Бүген Казанда, «Татэнергосбыт» АҖ мәйданчыгында Торак сәясәте һәм инфраструктура үсеше комитетының һәм комитет каршындагы Экспертлар советының күчмә утырышы узды. Утырышта катнашучылар халыкка сыйфатлы торак-коммуналь хезмәтләр күрсәтүдә закон чыгару аспектлары, шулай ук «Татэнергосбыт»АҖ базасында Бердәм исәп-хисап үзәге эше мәсьәләләре буенча фикер алыштылар. Моннан тыш, утырышта күпфатирлы йортларда гомуми милекне капиталь ремонтлауны оештыру һәм автомобиль юллары һәм юл эшчәнлеге турында республика законнарына үзгәрешләр кертү турында закон проектлары каралды. Утырыш эшендә Дәүләт Советы Рәисе урынбасары Юрий Камалтынов катнашты.

Утырышны ачып, Торак сәясәте һәм инфраструктура үсеше комитеты рәисе урынбасары Камил Садриев 2023 ел йомгаклары буенча Татарстанда торак-коммуналь хезмәтләр өчен халыктан түләүләрнең 99,2% җыелуын ассызыклады. «Мондый югары дәрәҗәне, шул исәптән «Татэнергосбыт» АҖ базасындагы Бердәм исәп-хисап үзәге эше ярдәмендә, саклап калырга мөмкин, – дип билгеләп үтте Камил Садриев.

«Татэнергосбыт» АҖнең Бердәм исәп-хисап үзәге буларак эшчәнлеге турында Дәүләт Советы депутаты, «Татэнергосбыт» АҖ директоры Рифнур Сөләйманов сөйләде. Оешма эшенең төп өстенлеге, Рифнур Сөләйманов әйтүенчә, кулланучыларга барлык хезмәтләр буенча мәгълүмат алырга мөмкинлек бирүче бердәм түләү документы һәм түләү хисабына кергән суммаларны ресурслар белән тәэмин итүче оешмаларның акчаларны вакытында һәм тулы күләмдә алуын тәэмин итүче автомат рәвештә бүлү. Моннан тыш, Бердәм исәп-хисап үзәге торак-коммуналь хезмәтләр өчен түләүнең бердәм тәртибен, хезмәт күрсәтүнең бердәм схемасын тәэмин итә.

Бүгенге көндә «Татэнергосбыт» АҖ электр энергиясен гарантияләүче тәэмин итүче һәм Бердәм исәп-хисап үзәге буларак 1,9 млн физик һәм 45 мең юридик затка хезмәт күрсәтә. Компания кулланучылар һәм 300дән артык электр энергиясе күмәртәләп һәм ваклап сату базарларында катнашучы, 350 идарәче оешма, 123 ресурс белән тәэмин итүче оешма, ике ТКҖ операторы, республиканың капиталь ремонт һәм челтәр оешмасы мәгълүматларын берләштерә. Ай саен торак-коммуналь хуҗалык буенча 5 млрд сумнан артык суммага уртача  2 млн тирәсе түләү эшкәртелә.

«Татэнергосбыт» АҖнең Бердәм исәп-хисап үзәге буларак югары дәрәҗәдәге эшен ТР Дәүләт торак инспекциясе башлыгы Александр Тыгин билгеләп үтте.  "Бүген Үзәкнең нәкъ менә гарантияле тәэмин итүчеләр базасында исәп-хисап үзәкләре системасының өстенлеген һәм нәтиҗәлелеген исбатлаучы зур мәгълүмат базасын саклаучы булуын билгеләп үтәргә мөмкин, – дип белдерде Александр Тыгин. – Биш ел элек без аерым районнарда исәпләүләр белән нәрсә булганын белми идек, аерым идарәче компанияләрдә нәрсә булганын анализлый алмадык. Бу тәҗрибәне үстерергә кирәк дип саныйм. Без бу мәсьәләне законнар дәрәҗәсендә җайга салырга телибез, шуңа күрә бердәм база булдыру мөмкинлеге һәркемдә дә булсын, асылда бу региональ исәп операторы.

Торак инспекциясе башлыгы әйткән тәкъдимнәр арасында - барлык идарәче компанияләрнең бухгалтерлык исәбен алып бару мөмкинлеген карау, гомум йорт исәп-хисап приборы күрсәтмәләреннән чыгып, гомуми милекне тотуга коммуналь ресурслар өчен түләү тәртибен билгеләү.

Моннан тыш, Александр Тыгин торак милекчеләре ширкәтләре һәм идарәче компанияләре хезмәткәрләренең квалификация дәрәҗәсенә бертөрле таләпләр кую кирәклеген билгеләп үтте. Торак инспекциясе башлыгы ассызыклаганча, "закон барлык субъектлар – торак милекчеләре ширкәтләре һәм идарәче компанияләр өчен дә бертөрле булырга тиеш". "Без закон буенча төрле идарә итү формаларыннан төрлечә таләп итәбез, ә аннары әлеге идарә итү формаларында яшәүчеләр зарлана, – дип билгеләп үтте ул, - минемчә, бу форманы бердәм уртак исемгә китерергә кирәк, ул вакытта Торак милекчеләре ширкәтләре дә идарәче компанияләр кебек үк кагыйдәләр һәм таләпләр буенча эшләячәк".

Утырышта шулай ук күпфатирлы йортларда гомуми милекне капиталь ремонтлауны оештыру турындагы республика законының 8 статьясына үзгәрешләр кертү турындагы закон проекты каралды. Хәзерге вакытта капиталь ремонтка взнослар күпфатирлы йортлардагы биналарның милекчеләре тарафыннан күпфатирлы йортларда торак-коммуналь хезмәтләр өчен түләүләрне исәпләүне гамәлгә ашыручы оешмалар тарафыннан гына түгел, шулай ук исәп-хисап үзәге функцияләрен башкаручы оешма тарафыннан формалаштырылган түләү документлары нигезендә түләнә. Әлеге закон проектының нигезләмәләре капиталь ремонт регоператорының взносларны үз көче яки өченче затлар көче белән түләү өчен түләү документларын тапшыру хокукын ныгыта.

Утырышта каралган автомобиль юллары һәм юл эшчәнлеге турында республика законының 12 һәм 13.1 статьяларына үзгәрешләр кертү турындагы закон проекты белән республика транспорт һәм юл хуҗалыгы министрлыгының автомат режимда эшләүче юл хәрәкәте кагыйдәләрен бозуны теркәүнең техник чараларын куллану буенча вәкаләтләрен киңәйтү тәкъдим ителә. Аерым алганда, транспорт министрлыгына юлларда урнаштырылган фиксация чараларын урнаштыру, сүндерү турында карарлар кабул итү һәм килештерү вәкаләтләре беркетелә.

Шулай ук автомобиль транспортында, шәһәр җир өсте электр транспортында транспорт чараларының түләүле автомобиль юллары буенча йөрү өчен түләү кертү буенча төбәк һәм муниципаль контрольне гамәлгә ашыру буенча вәкаләтләр киңәйтелә һәм аерып куела (төбәк һәм җирле әһәмияттәге, шәхси юллар).