җыенында катнашты. Төп сораулар арасында - Алан авыл җирлегенең социаль-икътисади үсеше нәтиҗәләре. Моннан тыш, халыкка социаль-көнкүреш хезмәте күрсәтү, юл эшләре программасын гамәлгә ашыру, шулай ук төрле объектларда, шул исәптән торак йортларда янгын куркынычсызлыгын тәэмин итү буенча профилактик чаралар үткәрү мәсьәләләре буенча фикер алышынды.