Бүген Дәүләт Советында Бюджет, салымнар һәм финанслар комитеты утырышында депутатлар республиканың салым законнарына үзгәрешләр кертү турындагы мәсьәләләрне, ТР Үзәк сайлау комиссиясенең РФ Президентын сайлауга чыгымнар сметасын үтәү турындагы финанс хисабын карадылар, шулай ук берничә федераль закон проектын хупладылар.

Республика Үзәк сайлау комиссиясенә Россия Федерациясе Президентын сайлауга әзерләнүгә һәм уздыруга бүлеп бирелгән бюджет акчаларын сарыф итү турындагы хисапны тапшырганда, ТР Үзәк сайлау комиссиясе рәисе Андрей Кондратьев Дәүләт Советының депутатлар корпусына сайлау кампаниясен үткәрүдә ярдәм иткәне өчен рәхмәт белдерде. Аның әйтүенчә, Татарстанда Россия Президентын сайлаулар югары оештыру дәрәҗәсендә узган. "Федераль бюджеттан 677,4 млн сум, республика бюджетыннан 54,4 млн сум бүлеп бирелде, – диде ул. – Әзерлек эшләре барышында 2 млн 485 мең сайлаучының мәгълүматлары тикшерелде. Сайлаучыларны мәгълүматлаштыру буенча чыгымнар 3,5 млн сум тәшкил итә. Тавыш бирүнең 3 көне дәвамында Татарстанда сайлаулар турында 3,3 мең материал басылып чыкты, шуларның 116сы - федераль ММЧда».

Бүген комитет утырышында оешмаларның мөлкәтенә салым турында республика законына үзгәрешләр кертү турында закон проекты каралды. Республика финанс министры Радик Гайзатуллин билгеләп үткәнчә, РФ Салым кодексына ярашлы рәвештә, административ-эшлекле һәм сәүдә үзәкләренә һәм алардагы биналарга карата салым базасы мөлкәтнең кадастр бәясеннән чыгып билгеләнә. "Хәзерге вакытта безнең республикада кадастр бәясеннән 2 мең кв. м. артык мәйданлы сәүдә объектларына салым салына. Казан, Яр Чаллы, Түбән Кама һәм Әлмәт шәһәрләре территорияләрендә урнашкан объектларда, – дип искәртте министр. – Закон проекты белән салым базасы кадастр бәясе буларак билгеләнә торган күчемсез милек исемлеген киңәйтергә, аны административ-эшлекле үзәкләр һәм сәүдә үзәкләре (комплекслары) белән тулыландырырга, шулай ук аларда урнашкан биналар белән тулыландырырга һәм 2025-2027 елларда исәпләнгән салым суммасының 60% күләмендә салым түләүне билгеләргә тәкъдим ителә”.

Радик Гайзатуллин шулай ук РФ Финанс министрлыгы тарафыннан расланган 2024 елга һәм 2025 һәм 2026 еллар план чорына бюджет, салым һәм таможня-тариф сәясәтенең төп юнәлешләрендә барлык объектларга карата кадастр бәясеннән чыгып, оешмаларның күчемсез милегенә салым салуга күчү каралган, дип хәбәр итте.

Закон проектын тикшерүдә катнашкан комитет рәисе Леонид Якунин, депутатлар Альмир Михеев, Фадбир Сафин, Леонид Барышев һәм Геннадий Глушков тәкъдим ителгән үзгәрешләрнең кече бизнесның финанс иминлегенә йогынтысы, шулай ук салымны исәпләү өчен бердәм методиканың булуы белән кызыксындылар.

Профильле комитет әгъзалары тәкъдим ителгән закон проектын хуплады һәм Дәүләт Советына аны беренче укылышта һәм тулаем кабул итәргә тәкъдим итте.

Оешмаларның мөлкәтенә салым турында республика законының 3 статьясына һәм махсус инвестицион контрактларда катнашучы оешмалар өчен табышка салым буенча салым ставкасын билгеләү турында ТР Законының 2 статьясына үзгәрешләр кертү хакында закон проекты буенча да шундый ук карар кабул ителде. Закон проекты Россия Федерациясе белән беррәттән Татарстан Республикасы да булып торган махсус инвестицион контрактларда катнашучыларга, капиталь кертемнәр күләме 50 млрд сумнан ким булмаган инвестиция проектларын гамәлгә ашыручы корычтан җөйсез торбалар җитештерүчеләргә салым ташламалары бирү мөмкинлеген күздә тота. Документ исәпләнгән салым суммасының 4,55 проценты күләмендә мөлкәткә салым билгели һәм Татарстан Республикасы бюджетына кертелергә тиешле оешмаларның табышына салым түләүдән азат итүне күздә тота.

Утырышта депутатлар шулай ук Комитетның 2024 елның беренче яртыеллыгындагы эш нәтиҗәләре турында хисапны расладылар.  

Комитет утырышында шулай ук ТР Хисап палатасы Рәисе урынбасары Альберт Вәлиев, ТР икътисад министры урынбасары Динар Шакиров, ТР Рәисе Дәүләт-хокук идарәсе башлыгы Лариса Глухова, комитет каршындагы Экспертлар советы әгъзалары, профильле министрлыклар һәм ведомстволар вәкилләре катнашты.