Бүген Дәүләт Советы утырышында 2023 елда Эшкуарлар хокукларын яклау буенча Татарстан Республикасы Рәисе каршындагы вәкаләтле вәкилнең эш нәтиҗәләре турында фикер алыштылар. Депутатларга мәгълүматны Татарстан Республикасы Рәисе каршындагы Эшкуарлар хокукларын яклау буенча вәкаләтле вәкил Фәрит Габделганиев тапшырды. Ул шулай ук әлеге өлкәдә 2024 елда хәл ителергә тиешле мәсьәләләрне билгеләде. 

Хәзерге вакытта Татарстанда 174886 кече һәм урта эшкуарлык субъекты теркәлгән. "Бу соңгы елларда иң зур сан һәм узган ел белән чагыштырганда 6840 (3,9%) ка күбрәк, - дип ассызыклады Фәрит Габделганиев, - шәхси бизнеста эшләүчеләрнең гомуми саны, шәхси эшмәкәрләрне дә кертеп, 10,4% ка артты һәм ел ахырына 860 меңнән артып китте. Бу республика икътисадында эшләүчеләрнең 41% тан артыгы. Шул ук вакытта республикада үзмәшгульләр саны 30,7% ка арткан һәм 306 мең кешедән артып киткән.

Фәрит Габделганиев әйтүенчә, кече һәм урта эшкуарлык субъектларының товар әйләнеше 10% ка арткан, бу республиканың тулай төбәк продуктына керткән өлешне 22,6% тан 24,1% ка кадәр арттырган. "Шулай итеп, республиканың эшкуарлык эшчәнлеге субъектларының шактый өлеше яңа икътисади чынбарлыкка яраклашты", - дип нәтиҗә ясады Фәрит Габделганиев.

2023 елда Татарстан Республикасы Рәисе каршындагы Эшкуарлар хокукларын яклау буенча вәкаләтле вәкилгә 1217 мөрәҗәгать килгән, бу 2022 елга караганда күпкә кимрәк. Аларның дүрттән бер өлешеннән артыгы (28%) законнарны аңлатуга кагылган, шул исәптән товар китерү килешүләре , аренда, җир кишәрлекләрен куллану, товар билгеләрен законсыз куллану һәм лизинг килешүләрен төзү мәсьәләләре.

Бизнес-омбудсмен сүзләренә караганда, дәүләт хакимияте һәм җирле үзидарә органнарының гамәлләренә карата шикаятьләр кимегән. Бер ел эчендә норматив хокукый актларга үзгәрешләр кертү буенча тәкъдимнәр белән мөрәҗәгать иткән эшмәкәрләр саны өч тапкыр арткан (4тән 11 процентка кадәр).

Вәкаләтле вәкилнең җәмәгать вәкилләре тарафыннан 517 тапкыр җирле эшмәкәрләрне  кабул итү үткәрелгән, 407 мөрәҗәгать эшкәртелгән. Сорауларның күпчелеге шунда ук тиз арада хәл ителгән.

2023 елда Мәскәү, Әстерхан, Пенза өлкәләре, Мордовия Республикасы бизнес-омбудсменнары белән үзара хезмәттәшлек турында килешүләр имзаланган. Алар белән хезмәттәшлек барышында эшкуарлык эшчәнлеге субъектларының хокукларын һәм законлы мәнфәгатьләрен яклау мәсьәләләрендә тәҗрибә уртаклашу, шулай ук федераль органнар тарафыннан аларны карау өчен эшкуарлыкны үстерүнең өстенлекле проблемалары буенча тәкъдимнәр һәм инициативалар әзерләгәндә гамәлләрне координацияләү буенча чаралар планлаштырылган.

2024 елга бурычлар арасында, эшкуарлар мөрәҗәгатьләре белән эшләү һәм хакимият һәм җирле үзидарә органнары тарафыннан Эшкуарлар хокукларын үтәүне контрольдә тоту белән беррәттән, Фәрит Габделганиев эшкуарлык өлкәсен үстерү, эшлекле климатны яхшырту, эшкуарлыкны хокукый җайга салуны һәм административ киртәләрне бетерүне камилләштерү, муниципаль районнардагы җәмәгать вәкилләре институтының нәтиҗәлелеген арттыру һәм киләчәктә эшмәкәрләрне җинаять эзәрлекләүләрен киметүне билгеләде.

Тәкъдим ителгән мәгълүматны тикшерүдә Дәүләт Советы депутатлары Илшат Әминов, Михаил Сыровацкий, Николай Атласов, Руслан Нигъмәтуллин һәм Алсу Нәбиева катнашты.

Эшмәкәрләр хокукларын яклау буенча вәкаләтле вәкил мәгълүматлары игътибарга алынды.